MAZMUR 17 - Allah Wene Fano Wene Hupla Inane

Ap weak hilingitarek lek mene nen samban agarek wene

¹ Wene eberogo mene nek hilingnobagain, iluk henu hombuk palhi lagi mene andi hesanggo holnafi logoin o, Neisena Tuhan, an nendawinggen mondok pikhithogo hilingik logolik samban hoba kino yagaheti lagi mene andi re futnobagakhi logoin o.

² Eberogo wene andi re Hat mondogat helure'ma re, an nawene yi faget nili wo'nabin o.

³ Nen Hat hebe o hubanggo an nambit we'luk, an nebe hilingik welagi mene kwelakniigik, nendawimo nobabut palnafik, hilingisumo nen he, an nen nane ikhi lagi mene andoma re nendawimo nen wenggel hikhi lagi mene nek ikhi lagimo re, ap yi mondok higithogo nek hilingiri'lago mene iluk futnobagau hago.

⁴ An he it afuni nen inenggi omameba weagerinabik lagaikharek mene andi ninom sebesi laga lagi lek, meneat he Haren yi'nogo hilingi'no ti'nogo hilingi'no iluk melalnobagakhi lagen mene a'nogo nek hilingiti lagi.

⁵ An he hundik-handik Haren yaganetu mene omanogo nek hilingiti lagi, nen Hat hoba nen taganhogo wulibi laga lagi mondok lek.

⁶ Allah neisena, Hat he an nen yagaheti lagi mene andoma nane hesanggo holfuluk onggo yaganeti lagenma re, an nen Hat henu hombuk palhi lagi o. An nane ikhi lagi mene andoma hesanggo holnobagaluk he, heilenggen futnobagakhi logoin.

⁷ Afuni Hat hawea'ma kuluk were'ma ferinarek welagen mene re Harenat inagap telinafi lagen, nen Hat hera'lu andoma re it inaselei mene faget inailo lek engge were'ma re, Haren mondok elalinhogo Hendawi hundik hilingninafi lagen mene andi inuknisan o, neisena.

⁸ An nebe Hat heilenggen elonggoma mene hakhogo halnafi logoino, neisena. An he it afuni weak hilingitarek mene nen mu'niugunem he Hat hogolabi a'ma kwelaknobagakhi logoin o.

⁹ An he it naselei mene omanogo nen noasuogeluk haningisogo kwelaknabi weri'lagwi o.

¹⁰ It inebe re inendawirinafarek mene andi re mondogat inonggot, nen inane ogore foget fakhikhi logolik mondok agarek inap omanogo nen,

¹¹ an noasuogeluk we'luk haningisogo kwelaknobagaluk he, ka nen wasuok iluk ineilenggen wo'nabi weri'lagwi o.

¹² Mene singa nen warogo ninggerek mene omanogo herakfuluk haumhogo nagain iluk hilingiterek hak, athe mene singa ket souge mene nen engga a'ma hou salek wela'luk feisakhogo wulifi logolik, ebekhalem elokhe palherek a'nogo hak iren a'nogo hilingiri'lagwi andi.

¹³ Neisena Tuhan, Hat hebe feisakhogo menla'luk he, an naselei mene oma hinom wal-wal iluk it inomame legetfisikhi logoino o. It afuni weak hilingitarek mene andi nen an noasuogeluk wagunem andi, Hat henggarok oba an nagap telogo nobagakhi logoino.

¹⁴ It afuni o kweangma yoma inangge kabogetu mondok logolik werek mene andoma inoba nen fikhalogo nobagakhi logoino. Enggin fenggin it afuni andi inoba fisugu mene iluk Haren foukhogo fisegen mene a'nogoba it unggum wogisikhi logoino o. Nen, it inagainafuri inom, inombawi iren taginabugun mene inom ogo a'nogo nek unggum inoba fikhi logoino aro.

¹⁵ Oba nen he, an enek he weak hilingiti lagi le'ma re, Hat hebe neilenggen heagain o. An nebe nogokhi lagiba nen neluk a'luk he, Hat hebe ninom hundik welago mene andi faget ebethealuk he, nendawimo nagaiyek mondok aga lagi o.