MAZMUR 25 - Allah Wene Fano Wene Hupla Inane

Halogo nobagagik, awea'ma nobagaluk fetnarek welagik uageluk samban isikhe wene

¹ Tuhan neisena, an nen samban Hat hoba liabi waga lagi o.

² Neisena Allah, an he we Hat hoba nek nendawimo eberogo anggikhi lagi o! Nen it afuni an naselei mene nen pelaknobagakhi logolik, nenggali warogo hilingnobagauwageluk herak nobagagun o, neisena.

³ It afuni Hat hoba ineranen wene agarek mene andoma re inenggali asugun. Oba nen he Hat hoba inendawinggen tibet fagarek mene re inendawimo heiselasuageluk ekhe hilingfisagain lego.

⁴ Tuhan neisena, Hat hendawimo anggikhi lagen mene andi re an noba inuk nean o, an nen hilingisigin mene andi re Haren weinamet fein o.

⁵ An nebe Hat hendawimo anggikhi lagen mene higithogo nek hilingiti logouwageluk yaganetik, yanggulnafik, in o. Allah an nebe telnafi lagen mene re we Hat hamu welagenma re, an nen Hat hoba nek nendawinggen eberek mondok welagi o.

⁶ Tuhan neisena, Haren attak-attak hobabut fano mene a'nogo inom, hendawi hundik hilingnafi lagen mene a'nogo inom, inuk neasigin mene a'nogo re eberek logoino o.

⁷ An nebe souge logolik naweak hilingiti mene inom, kwanirogo hilingiti mene inom, Haren leget nobagambik he, Hat hobabut fano logolik, hendawi hundik hilingiti lagen andiba an noba ebetniugu nogo.

⁸ At Tuhan andi obabut he fano logolik higithogo nek hilingiterek mene hilingi'mo re, afuni inendawinggen nonghong ugunem, kwe logoinkwe yagaisikherek.

⁹ It afuni inendawinggen sebel fakhaluk hilingitarek mene re Tuhan nen halogo woginarek nikherek, nen iren he At endawimo anggikherek mene hilingiti logouwageluk yagaisikherek.

¹⁰ It afuni nen ambi At Tuhan nen abok wene warisasikhe mene omanogoba inom, At Awene melalek oba inom, hologo nek hilingitu werek halok he, Aren ogo endawi hundik oba inom tiphogo nek hilinginaferek meneba inom, hilinginafu mondok werek.

¹¹ Tuhan neisena, an naweak hilingiti mene mondok hokhore'ma re, Haren wene watneten higithogoat naweak lek hilingisogo nobagain o.

¹² Tuhan nen he it afuni At Awene melalek futfuluk hilingitarek mene nek, it logoinkwe yagaisikherek.

¹³ It inebere inangge yi mene ti mene mondogat were'ma nek logogun, nen it inagainafuri inombawi inom he, inaggweang it eise agaikha mene andi fisogo logolik mondok logogun.

¹⁴ At Tuhan he it afuni at oba inailorogo logolik higithogo hilingitarek mene re inom fano hundik welagarek. Aren endawimo wenggelherek mene re it inoba weinamet fikherek.

¹⁵ An nebe weaget nobagau mene ambisangma asi lagunem Aren telogo nobagali'lago andi nen he, At Tuhan oba nek neilenggen lourek logolik welagi.

¹⁶ An nane tingi tongorogo logolik mondok wiik weakhogo welagimo re, Hat heilenggen neambik hendawitnabin o.

¹⁷ Nendawi fit lari'logo mene re hokhorogo ari'lagoma re, nendawi fiti lagi mene andi Haren fikhalogo nobagain o.

¹⁸ Nendawi fit lagu nen hilingiti lagi mene andi inom, enggin-fenggin hikhi lagi mene andoma inom, Harenat fut nobagaluk, naweak mondogat legaphogo nobagain o.

¹⁹ An naselei mene mondok hokhopokhorogo werek engge yi, heilenggen han? Iren an mondogat li'norogo hilingnabi'lagwingge andi.

²⁰ An he Hat hawea'ma fetnarek welagenma re, an nenggali asinogoluk kagalnarek logolik nagap telogo nobagakhi logoin o.

²¹ An nen Hat hoba nek nendawinggen eberek welagimo re, we Hat hobabut fano hilingnafi lagen mene andiba inom higithogo nek hilingiti lagen mene andiba inom an kagalnarek logouwak.

²² Neisena Allah, it Hat hagainafuri inendawinggen suk-sakhogo were'ma, Harenat fikhalogo fisikhi logoin o.