MAZMUR 18 - Allah Wene Fano Wene Hupla Inane

At Daud omame agaikhesik wuni watikhe wene

¹ Afuni nen wuni wulak fuluk inebe seberogo ugu kwelek melalinafu mene faget. Tuhan amingmingengge Daud a'nogo awuni. At Daud ebe it aselei mene fenakwe inom at Saul enggiba nen polokhogo wulifikhesik logolik, wuniba Tuhan fogeratikhe awuni.

² Tuhan neisena, Hat hebere an nomamet nafu mene welagenma re, Hat hoba nendawi hundik welagi o.

³ At Tuhan andi re, leget pa'leget omamerogo waganek andi hak an nebe awea'ma fetnarek mondok werek. An neisena Allah andi re helep oumo an nebe hinaklaguba higit werek, afuni nen tok peiyengge ma'mut fagarek hak Aren an ma'mut narek werek, nen an nebe nailo lekhogo logouwageluk he Arenat kagalnarek werek.

⁴ At Tuhan andi re enu hombuk palu higit obaat ayonggo fugu welagimo re, Aren an naselei mene inoba nen fikhalogo wulak nobagali'lago.

⁵ Wa'lagaikharek mene a'nogo nen he an nebe hanigisogo kwelaknabi weri'lagwi, Nen i yenggelik lagaikherek hak an nebe leget nobagauwogeluk hobet nabi weri'lagwi.

⁶ Wa'lagaikharek mene a'nogo nen he an haningisogo kwelaknabi weri'lagwi, nen wa'lari'lagwi mene andi re hele wepsek were'ma hakhogo an neralukwe a'nogo wepsek logolik werek.

⁷ An nebe mondok nonghonghogo logolik neisena Tuhan oba nane yagati lagi, an lebetnabuageluk neisena Allah ba nane hum etunem he, At ebe awiloba omanogo nen an nane holnobagaluk he fut nobagali'lago.

⁸ A'nogo holnobagaluk At Allah mondok a'mage lagagunem he, abologet hugunem, o kweangma mondogat abolok ikherek, nen tom ero yago mene andoma ogore abologetik, leigetik ikheregat.

⁹ Hule re ambisang elema nen palogo wulabi wagik, nen endu amulok inom, endu ambisang inom he At ambelema nen wulabi wagik ikherek.

¹⁰ Pogot healhaluk he At ebe ohena hik meneba eisok sebelik pi wagarek,

¹¹ At ebere malaikat it ekhe inunggulenu kerub agarek a'nogoba tarogo lagarek, a'nogo laluk he At ebe sogoien agerabul oba tarogo nikherek.

¹² At ebe werek oba re ohena hik mene nen huli'liphogo kwelabek werek, nen anggulok mondok hikweak mene nen he At ebe maserogo kwelabek.

¹³ At elokhe mo asinandi hangge omanogo nen he, anggulok hik mene inom, meiso es mene inom, nen endu mene inom omanogo terenghogo lakfikherek.

¹⁴ A'nogo hilingfikheresik he At Tuhan ebe pogoroba po'lima nen, unggunggu aneba sup pololang eterek, At Lego Mondok welagarek mene a'nogo nen ane holherek.

¹⁵ Aren andok omanogo sup saphigik lakfugunem he, At aselei mene omanogo telfol isikherek. Aren eilabut palfigi'lek ekhe fotok ekhe fotok isugunem he, it a'nogo heise pugulik pagalik agarek.

¹⁶ At Tuhan nen aselei mene inoba ane pararak etik, eleage ambisang elekwe nen furisigik ugunem he, kweang i laut fem a'ma ma'lima mene mondogat weinam agik, nen kweang ero talek mene omanogo mondogat weinam agik, ikherek.

¹⁷ At ebe legoma po'lima nen enggi pelakfei we'luk he, an nebe fagaisogo wo'naferek. I fu lagarek mene agumo nen heiselogo wo'naferek.

