MAZMUR 2 - Allah Wene Fano Wene Hupla Inane

Allah nen ap Raja ekhe wenagaisogo menfesikhe wene

¹ Yi afuni ti afuni hokhorogo inane sagalek-pagalek hilingiti logolik, Afuni inunggulenu lombogen ”Yi'nogo hilingisuok,” iluk tulemat ili'lagwi andi nenahalok nogo?

² It afuni kweangma mene inogogwi raja-raja omanogo inom, kaindek-kaindek inomame hokho mene omanogo inomen, nit nineisena Tuhan inom ap Raja Aren wenagaisogo fikhe mene a'nogo inom, emberek inoasuogoluk weim abok inebe mondogen inane misik seberogo mata andi.

³ It ap inogogwi inomame hokho mene andi nen ikhi logolik he, ”It inawe a'ma welago mene andi ninale'ma asuogen he, it inomame leget fisambik, nit sebela kuogo,” ili'lagwi andi.

⁴ A'nogo ugunem he, nineisena Tuhan ebe pogoroba at obulu'mo welagarek oba logolik he, inane esanggo holheresik, ”Hiren a'nogo hilingisu hak nogo a?” iluk ina'mage leget fisigik, endo yaginafik ili'lago andi.

⁵ A'nogo ikheresik, Aren it inoba inagut palogo wenagisigik, a'makwe mondok het-periluk youk wulaginafik ikherek.

⁶ Aren ikhi logolik he, ”Ap an nen wenagaisogo figi mene a'nogo ebe raja logouwagaluk, nonggwarek nandom Sion Mondok Horek mene a'nogoba arat menfigi o,” iluk isikhe andi.

⁷ Raja nen ikhi logolik he, ”An he, Tuhan nen wene menfikhe mene andi faget eberogo anggikhi logogin. Aren an noba ikhi logolik he, Hat he An namlogo, Yogondak yi sambul An hat heisena agi o.

⁸ Haren kino yaganetunem he, yi afuni ti afuni inunggulenu lombok andoma Hat wokhesigin o. Nen o kweangma mondogat andi re Hat honggwarek hangge mene asigin o.

⁹ Haren he, it andi harige tomuk posiemanggen meneba falelogo lakfisigik, Nen iwak kweang meneba hilingik mene hakhogo halokhogo lakfisigik igin o,” iluk ikhe.

¹⁰ Aren a'nogo ikhe andi nen he, hit ap hinenupogot mene yi sani. Yi'nogo hilinghinabigin iluk husumbi yagahisikhe mene andi hinesanggo fanorogo holini o. Hit ap kaindek kweangma hinomame hokho mene yi sani! Wene andi fanorogo futfeni o.

¹¹ Tuhan ebe hinailorogo logolik, At faget enek hilingiti logoino o.

¹² At Tuhan a'mage endu amulok weak-weak ibilagarek andi hak, a'mage het-periluk hit weagethinabinogo nen he, At elokhoma hinailorogo hineindep awi yagaisogo nen, fanorogo fogerati logoino o. Afuni nineisena Tuhan en inebe ferinarek logouwagaluk awe a'ma kwagarek mene nek, Aren fanorinafunem inendawimo inagaiyek hikhi logouwago, iluk isikhe.