MAZMUR 22 - Allah Wene Fano Wene Hupla Inane

Enggin-fenggin hikhi logolik samban oba yagatik, wuniba fogeratik agarek wene

¹ Afuni nen wuni wulagaisogo inebe seberogo ugu kwelek yagaisugu mene faget, wuni rusa o wei igiluk ugu kwelek agarek awuni a'nogo higithogo: At Daud awuni.

² Allah neisena, an neisena Allah re Hat hebe welagen, nenahalok Haren oboget neegen nogo? An nen Henu hombuk palhi lagiba nen he, Hat hebe yatma logolik nane hesanggo holhi lagen lek?

³ Neisena Allah, o linggene re an nane humeti lagi, oba nen he Haren nane onggo yaganeti'lek aloksek mondok welagen, nen o hubanggo samban hoba yagaheti lagiat, oba nen nendawinggen hambugili'lago legat.

⁴ Ariginik oba nen, Harenek he Raja Mondok Horek hagun welagen andi nen, it afuni Israel mene nen fogethabi'lagwi.

⁵ Nen nit ninambu ninombalagen he Hat hoba nek eberek mondok welagaukwa. A'nogo were'ma Haren inagap telogo fisikhi lagagin.

⁶ Iren telninabin o iluk inane humetunem he Haren lologo fisikhi lagagin, nen it inendawimo nen Hat hoba nek tipsek mondok were'ma re Haren it inendawinggen heiseluageluk oboget isikhi lagagin mondok lek.

⁷ A'nogo meneat he, it afuni ekhe nen an yaganeti logolik, ”At yi re afuni hangge fuk, we at ebe re imbalo hangge,” iluk nenggali warogo inane weak noba fagarek andi.

⁸ Inebe mondogen ineilenggen yetnealuk, endo ya'nafi logolik he, inambisang singgin wa'nafik, inunggul kwani igik, ugu mondok welagaikharego.

⁹ A'nogo hilingiti logolik iren mel agarek, ”At Tuhan nen at ebe elu halok he, Aren teluagen he, oba himbiret fembik logouwak he, iluk yaganetarek andi.

¹⁰ Harenat an nagaisa alabutmo nen wulak nobagai wagagindik, nagaisa agoumo fanorogo fetnarek logouwageluk hilingnobagasigin.

¹¹ An nebe ta'lagagi huli nen, an noba hilinglasigin mene andi mondogat he Hat henggiba nek werek. Nagaisa alabutmo welagagi huli nen, an neisena re Harat welagen.

¹² An weaget nabugun mene horogat asi wagaikhama re, telnabugun mene ekhe werek lek andi nen, Hat he hera'nobagaluk yatma lagun o.

¹³ An naselei mene re wam banteng esa hokhorogo logalogo wagarek andi hak, it an naselei mene nen an haningisogo kwela'nabi weri'lagwi. Nen banteng maro mene o Basan oba andoma hakhogo iren an huli'liphogo kwela'nabi weri'lagwi.

¹⁴ Mene singa nen yi mene ti mene ebe halmakhigik nagaluk, ane kouwarik wagarek hak, iren an noasuogeluk inambe anghogo weri'lagwi.

¹⁵ I kweisalhugunem lek agarek hak, nomame mondok lek agik, noak mondogat enggalim oba nen orolhigik lagunem hangge welagik, nendawinggen kwe wam sei nunggunem hakhogo amok le'legenggetunem welagik, hilingiti lagi o.

¹⁶ Nalonggop elema re iwak halongorek mene hakhogo mondogat kelok ikhe, namelinggen he nelanglang oba te'me ikhe. Neisena Tuhan an he afuni warek mene hakhogo re, ologoilong engge amboloba nobagegenma welagi o.

¹⁷ An he ap weak hilingitarek mene nen esa logalek engge waga logolik mu'niili'lagwi o. Mene esa logalek logolik hilingitarek hakhogo re iren an nebe haningisogo kwelaknobagaluk, nenggi neisok fo'lokhigik noari'lagwi o.

