MAZMUR 19 - Allah Wene Fano Wene Hupla Inane

Allah nen yi mene ti mene elalogo fesikhe mene faget wuniba At ebe fogerati logogun wene

¹ It ekhe nen wuni wati logouwagaluk, Daud en felalogo watikhe mene.

² Pogoren ikhi logolik he, ”Allah fogethafi lago,” iluk At fogeratarek. Huli waregen ikhi logolik he, ”Allah enggi nen elalninafikhe,” iluk it ekhe fakhogo yagaisikherek.

³ Andi hak it ekhe nen he, o yogondak hak wei ikhi logolik, ohealek hak wei igin mene yagaterek. Nen yogondak hak hup aga logolik, hobuk hup asigin mene yagateregat.

⁴ Iren a'nogo agarek andi inaneba agarek lek. Inane ugunem holharek legat.

⁵ A'nogo meneat he, iren agarek mene andi yi awi ti awi saga ikherek. Wene yagaisagarek mene andi pogot ero huli andoma lagarek. At Allah nen mo awi o pogoroba wurogo fesikhe.

⁶ Ap inagagwi ket woginapluk, inendawimo inagaiyek hilik wulifarek hangge, ap ekhe ineisok werek mene, sa awewerek-sa awewerek walhouwogeluk inendawimo inagaiyek hilik siakhogo lagaikharek hak at mo andi huberat siakhogo lagai wagarek.

⁷ Pogot eroma nen yarik-yarik pogot elugunmo lagarek. yi mene ti mene mo oba kwikherek lek mene ekhe werek lek, mondogat oba kwikherek enek, iluk wuni watikhe.

Allah nen komotninafikhe mene faget wuni watikhe wene

⁸ Nineisena Tuhan nen komotninafikhe wene andi re, higit mondok werek. Wene andi nen inendawinggen agaiyeget fikherek. Tuhan nen wene yi'nogo ti'nogo melalogo fesikhe mene andoma re mondok-mondok logogin mene. Afuni inendawinggen abirengge mene re, wene andi nen inendawimo kagalherek.

⁹ Tuhan nen wene melalek hilingitu mene fesikhe andoma re higithogo nek fesikhe, nen iren higithogo hilingitunem he inendawimo inagaiget fikherek. At Tuhan nen yi'nogo hilingiti logoino iluk isikhe mene andoma re higithogo nek fesikhe, afuni futfouwageluk hilinginaferek mene fesikhe.

¹⁰ Allah faget fogerati logogun mene andi re mondok fano, lek asigin lek mene. komotninafikhe wene andi mondogat he ibi-eberogo nen higithogo hilingiti logogin mene.

¹¹ Emas fano mene andi endep elo'lek hangge, meneat he, Tuhan nen komotninafikhe wene andi re mondok esin hokho mene o. Kin amusu fano mene andi re endep elo'lek hangge, meneat he, ebe wene andi re enduk mit mirengge mene.

¹² Wene andi mondogaren he, an hamingmingengge fut fouwageluk yaganeterek. An nen wene andi higithogo hilingisigin halok he onggo hokho mene nobagaikhemo werek.

¹³ Kwe inonggotma nong agaikharek hak, ninonggotma weak hilingitorek mene ninonggwaregen futfou elo'lego. An tukhumhogo nonggot logolik, weak hilingiti mene ekhe werek halok he, fikhalogo nobagain o, neisena.

¹⁴ An neranhogo weak hilingiti hanogoluk, fanorogo telnafi logoino o. Weak mene nen fa'nobagaluk fetnarek logoinogoluk, wo'narek laga logoino o. A'nogo fetnarek were'ma, tegelek mondok logolik, Hat hane hologo, weak hilingiti'lek logogin o.

¹⁵ An nane igi mene inom, nendawimo ebeti mene inom, hat hendawimo fano a'no, neisena Tuhan fetnarek mondok welagendek mene, an nebe telnafendek mene, iluk wuni watikhe.