MAZMUR 148 - Allah Wene Fano Wene Hupla Inane

Pogot inom kweang inomen Tuhan fogera'ni!

¹ Hit pogot elonggoma welagep mene andoma monogaren he Tuhan fogera'ni! Nen hit hinebe legoma welagep mene andoma nen he Tuhan fogera'ni!

² Hit Allah agoromi malaikat en inom, Hit tentara pogoroba mene hinebe mondogaren inom, At fogerati logoino.

³ Hit mo inom, tugi inomen he, Arenek fogerati logoino. Hit hesagal liati lagep mene andoma nen he, At ebe fogerati logoino.

⁴ Hat pogot legoma welagen mene nen he, Allah fogerati logoino. Hit i pogot ambolkwe welagep mene nen he, At fogerati logoino.

⁵ Hit mondogat Allah aneba, hinebe elalhinafikhe andi nen he, hiren Tuhan enu nek seralhi logoino.

⁶ Aren hinobalik lombok hinobagasikhe, inobalik tomok fesikhe mene andi re, legagi'lek etok mondok logogin.

⁷ Hit kweangma welagep mene nen inom, hit yi kisu ti kisu i laut yenggele'ma welagep mene enu Naga nen inom, i laut uan yenggelek mene nen inom, mondogaren he At Tuhan enek fogerati logoino.

⁸ At Tuhan ane ugunem, sogoi aninirogo funha wagarek mene inom, eilabut inom, meiso sogenggen mene inom, salju inom, ohena inom,

⁹ nen hit tom uandek mene inom, horoktek mene inom, e enggen iterek mene inom, enggen iterek lek mene inom, mondogaren he Arenek fogerati logoni o.

¹⁰ Hit yi wam ti wam, yi maro ti maro, yi kisu ti kisu, yi rue ti rue,

¹¹ hit ap hinenupogot mene inom, hit afuni hinunggulenu lombok kain welagep mene inom, hit ap kaindegen tagongge mene inomen he, Arenek fogerati logoino.

¹² Hit ap alage mene inom, helime inom, hit hinaluendek inom, yenggerugwi inom, mondogaren he hineisena Allah fogerati logoino.

¹³ It ap inenupogot ekhe inenu lek hangge werek kwelek, At Allah nek he enu werek logolik, pogot inom, kweang inom At enggiba welagarek, andi nen he hit hinebe mondogaren At enu nek, seralhi logoino.

¹⁴ Aren he againafuri inunggulenu At onggwaregen mene omanogo inoba inomamet fesikhemo re, andiba At againafuri Israel endawi hundik mene a'nogo nen At obaget fogeratu mondok logouwak. Tuhan fogerasuok!