MAZMUR 28 - Allah Wene Fano Wene Hupla Inane

Lebetnabuageluk samban isikhe mene

¹ Tuhan neisena, we Hat hoba nek an nen nane humeti lagi o, Hat he an nebekhit agu mene welagenma re, an nane ikhi lagi mene andi hesanggo holnabin. Nen, Hat hane igi'lek hafe morogo logogin halok he, an he afuni wa'lagunem salinafarek oba omanogo higit logou hago.

² An lebetnean iluk Hoba kinosi waga logolik nane kwetu halok ogo, nen Hat Hawi Mondok fano horek mene a'nogo wurik fikhit andoma nenggi liakfuluk werek halok ogo, Haren nane hesanggo holnabin o.

³ An he it afuni wene sagalfuluk hilingiri'lagwi mene andi inom, nen it ap weak hilingiri'lagwi mene andi inom seberogo ninoasu fugo, it inendawimo re mondok filirek logoligen inamelinggen oba nen he inane liokhogo ili'lagwi.

⁴ It inobabut a'nogo hilingiri'lagwi andiba unggum wogisan o, Nen it inaweak hilingiri'lagwi andiba re enggin mene inoba fein, It inobabut hilingiri'lagwi mene andoma higithogo nek unggum inoba fisano. Nen inaweak hilingiri'lagwi mene andoma higithogoat unggum wogisano.

⁵ At Tuhan nen hilingitikhe mene oma faget he iren along werek anggili lagawi lek, nen Aren ekhe mene-ekhe mene hilingfesikhe mene andoma faget ogo legeisogo fili'lagwi legat. Andiba re Aren it inoba wene fuluk he it inebe mondok-mondok leget fisagain.

⁶ An nen samban oba Tuhan yagati lagi mene re At mondogat esanggo holhe andi nen he, At enek fogorati logogin.

⁷ Tuhan andi re an nomamet figik, nebikhit agik, ikherek mene werek. Nen an nen At oba nendawinggen eberogo tibet fuluk welagi. Andi nen Aren he an lebetnafik, nendawimo nagaiyek mene nek hilingnobagagik hilingiri'lago. An nen At hai warogo awuni watu welagi.

⁸ At Tuhan nen he it afuni At againafuri mene inoba inomame wogisigik, Aren raja wenago mene a'nogo ebikhit a'luk agap telhik, hilingiterek.

⁹ Tuhan neisena, afuni Hat againafuri mene andoma inagap telinafik, it afuni Hat honggwaregen mene andoma inoba fanot fisigik, in o. Hat hebe it inobaget gembala higit a'luk hundik-handik andoma Haren mondok-mondok kagalinarek logoino.