MAZMUR 35 - Allah Wene Fano Wene Hupla Inane

Lebetninabuageluk sampan agarek wene

¹ Tuhan neisena, afuni ninom selerirogo noasuogeluk weri'lagwi mene andoma Hat hinom yabini o, nen it afuni ekhe an noasuogeluk weim kwi weri'lagwi mene andoma Haren inoasin o!

² Haren he handok peiyengge abuk-abuk waganek mene inom, nen mothogo hilingik mene inom wanimbik he, an lebetneame o.

³ Hat hambosie inom, harige kabelek inom wanimbik he, it afuni an mu'narek weri'lagwi mene andoma hinom yabini o. Haren yaganeti logolik telhabigin mene re An welagi o, iluk yaganom.

⁴ It afuni an nebe noasugun iluk hilingiri'lagwi mene andoma, inomame legetfisigik, inenggali warogo hilingfisigik uago. It afuni inebe misik sebe iluk nabok palogo naselei ari'lagwi mene andoma inendawinggen munenogo inambotkwe hebelhoago.

⁵ It andi re sogoien amongmong engge furisikherek hak, Tuhan agoromi malaikat omanogo nen mugusogo yinhun isoago.

⁶ Malaikat Tuhan nen mugusogo re kwe elabin mondok hikhak sekwe andoma loago!

⁷ Iren an hele watnabugun mene iluk nobaget hele webetik, kweang pogole habulhik, hilingiri'lagwi andoma re we elalinat hilingiri'lagwi.

⁸ It inoba a'nogo asigin iluk wenggelek le'ma ferekhogoat inebe weagerinabi wesuak. It inonggwaregen yebet fakhili'lagwi mene andoma bene inebe lugut lagik, saluk igik, ikhilik lambik ineiloak lek akhoak.

⁹ Oba nen an he, neisena Tuhan faget nagaiyegeti logogin, Aren nagap telnafunem he an nendawimo nen nagaiyek anggikhi lagi.

¹⁰ An nendawinggen nebe mondok abirenggeba nen nane ikhi logolik he, ”Tuhan Hat hinom higirabesu mene re ekhe werek lek!” Harenat, it inomame lek mene re, it inomame werek mene inenggimo nen telogo fisikhi lagen, Nen it inangge lek mene inom, inelagaikhogo werek mene inom he, sebelinarek werek mene omanogo inenggimo nen fikhalogo fisikhi lagen.

¹¹ Ineranhogo weneba fagetarek mene re menla'luk an eil nabi'lagwi, an wene ebe nonggot kwelek oba nen he, noba fu'mo hikhibet niili'lagwi.

¹² An nen fanorogo hilingfisikhi lagi mene omanogo re, iren hebekhogo weak meneba hilingnobagali'lagwi, nen i agum oba ubuk agarek hak, an nendawi fit lagunem welagi.

¹³ Oba nen he it inoba ou were'ma, it inobaget an nendawinggen heiselhunem he namburu ninggi'lek welagi, nunggul somarek logolik samban inobaget ugu welagi.

¹⁴ Ap inagaila'lak inamep mene inom, it inagaila'lak ekhe inom hundik mene inobaget samban agarek higit ikhi lagi. An nonggwarek nagaisa faget obaget le aga logolik hakhogo, an nunggul somarek logolik it inobaget le yaginafu welagi.

¹⁵ Oba nen he, an enggin mene noba were'ma re it inagaiyek ari'lagwi, it inebe esa fologo laga logolik he an ninom eil nabi'lagwi. An li'not nabuogeluk he ineisok hegerik lili'lagwi.

¹⁶ Iren weak inetokhogo hilingitarek andiba re puliabinafu mondok werek, nen an he ineilenggen asik-sikhogo kwela'niili'lagwi.

¹⁷ Tuhan neisena, Hat heilenggen kwela'narek werek kwelek he, ki huli logogin nogo? Iren an noasuogeluk weri'lagwi mene andiba nen nagap telnabin o, mene singa nen hilingiterek hak hilingirik weri'lagwi mene andiba nen neluk telogo nobagain o.

¹⁸ Andiba re an nen it hagainafuri hokhorogo kabokse'ma andoma ineilhanemen, Hat hai wathafik, Nen it inebe andogotukwe andoma nen fogethafik, ikhi logogin.

¹⁹ Wene ero lek kwelek it afuni an ninom eilhogo hilingnobagali'lagwi mene andi nen, an yenggerugwi kwil kwalhogo hilingnobagauwageluk heraknobagagun o. Wene ebe inonggorengge nen an inabiret nobagali'lagwi mene andoma iren inane weak hokhorogo noba fouwageluk herak nobagagun o.

²⁰ It inane fano sakhorogo igi'lek he, iren afuni fano inebe seberogo werek mene omanogo lalinabugun mene nek inawene kagalhu werek.

²¹ Iren an noba inane hum ngai eti logolik he, Haren hilingiti lagen mene re nit he arat heogo i, ili'lagwi.

²² Oba nen he Tuhan neisena, andoma mondogat he Hat heilenggen niikhi lagen, Tuhan hane igi'legengge logou fugo, nen an welagiba nen yatma lagun aro, neisena.

²³ Tuhan Allah an neisena, Hat hebe menla'luk he an nawene yi faget nebikhit ame o, an lebetnabin, neisena!

²⁴ Neisena Tuhan Allah, Haren mondok katokhogo nek hilingiti lagenma re, Hat hebe an nebikhit a'luk nili wo'nabin o, it naselei mene nen inane weak hokhorogo noba fouwageluk herak fisagun.

²⁵ It inendawimo nen anggikhi logolik, ”At ebe a'nogo niren leget fogo andi re iaple. Nit ninendawimo wenggelhi lago mene a'nogo mondogat tip ikhe andi!” iluk anggoageluk herak fisagun o.

²⁶ We an noba enggin hokho were'ma ineilenggen neagarek mene nen he, inendawinggen nonghong iluk inenggali asuak. Nen an neilhanem wonoget fakhili'lagwi mene andoma, inenu sebelogo fuluk inenggali warogo fisoak.

²⁷ Afuni nen an ap eberogo mene iluk yaganesigin sambul andi re, ineilenggen neambik inagaiyegen inanggiluk esuak. Iren hundik-hundik ikhi logolik he, ”Eberogo Tuhan andi re mondok andungdang werek mene! Aren he amingmingengge agap telek logouwageluk agaiyek mondok werek!” iluk ikhi logouwago.

²⁸ Andiba re an nen Haren katokhogo nek hilingiti lagen mene omanogo faget fagesi lagik, nen lingge inukhogo Harenek fogethafu welagik, ikhi logogin o,” iluk samban isikhe.