MAZMUR 3 - Allah Wene Fano Wene Hupla Inane

Samban hubet agarek mene

¹ At Daud amlogo Absalom a'nogo nen mukhugu nen ailo'luk heise lagaikhesik wuni isikhe mene re yi.

² Tuhan neisena, afuni an naselei mene re mondok hokhorogo hilingik, nen it an noasuogeluk weri'lagwi mene re inebe hokho pokhorogo werego!

³ It inebe fena hokhorogo nen ikhi logolik he, Allah nen at lebethagain lego iluk ili'lagwi.

⁴ Oba nen he Tuhan neisena, we Hat enek he an nalong palnafi lagen mene welagen ma re. Haren an nalonget nobagagik, nendawinggen hambuget nobagagik, ikhi lagen.

⁵ An nen nane ninghogo Tuhan yagatunem he, At Andom horek meneba omanogo nen nane onggo yaganeri'lago.

⁶ An weing la'luk nabolok lek nogogu were'ma re, At Tuhan enggiba agorogo fetnarek mondok werek.

⁷ It afuni an naselei mene inebe mondok hokho pokhorogo logolik, nabel fena-fena inom nambotkwe nen inom maserogo kwelaknabi weri'lagwi oba nen he, an nen it faget nailorinafi lagi mondok lego.

⁸ Tuhan neisena o, it ap an naselei mene andoma re Haren yei tamugethigik inoa'luk he wene inoba fuluk an nebe nek he nagap telnabime o.

⁹ Tuhan neisena, we Harenat nit lebetninabi waga lagenma re, we Hat hendawi fano nen it Hagainafuri inoba fanot fisan o.