MAZMUR 15 - Allah Wene Fano Wene Hupla Inane

Afuni Tuhan awi wuri'mo fano logogun mene faget wuni watikhe wene

¹ Tuhan neisena, Hat hawi su mene wuri'mo andoma sani elok ku hak nogo, Hat honggwarek Handom Horek meneba andoma, sani elok logou hak nogo?

² It afuni andi inebe re, weak hilingiti'legengge fano nek hilingiti logolik, inendawinggenma higithogo wenggelharek meneba, inane eberogo mene nek agarek mene inom,

³ it inerugi inagaila'lak wene inoba le'maat, ineranen wene inoba fagarek lek mene inom, inerugwi inagaila'lak weagarinafarek lek mene inom, Afuni inom welagaikharek mene inenu weak hilingisogo fisagarek lek mene inom,

⁴ afuni Allah nen abit isikherek mene, inendawimo seramet fisagarek mene inom, A'nogo meneat he, afuni Allah inailorogo hilingitarek mene inom, agaugwerinafarek mene inom, ”Ti mene wokhesigin,” iluk Allah enu hombuk palogo wene warisagarek mene inom, ”Nit mene alomat laga,” iluk anggigi'lek, ebe tiphogo nek hilingitarek mene inom.

⁵ Uang it ekhe elama faget wogisaluk, ”Amingmingengge ekhe inom seberogo wo'nisani,” iluk agarek lek mene inom, It ekhe weak hilingiti'lek mene inoba it andi wene inoba fouwagaluk onggo palek nenggarek lek mene inom, Afuni inobabut a'nogo hilingitarek mene andi re, hobuk weak inoba agi'lek wurep oba re, fano mondok logogun o, iluk wuni watikhe.