MAZMUR 30 - Allah Wene Fano Wene Hupla Inane

Noasu mene telnafemo iluk hai warogo samban ugu mene

¹ Allah Awi wurik horogo kwe huti logolik wuni watu mene.

² Tuhan neisena, it afuni an naselei mene nen puliarogo pelaknabuageluk heraknobagagi'lek, Haren an nagap telogo nobagegenma re, an nen Hat fogethafi lagi o, neisena.

³ Tuhan Allah neisena, an nen lebetnabin iluk Hat hoba nane kwetunem he, Haren an noba fano hilingnobagakhi lagen o.

⁴ Afuni wa'la'luk lagaikharek oba omanogo nen Harenat an ogalogo nobagakhi lagen, it afuni warek mene omanogo inanggele'ma nen Haren enek neluget nobagakhi lagen.

⁵ Yago, hit At againafuri mene At oba tiphogo nek hilingiti lagep mene re, Tuhan obaget wuni fogeratu awuni nek wulak fuluk fogerati logoni, nen At Mondok Horek mene andi nek hai wati logoni.

⁶ At Tuhan he we elama faget obaharo agarek, oba nen he, Aren endawimo fano a'luk hilinginafi logolik werek mene andi re nineluk logogun huli andoma hilingninafi logolik mondok werek nagaiyek mene hilingnobagai weri'lago.

⁷ An nailo legengge logolik nane ikhi logolik he, ”An he nabolok igi'lek mondok-mondogat logogin,” iluk ikhi lagi.

⁸ Tuhan Neisena, Hat hendawinggen fanorogo nek hilingnobagakhi lagen, nen an nebere tom omame mene unggulmo hakhogo liaknobagakhi lagen, Oba nen he Hat helokhe hinakfugunem he, an nendawimo nailo mene ari'lago.

⁹ Neisena Tuhan we Hat hoba nek an nen hombuk palhi lagi, nen Hat hobaat an nen kino yagaheti lagi.

¹⁰ An nebe wa'la'luk afuni warek salinafarek oba andoma pi lamo nen he, a'nogo hilinglasigin andiba Hat hobaget ambisangma ninggi'nogo asu hak nogo? Afuni warek mene nen Hat fogethabu haga? Nen Haren tiphogo nek hilingiti logolik welagen mene andi faget fakhogo yagaisa la haga? Mondok lego.

¹¹ Tuhan neisena, nane hesanggo holnabimbik he hendawitnabin, Haren an nebe lebetnabin!

¹² An fong wati lagi mene a'nogo Haren agamhogo re nagaiyegen hunikhe wanuageluk hilingnobagain, nen Haren he an nelokhe heiselogo welagi mene a'nogo hebekhogo wanhendik he, an noba nagaiyek hokho mene kwelaknobagegen.

¹³ Andiba re an nen nane legengge logogin lek, Tuhan Allah neisena, we Hat hobaget wuni wati logolik fogethafu logogin o. Nen hundik-handik andoma Harenek hai wat hafu mondok logogin!