¹⁸ A'nogo hilingitunem an noak mondogat he elok wenasu hak hilinglari'lago. Nen it naselei mene mondogaren he ineilenggen kumutungge hakhogo nek kumutnafu mondok werego.

¹⁹ Iren he an nasu omanogo sumburogo heligik, Nasu pisarek endakwe labeti lagi mene omanogo re, sumburogo helouwogoluk oagengge lakfigik wakfigik aga o.

²⁰ A'nogo meneat he, Tuhan neisena, an nebe heraknobagaluk Hat hebe yatma lagun o. An nomame re haren enek wo'neti lagen andi nen he, weak-weak we'luk lebetnabi me o.

²¹ An neluk yi karok ambisangma agi hanogoluk, Haren telnabime o. Mene nen libilinaferek hak, noasuogoluk ili'lagwi yi, haren an telnabime o.

²² An he nomame lek welagimo re no kambing andimuk hanggeba inom, singa aik werelek kabuk hanggeba inom, noasuogoluk ili'lagwi mene andomaba nentelnabime o.

²³ Haren hilingiti lagen mene andoma re an nen nerugwi nagaila'lak yagaisikhi logogin o. Hagainafuri andogorek were'ma andoma, an nen fogethafi logogin o.

²⁴ Hit afuni At oba tipsek logolik hilingiti lagep mene yi sani, At enek fogerati logoni o! Hit afuni Yakub en tagongge mene mondogaren he Arenek esinet fikhi logoni o! Hit afuni Israel en tagongge mene hinebe mondogaren he ineindep awi yagaisogo At apne wanhi logoni o!

²⁵ At Allah re afuni nen sebelogo fisagarek mene andi inoba re sebelek hangge iluk anggikherek lek. Nen yi enggin ti enggin hili'lagwi andi re, se mene hili'lagwi iluk anggikherek legat. Telninabin iluk yagatunem, elokhe hebekhogo herakfisaluk lagarek legat. Oba nen he iren lebetninabin o, iluk yagatunem he Aren inane esanggo holherek.

²⁶ Haren yi wene ti wene hilingiti lagen mene andoma faget it afuni Hat hagainafuri inebe andogorek were'ma inanggele'ma andoma nen, an nen Hat fogethafi logogin o. It afuni Hat hane holfuluk hilingiri'lagwi mene andoma inelokhoma nen wam warogo nolhesigin iluk wene wathetigi mene a'nogo an nen warogo nolhesigin aro.

²⁷ A'nogo nolhetunem, it afuni inelagaik mene re eberogo nen inalabut ninghogo nogoin aro. It afuni At Tuhan oba waga logogun mene re, At enek fogerati logogun. It andi yagaisikhi logolik he, ”Hinendawimo hinagaiyek hugu mondok logoino,” iluk yagaisikhi logogunat.

^28-29 Nineisena Tuhan nen afuni inunggulenu lombok ferinarek welagendek andi nen, afuni inunggulenu mondogat Tuhan oba ebetfembik, inambotkwe hoba wesugun o. A'nogo hoba wesimbik ineindep awi yagaisogo hai wathafik fogethafik ugun o.

³⁰ Ap kaindek inebe mondogat, ineindep awi yagaisogo At fogerasugun aro. Afuni wa'lagaikharek mene inebe mondogaren he, ineindep awi yagaisogo At enek fogerasugun o.

³¹ It hobuk logogun mene nen he, Tuhan faget enek hilingiti logogun. Iren he, iren tagongge mene inoba, At ane yagaisilik laga logogun.

³² Afuni inunggulenu lombok hobuk ta'lasugun mene nen wene yagaisikhi logolik, ”Nineisena Tuhan nen he againafuri telinafikhe o,” iluk yagaisikhi logogun, iluk wuni watikhe.