MAZMUR 20 - Allah Wene Fano Wene Hupla Inane

Nalonget nobagain iluk samban isikhe wene

¹ Afuni nen wuni wulak fuluk inebe seberogo ugu kwelek melalinafu mene faget, Daud awuni a'nogo.

² Hat hoba enggin-fenggin were'ma andoma we At Tuhan nenat onggo yagaheti logouwak, at Yakub eisena Allah a'nogo omameba nek hat halong palogo fetharek logouwak.

³ Nen At Aiba Ebe werek oba andoma nen hat lebethiugu mene lakfei waga logouwak, nen, o Sion punuba andoma nen lebethiikhi logouwak.

⁴ Haren At obaget yi mene ti mene wogeti lagen mene andoma faget ebethikhi logouwak, nen haren wam warogo nolengge noleti lagen mene andomaba agaiyek hikhi logouwak.

⁵ We Aren enek yi mene ti mene hat hendawimo hamolo mene andoma wokheti logouwak, nen haren hilingitu mene faget iluk abok wilafi lagen mene andoma ambisangma mondok fano mene nek aga logouwageluk hilinghobagakhi logouwak.

⁶ Hat homame mondok ari'lago andiba nit ninagaiyegen ninabunuk eti logogun, nen poksu bendera linoget hagarek andi hak nit ninendawimo nen wuniba nineisena Allah fogerati logogun. We At nineisena Tuhan nen enek haren kino yagati lagen mene andoma mondogat hologo nek wokheti logouwak.

⁷ At Tuhan nen ap raja wenagaisogo fikhe mene a'nogoba alonget fili'lago mene andi re yogondak an arat nelu ari'lago. At Tuhan ebe pogoroba mondok fanoma omanogo logolik onggo yagaterek, nen At Tuhan nen at raja a'nogo omamet fugunem mondogat along ari'logo.

⁸ It ap ekhe fena nen he inangge kereta amboloba lagaluk weim yabik lagaikharek mene a'nogoba inendawinggen tibet fagarek. Nen it ekhe fena re inanggo kuda ba inendawinggen tibet fagarek. Oba nen nit he nineisena Tuhan Allah a'nogoba nek tipsek mondok welago.

⁹ It he ineisok unggum silukhogo hulambesugun, oba nen nit enek he menla'luk hambuk lele warogo mendek logogun.

¹⁰ Tuhan neisena, Haren nit ninoe raja oba omamet fikhi logoino, nen niren Hat hayonggo fugunem, Haren ninane onggo yaganisikhi logoino.