¹⁸ It afuni an naselei mene inebe inomame hokho mene omanogo inoba nen inom, Nen it afuni an inabit mene omanogo inoba nen inom, it inomame mondok hokhore'ma, an nomame legen he, At Tuhan nen an nagap telnaferek.

¹⁹ An noba enggin-fenggin agu sambul aremnogo re iren noasuogeluk weri'lagwi, oba nen At Tuhan he an lebetnafu mene ari'lago.

²⁰ Aren an faget endawimo agaiyek anggugunem a'luk he, ap youkhogo were'ma nen ogore, an lologo wulaknobagagik, nagap telogo nobagagik, hilingnaferek.

²¹ An nobabut oba eberogo mene nek hilingiti lagimo re At Tuhan nen onggo higithogo nek hilingnobagali'lago, nen an weak mene ekhe hilingiti lagi lek andi nen he Aren an fanotnobagali'lago.

²² An he neisena Allah elokhoma nen not kwanirogo laga lagi lek, Tuhan awene melalek a'nogo an nen hologo higithogo nek hilingiti logolik welagi.

²³ Aren wene yi'nogo hilingiti logoino ti'nogo hilingiti logoino iluk isikhe wene a'nogo an nen fi-furogo futfuluk hilingitu welagi. At awene melalek andi re an nen endephogo iluk ekhe taganet fikhi lagi mondok lek.

²⁴ An nen weak hilingitu aple herakfigik, kwanirogo hilingitu aple agaiseratik igirek mene andi re Arogo mondok elurek.

²⁵ An nen nobabut eberogo mene nek hilingiti lagimo re At Tuhan nen onggo higithogo nek hilingnobagali'lago. An nen weak mene ekhe hilingiti lagi lek andi nen he Aren an fanot nobagali'lago andi.

²⁶ Tuhan neisena, afuni tiphogo hilingitarek mene inoba re Haren ogo tiphogoat hilingfisikhi lagen, nen fano hilingitarek mene inoba re Haren ogo fanorogo nek hilingfisikhi lagen.

²⁷ Nen, it afuni inebe enogo fakhaluk werek mene omanogo inoba re Haren ogo mondok horek welagen mene a'nogo weinamet fikhi lagen, oba nen he afuni weak hilingitarek mene inoba re Hat hinom weim palek welagen.

²⁸ Afuni inendawi sebelfakhaluk hilingitarek mene inoba re Haren inagap telogo fisikhi lagen, oba nen he, afuni inonggwaregen legetfakhugu mene halok he, Haren sebelogo fisikhi lagen.

²⁹ Tuhan Allah neisena, Haren he an naesage wial nobagakhi lagen, An noba mondok mum were'ma Harenat seleget nobagakhi lagen.

³⁰ It afuni an naselei mene warogo lakfisoageluk he Harenat nomame wo'neti lagen, At Allah nen lebetniikherek oba nek it naselei mene inomame were'ma eroma a'nogoat tolulurogo kwi laga lagi.

³¹ At Allah nen hilingiterek mene andoma re mondok fano mene nek hilingiterek, nen Aren wene watnisikherek mene andi re munenherek le'ma re eberogo nek anggikhi l ogogun. At ebe inalong palengge were'ma re it afuni mondogaren At a'ma kuluk logogun. Nen At ebe tok kwe palengge hak a'luk logogin.

³² At Allah andi re we Tuhan amu nek werek, nen nit ninili wo'ninaferek mene ogore we At alegat werek.

³³ An nomamet nobagaikherek mene ogore we At Allah amuat werek, nen Arenat an ebekwe nailo lekhogo loageluk hilingnobagali'lago.

³⁴ No rusa oak wuriksek welagarek hak Aren an neisok nomamet figik, Nen an nebe o tomkwe lagunem nagap telek loageluk Arenat wo'narek lagik, ikherek.

³⁵ An weim yabuageluk Arenat yanggulnaferek. Andiba re, an nasikhe tembaga mene wurik a'nogoba ninghogo lisuageluk aren nenggi nomamet fili'lago.

