MAZMUR 21 - Allah Wene Fano Wene Hupla Inane

At raja along a'luk Tuhan fogeraterek awuni

¹ Afuni nen wuni wulakfuluk inebe seberogo ugunem melalinafu mene faget, Daud Awuni a'nogo.

² Tuhan neisena, Harenat raja omamet fikhi lagen andi nen he at agaiyegeri'lago, Haren At alonget fikhi lagen andiba re at mondok foget fakhili'lago.

³ Haren enek at endawimo anggili'lago mene omanogo higithogo hilingfigik, nen we nena mene kino ugu mene omanogo wogetik, ikhi lagen.

⁴ Hat hebe waga logolik hangge yi mene ti mene at oba fanot fei wagik, at ungguloba kware-kware emas oba hilingik engge puget fei wagik, isigin.

⁵ An neluk logogin iluk kino isikhemo Haren wogetendik, at ebe eluk umur uanhogo logouwageluk hilingfesigin.

⁶ Haren lebethuguba nek at ebe ap lego mene hilinglaga, Harenat at ebe enu lego logolik anggiluk werek mene logouwageluk hilingisogo fegen.

⁷ Haren ap andi ebe mondok-mondok faget fanot fegen, Hat hebe elokhoma welagen andiba at agaiyegap kwelafi lagen.

⁸ At raja andi nen he Tuhan Lego Mondok welagarek mene andiba nek eberek mondok werek, at ebe re Tuhan nen endawi hundik mondok hilingitunem he ailo lekhogo fanorogo nek werek.

⁹ Aren he afuni mondogat at inom inaseleirogo werek mene omanogo hele warogo fisigik, it afuni Tuhan oba inabit anggagarek mene halok senfisigik, ikherek

¹⁰ It inebe legetfisageluk he, At ebe endu amulok kulung-kulung weri'lago. It inebe re At Tuhan a'mage nen inom, endu nolinafu mene nen inom, mondogat legetfisagain.

¹¹ At raja nen it inebe mondogat warogo fisamo re, it inambisangma mene nen tagongge mene ekhe logogun lek.

¹² Iren at raja awene melalek a'nogo sagalogo fuluk hilingisugun iluk wene lenggalhi logogun halok he, ineranen wene ikhi logogun mene andi re ambisangma fano aga logogin mondok lek.

¹³ At Tuhan nen andok pisinghogo lakfugunem he, it inambotkwe sugulogo heise pugulik-pagalik ikhi logogun.

¹⁴ Tuhan neisena, Hat he Hebe Homame Mondok Hokho mene welagenma re, niren esinethafi lago o, Haren elalin mondok hokho mene hilingiti lagen andiba re, wuniba fogethafi lago o.