MAZMUR 16 - Allah Wene Fano Wene Hupla Inane

Inendawimo nen eberogo anggikhi logolik samban agarek mene

¹ Allah neisena, an he Hat hawea'ma kuluk welagimo re, kagalnarek logoin o, neisena.

² An nen ikhi logolik he, ”An nendawimo nagaiyek mondok hikhi lagi mene andi re, we neisena Tuhan Hat enek welagen, nen Hat welagen mene andi hambolkwe taganhogo werek mene ekhe werek lek, neisena,” iluk ikhi lagi.

³ An nen Hat hagainafuri o yoma tegelogo fakhaluk welagaikharek mene oma agaukhogo yagaisigirek. Nen an nebe it ninom werek aple andi re nendawimo nagaiyek hokho mene welagi.

⁴ Afuni ekhe nen, tugwi kembu fogeratu werek mene andi re inendawimo heiselek mene ekhe inomat heisel aga logouwak. An he yi mene ti mene tugwi kembu faget waretu aple re nabit, nen it inenu hombuk palhu aple ogore nabirat.

⁵ Tuhan Neisena, an nebe re Hat mene welagi. Yi mene ti mene an nelokhoma lek mene re Haren wo'neti lagen, an nebe re Hat henggiba welagi.

⁶ Haren wo'neti lagen mene andoma re mondok fano mene nek wo'neti lagen, an nendawimo nagaiyek mene nek hilingnobagakhi lagen.

⁷ Neisena Tuhan nen komotnafi lagen andi nen, an nen fogethafi lagi. An nebe o hubanggo mene ogo re menenei ebeti logolik, an nonggwarek nendawinggenma nen komorikhi lagi.

⁸ An he Tuhan oba eberek mondok welagi. At ebe an nera'lu mondok were'ma re, an nabolok u lek hak.

^9-10 Andi nen he afuni Hat hendawi hundik mene, alomat lasuak anggigi'lek, wa'lasuageluk herakfisigi'lek hilingiti lagen andiba re, an nendawimo nagaiyek anggikhi logolik, wuni wati lagi. Nebe fano logolik, hambukhogo mondok welagi.

¹¹ Haren he an kwe ineluk mondok logouwageluk lagaikharekwe yaganeti lagen. Hat helokhoma an nendawimo nagaiyek hokho pokhorogo hikhi logogin mene inom, nen Henggi ebekwe re mondok fanorogo logouwageluk inom hilingnobagakhi lagen.