MAZMUR 33 - Allah Wene Fano Wene Hupla Inane

Allah fogeratarek awuni

¹ Hit afuni Allah ane higithogo hilingiti lagep mene yi sani! nineisena Tuhan nen fanotninaferek andi nen he, hit At ane hologo hilingitilagep hinaben At fogerasugun obaat, hinendawimo hinagaiyek oba, a'mit suphogo wuni wati logoni o.

² Hinambinggong kecapi aneba hineisena Tuhan hai watik, fogeratik, ikhi logoino o.

³ Nineisena Tuhan faget wuni ket mene felalogo, pinggong kecapi aneba fanorogo watik, hinendawimo hinagaiyetik hikhi logolik, a'mit suphogo awuni wati logoino o.

⁴ At Tuhan nen yi wene ti wene hilingiterek mene andoma mondogat he tiphogo nek hilingitere'ma re, At awene melalek andi re eberogo mene anggikhi logogun.

⁵ Aren he higithogo hilingitarek mene andi inom, katokhogo hilingitarek mene andi inom he, endawi hundik mondok werek. O kweangma yoma yi awi ti awi mondogat he Aren endawi hundik hilinginaferek mene a'nogo nen hoporek werek.

⁶ Nineisena Tuhan aneba hilinglame isikhemo pogot elalagik, mo, tugi, hesagal inom At aweneba elalagik isikhe.

⁷ I laut yenggelek mene andi re misi'mo andogorogo fesikhe, i agum yagamakhogo yenggelek mene andi re Aren helage palogo yagat fesikhemo werek.

^8-9 Nineisena Tuhan aneba yi mene ti mene elalame iluk isikhemo, ebe arat elalagaikhesik, mondogat werek andi nen he, yi afuni ti afuni o kweangma werek mene mondogaren he, At oba inailorogo logolik agaugwerati logouwago.

¹⁰ Afuni inunggulenu lombogen, ”Yi'nogo hilingisugun,” iluk ayo palogo fagarek mene omanogo re, Tuhan nen legetfisaluk sebelogo fikherek.

¹¹ A'nogo meneat he At Tuhan nen, ”Yi'nogo hilingisigin,” iluk endawimo anggikherek mene andi re, legetfoumo re mondok elo'lek. Yi tahun ti tahun mondok-mondok welagarek.

¹² It afuni inunggulenu inap ekhe nen Tuhan Allah andi re nit nineisena iluk fakhogo yagaisagarek mene andi re inagaiyek hikhi logouwago, Nen it afuni Aren wenagaisogo An nonggwarek nagainafuri mene logouwageluk fisasikhe mene andi re inendawimo hairogo logouwago.

¹³ Nineisena Tuhan ebe pogoroba nen, eilenggen pela'lasi wagarek, nen At eilenggen he yi afuni ti afuni mondogat inoba werek.

¹⁴ Nineisena Tuhan ebe takhta oba hurek logolik, yi afuni ti afuni kweangma welagaikharek mene eilenggen peninaferek.

¹⁵ Arenat afuni mondogat inendawinggen hilingisogo fesikhe andi nen he, it hilingitarek mene mondogat he elu welagarek.

¹⁶ Ap raja at agoromi tentara inebe hokhorogo werek andiba, omame asu lek hak. It ap tentara mene inomame hokho andi nen inebe tela lek hak.

¹⁷ Afuni nen nit ninomame asugun iluk he wam kuda ba inendawinggen tibet fou lek hak, nen at omame hokho mene werek andiba afuni inagap telinabu re elo'lek.

¹⁸ It afuni wene melalek fifurogo hilingiri'lagwi mene inom, nen endawit ninabuageluk oba eberek mondok werek mene inom Aren ferinarek mondok werek.

¹⁹ A'nogo ferinarek logolik it inebe wa'lasinogoluk Aren fanorogo telinafik. Sumburu ouwak were'ma ineluk fanorogo logouwagaluk ferinarek welagik, ikherek.

²⁰ Andiba nit ninendawinggenma nen nineisena Tuhan oba himbiret fuluk logogun. We Arenat nit lebetninafik ninili wo'ninafik, ikherek.

²¹ At faget niren ninagaiyegeti logogun, nen At enu mondok horek mene andiba nek ebeti logogun.

²² Nineisena Tuhan, nit hat hoba himbirik were'ma, hendawitninafu mondok logoino, iluk wuni watukwa.