³⁶ Tuhan neisena, we Harenat an hawe'ma fetnarek welagik, nagap telnafik, ikhi lagen. nen Hat homameba an agorogo fetnarek welagen, nen ap hokho inap welagaikharek andi hak Harenat an nenu werek logouwageluk hilingnobagakhi lagen.

³⁷ An aben sen nobagaluk hele wa'narek lanogoluk he, Harenat kagalnarek welagen. Andiba re an neisok taganhogo ekhe warikhi lagi mondok lek.

³⁸ An nebe nailo nen endep ekhe iget figi'lek it naselei mene omanogo muginarek lagu-lagu re inomame legetfisaluk, inebe mondogat lek agunem enek he herakfisikhi lagi.

³⁹ An nen inebe warogo hulambet fisugunem he, it inebe feisakhogo menlasu re elo'lek. Nen an neiso'ma warogo taiget fisugunem he libi lebe u re elo'legat.

⁴⁰ An weim yabuageluk Harenat nomame wo'neti lagen, nen it naselei mene inoba nen an nomame wereget nobagakhi lagen.

⁴¹ It naselei mene omanogo an were'ma nen loageluk Harenat hilingnobagakhi lagen, afuni an nebe inabit mene re an nen mondogat legetfisikhi lagi.

⁴² Iren inane humeri'lagwi, oba nen he aben ekhe leberisili'lagwi lek, nen iren Tuhan oba inane yagari'lagwi, oba nen he Aren inane onggo yagaisili'lago legat.

⁴³ Wul age palogo lagarek andi hak an nen mondogat alperelogo fisikhi lagi, nen fesi ebekhe kwe werek andi hak an nen sibil sebelhogo fisikhi lagi.

⁴⁴ It afuni hat hane sagalogo hilingiri'lagwi mene andoma inoba nen Haren fikhalogo nobagakhi lagen. A'nogo nobagaluk it afuni inunggulenu amu mene, an nen ogo nonggot mene andoma, an namingmingengge were'ma, an it inobaget nenu werek logouwageluk hilingnobagakhi lagen.

⁴⁵ It afuni pok mene nen he an na'ma sebe agarek, nen, an nen yi'nogo hilingi'ni ti'nogo hilingi'ni iluk yagaisugunem he an nane hologo nek hilingiri'lagwiat.

⁴⁶ It inailo lekhogo hilingitarek mene a'nogo mondogat lek agunem he, inoak leikhogo re it mene inawi sili eroma a'nogo nen wulifarek.

⁴⁷ At Tuhan he eluk mondok welagarek mene o! An nili wo'naferek mene o, At enek fogerati logouwok! An neisena nagap telnaferek mene, Allah andi nek fogerati logouwok!

⁴⁸ It afuni an naselei mene fikhit maben aga logolik an nalong asuageluk Arenat hilingnobagaikherek. An nelokhoma nen Aren yi afuni ti afuni inunggulenu lombok omanogo mondogat sebel fisikhi logolik,

⁴⁹ an enek he it naselei mene omanogoba nen Aren nagap telogo nobagali'lago. Tuhan neisena, it afuni an naselei mene were'ma nen Harenat an nalonget nobagakhi lagen. It ap inobabut mondok haferek mene inoba nen Harenat an hawea'ma nobagaluk fetnarek welagen.

⁵⁰ Andiba re it afuni inunggulenu lombok welagaikharekwe andoma Hat henu nek sagarik laga logogun, nen Hat hobaget wuni fogethafu awuni nek wulakfuluk fogethafi logogun.

⁵¹ At Allah nen raja menfakhasikhe meneba re omame hokho mene wogeri'lago, Aren ap wenagaisogo menfikhe mene andi re endawi hundik anggikherek mene hilingi'mo re, at Daud inom at ambisangmangge mene inom mondok-mondok faget a'nogo nek hilinginafu logogin.