MAZMUR 27 - Allah Wene Fano Wene Hupla Inane

Allah fogeratik ayonggo figik ikhi logolik wuni watikhe wene

¹ At Tuhan andi re an liatnafik, telnafik ikherek mene hilingi'mo re. An nen nailotirek mene ekhe werek lego. Tuhan he an nalong palogo himbirengge higit fetnarek were'ma re, an he nendawimo youk igi'lek hampukhogo logogin.

² It inobabut weak mene nen an noasuogoluk noba wesugun mene re, inonggwarek ineisok yetferengge inebe warogoin o.

³ Afuni esa hokhorogo nen noasuogoluk leget wo'nabugun mene re, nendawimo nailo lekhogo logogin o. Naweim abok imbik, noasuogoluk ugun mene re, telnabigin iluk, hoba himbirik logogin o.

⁴ An nen wene misik ekhe neisena Tuhan kino yagahesik. An namolo re ebe yi'nogo. An neluk logolik oba re, ”Haren fanorogo nek hilingnafunem hobabut enek hugu welagik, nen wo'narek nikhi logoinogen iluk kino yagahetu welagik, ikhi logolik he, neisena Tuhan haiba andoma nabolok lek logoiyogen, iluk yagaheti o.

⁵ An noba yi enggin ti enggin hugu were'ma re, we At Tuhan nenat nalong palogo fetnarek werek. Aren he At Awi wuri'mo andoma hinaknobagai kwikheresik he, at Andom eil silipnorek meneba omanogo hambokhogo liak nobagaikherek.

⁶ Nen yogondak he naselei mene nen nabel fena-fena hobet nea weri'lagwi mene omanogo inoba nen nomame agarik he, nendawimo nagaiyek oba lebetneegen iluk At Aiba andoma nen nane hokhorogo hai wati logolik he, wam warogo noleti logogin. Neisena Tuhan wuniba fogeratu logogin.

⁷ Tuhan neisena, an nane Hat hoba yagahetu halok he, nane hesanggo holnafi logoino o. Hendawi nealuk onggo yaganeti logoino.

⁸ Haren yaganeti logolik he, ”We'luk fogetnafi logoin,” iluk yaganetunem an nen onggo ikhi logolik he, ”Tuhan neisena, an he weak-weagat fogethabi wesigin,

⁹ enggere, an nagaiserogo hi na'lasu fuk,” iluk ikhi lagi. An weak were'ma Harenat lebetniikhi lagagindi'mo re, yogondak an hamingmingengge yi noba ha'mage figik, habiret nobagagik ugun o. Hat neisena Allah re an nagap telnafi lagen mene welagenma re, Haren an ekhema hukniigik, hesanggema nobagagik u fugo, neisena.

¹⁰ Neisena nagaisa nen hera'nobagaluk logoin oba nen he, neisena Allah nen an nebe fetnarek mondok logogin.

¹¹ Tuhan neisena, an naselei mene re inebe hokho pokhorogo werek andi nen he, Hat hendawimo nen an nen hilingi'lep anggikhi lagen mene andi re an inukniigik, kwe higithogo lagaikharek meneba halogo nobagai lagik, in o,

¹² Naselei mene ina'mage lagaluk ineranen wene lalogo weak hilingisogo nobagauwogoluk hilingiri'lagwi mene andi inenggiba re, nobagagun o.

¹³ An nebe o kweangma yoma neluk were'ma, At Tuhan endawi fano nen hilingfisikherek mene a'nogo hagain iluk an nendawimo nen ibi-eberogo anggikhi lagi o.

¹⁴ Tuhan oba nek hinendawinggen eberek mondok logoni, hinendawimo leigeti'lek hambukhogo logoni, we, At Tuhan oba nek hinendawinggen tibet fuluk logoni, iluk samban isikhe.