MAZMUR 32 - Allah Wene Fano Wene Hupla Inane

Weak hilingitarek mene Allah nen sagalogo legetfisugunem inendawimo inagaiyek agarek, iluk wuni watikhe wene

¹ Afuni weak hilingitarek mene fakhogo fuluk, leget fogoin halok, inendawimo nen inagaiyek hikhi logouwago.

² It afuni weak hilingitarek mene Tuhan nen, inaweak oba ebeti'lek herak fisagain mene inom, it ekhe ineranen wene lalinafu aple inabit mene inom, inendawimo inagaiyek hikhi logouwago.

³ Attak an weak hilingiti lagagi mene fakhogo figi'lek sebelek were'ma, nenggi inukhogo nendawimo weak mondok logolik he, nomame lek welagagi,

⁴ Neisena Tuhan nen he, hup hundik lingge hundik wene noba fugu were'ma, mo aigen yi mene ti mene yago mene puget fikherek andi hak, namusu palhi lagagin.

⁵ Namusu a'nogo palhu were'ma, hobuk nendawimo ebetigisik, an weak hilingiti lagagi mene ekhe sebel figi'lek, fakhogo neisena heilhanen fugunem, an weak hilingiti lagagi mene mondogat Haren sagalogo leget fisasigin.

⁶ A'nogo hilingiti lagen andi nen, afuni inebe lombok Hat hoba inailorogo werek mene re, yi enggin ti enggin hikhi logolik, Hat hayonggo fikhi logogun halok, i fu waga logolik, yi mene ti mene sebelherek hak, inebe sebelogo fisagain lego.

⁷ An nebe hinak lagirek oba re, hat hebe aro. An weak were'ma re, telnafendek andi nen, nane hokhorogo hai wathafi lagi o.

⁸ At Tuhan nen yaganeti logolik he, ”Kwe fanokwe lagaikharekwe andi re, An nenat yagahesigin o, hat hebe fetharek logolik, yi'nogo hilingiti logoino iluk, yagahetik, komothafik, ikhi logogin o.

⁹ Wam kuda endawinggen lek andi nen he, kwe higithogo loagaluk, ambelema hele kelogo waluk lagaikharek hak, hat a'nogo hilinghafi logoinogo iluk, yaganetigin andi.

¹⁰ Afuni weak hilingitarek mene re, yi enggin ti enggin inoba hokhorogo wagarek. A'nogo meneat he, it ekhe inendawinggen nineisena Tuhan oba himbirik welagaikharek mene re, inebe endawi nen he, ferinarek mondok werek.

¹¹ Hit Allah ane higithogo hilingiti lagep mene yoma sani, nineisena Tuhan nen fano hilingninaferek andi nen he, hinendawimo hai higik, hinagaiyegetik ikhi logoni o. Hit afuni hinendawinggen sakhorek logolik Allah ane hologo hilingiti lagep mene yoma re, hinebe mondogaren hinendawimo hinagaiyek oba a'mit suphogo wuni wati logoino o, iluk wuni watikhe.