MAZMUR 149 - Allah Wene Fano Wene Hupla Inane

Tuhan fogerasuok!

¹ Wuniba Tuhan fogerasuok! At Tuhan faget wuni ket mene wa'ni! Afuni At againafuri andogore'ma andoma nen At fogera'ni!

² Yago, hit Israel mene yi, hinebe elalhinafikhe mene andi faget hinagaiyege'ni, Nen hit afuni o Sion welagep mene yi re, hit hinoe raja andi faget hinanggilukhogo fogera'ni o!

³ Mulugeti logolik At enu fogera'ni, hiren no kecapi inom, rebana inom oba fogera'ni!

⁴ At Tuhan nen he againafuri faget endawimo agaiyek anggili'lago, Aren he afuni inendawinggen sebelfakhagarek mene inoba re inenu werek mene hilingfisikherek.

⁵ It Allah againafuri nen he At ebe legeisogo fikhi logolik fogerati logouwak, nen hup inukhogo andoma re inagaiyek oba nek hilingiti logouwak.

⁶ Iren inane fetakhogo nek Allah fogerati logouwak. Inenggiba karok enggat merengsek mene fisogo welagik,

⁷ it afuni inunggulenu amu mene omanogo onggo inoasugun iluk, it ineisok erokwe mene inom, inunggulenu mene inom, enggin fenggin inoba fogoin iluk hilingitik,

⁸ nen it ap raja-raja omanogo inom, it inogogwi inenuwerek omanogo inom posiemanggen oba hele warinabugun iluk hilinginafik,

⁹ nen At Allah ane melalek oba it inunggulenu ekhe mene ekhe mene omanogo unggum inoba fogoin iluk hilingitik, hilingiri'lagwi andi. It At againafuri endawi hundik hilinginaferek mene inoba inomamet fikherek he a'nogo andi o. Allah fogerasuok!