MAZMUR 24 - Allah Wene Fano Wene Hupla Inane

Raja fogeratarek mene a'nogo faget

¹ Kweang inom, yi mene ti mene mondogat oba welagorek mene inom, eisewerek ebere, nineisena Tuhan Allah amu welagarek.

² Aren kweang elalhi logolik, i laut uan yenggele'ma, tik ninghogo warogo fesikhemo werek.

³ Tuhan andom oba andi re it sani higiren lagaluk, At awi hore'ma andi elok kugun nogo?

⁴ It inobabut hilingitarek oba inom, inendawinggen wenggelharek oba inom kwanirek mene hilingiti'legengge werek halok inom, it inaneba hesangge hombuk palogo agarek lek halok inom, it tugwi kembu fogeratarek lek mene halok inom enek he elok kugun.

⁵ Inobabut ariginik mene re nineisena Tuhan nen telinabimbik, fanorinabigin werego. A'nogo fanorinafi logolik At Allah nen yagaisikhi logolik, ”Hit he weak hilingiti'lego,” iluk yagaisagain aro.

⁶ It afuni at Yakub eisena Allah fogerasuogoluk andogosi waga logogun mene andoma re a'nogo nek hilingiti logogun.

⁷ A'nogo kwikhi logolik, ”Nineisena Enupogot Allah fogeratarek mene andi ebe elok kwi wesuagaluk, kwe ambe endamat palek mene a'nogo ele hokhorogo hut fembik logoni o,” iluk ugunem,

⁸ it oloba werek mene nen he, ”Enupogot andi sa nogo? fogeratarek mene andi ebe sa,” iluk ugunem, it enda'ma nen he, ”Enupogot andi ebere, Omame Mondok hokho logolik, weim aninirogo yafik, omamerogo yafik, ikherek mene a'nogo o,” iluk ugunem,

⁹ Enda'ma nen he, ”Nineisena Enupogot, Allah fogeratarek mene ebe elok kwi wesuagaluk kwe ambe endamat palek mene andi, hokhorogo hutfembik logoni o,” iluk ugunem,

¹⁰ it oloba mene nen he, ”Enupogot andi sa nogo? Fogeratarek mene andi ebe sa,” iluk ugunem, enda'ma nen he, ”Enupogot andi ebere Tuhan, Omame Mondok Hokho mene a'nogo, Pogot kweang yi mene ti mene elalhikhe mene a'nogo, Raja fogeratarek mene a'nogo o,” iluk agarek, iluk wuni watikhe.