MAZMUR 145 - Allah Wene Fano Wene Hupla Inane

Allah fogeratikhe wene

¹ Daud en wuniba Allah fogeratikhe mene. Allah neisena, Hat he Raja an neisena welagenma re an nen legeisogo hobagakhi logogin, Nen Hat hobaget mondok-mondok andoma fogethafu logogin.

² Linggene hundik-handik andoma an nen Hat hai wathafu welagik, Nen nenggi mondok-mondok andoma Hat henu seralhu welagik, ikhi logogin.

³ At Tuhan andi ebe re mondok lego mene were'ma enu mondok legeisogo fagarek andi nen he, At andungdang werek mene andi re it ekhe nen iliresumo re elo'lek.

⁴ It afuni hobuk ta'larik laga logogun mene andoma nen he, Haren ekhe mene ekhe mene hilingitigin mene andoma faget fogothafik, Haren elalin hilingisu lek mene hilingitigin mene andoma faget fakhogo yagaisigik, ikhi logogun.

⁵ Hat hebe fogethafarek awene andi inom, esinet hafarek awene andi inom yagaisilik laga logogun. Elalin inailo mene hilingitendek awene andi re, an nen he oba ebetu mondok logogin.

⁶ Haren wesa polanhogo hilingiti lagagin mene andoma re iren tindelhi logogun o. Nen homamerogo hilingiti lagagin awene andoma re, an nen yagaisikhi logogin aro.

⁷ Hobabut fano nen hilingitendek awene andi faget afuni nen tindelogo yagaisilik laga logogun. Higithogo hilingitendek awene andi faget a'mit suphogo wuni wati logogun.

⁸ Nineisena Tuhan andi re, endawi hundik mondok logolik, ninelagaik were'ma endawit ninaferek mene. Aren weak-weak wene ninoba figi'lek, endawi hundik hilingninaferek.

⁹ Hat he, afuni inebe lombok endawi hundik logolik, yi mene ti mene elalogo fesikhe mene mondogat endawinggen hundik welagaregat.

¹⁰ Tuhan neisena, yi mene ti mene elalinafigin mene andoma mondogaren he, Harenek fogethafu mondok logogun. It Hat hagainafuri mondogaren he, Harenek legeisogo hobagakhi logogun.

¹¹ Hat hebe Raja logolik halong welagen mene andi faget iren legeisogo hobagakhi logogun, nen hanggiluk welagen mene andi faget tindelhi logogun.

¹² Nen Haren hilingitigin mene andoma re mondok hokho mene hilingitiginmo re, o kerajaan Haren mene andi re mondok ombak-bak hilingi'mo anggiluk werek andi nen he it afuni mondogen inelu aga logogun.

¹³ O kerajaan Haren ferinarek logogin mene andi re yi tahun ti tahun mondok-mondok logogin mene werek. Inebe hobuk ta'larik laga logogun mene re, Hat henggiba nek ferinarek mondok logogin. Nineisena Tuhan he, Aren wene wa'nisasikhe mene a'nogoba nek tiphogo hilingiterek. Aren yi'nogo ti'nogo hilingiterek mene andomaba re endawi hundik mondok welagarek.

¹⁴ It afuni enggin-fenggin inoba were'ma, At Tuhan nen leberisikherek. It afuni sebelek hak werek mene re Aren legeisogo fisili'lago.

¹⁵ Yingge-tingge ineluk welagaikharek mene omanogo nen nunggu mene wo'nisoagen iluk Hat hoba nek eberek were'ma, Haren it inamburu wogisa higit obaat wogisikhi lagen.

¹⁶ It inoba inangge yi mene ti mene lek were'ma, Hat henggiba wogisugunem iren inelagaikhogo ekhe welagaikharek lek.

¹⁷ At Tuhan andi re Aren hilingiterek mene andoma mondok katokhogo nek hilingiterek, Aren yi'nogo ti'nogo hilingiterek mene andomaba re endawi hundik mondok welagarek.

¹⁸ At he afuni At enu hombuk palharek mene inom, nen inendawinggen sebel fakhaluk kino yagatarek mene inom, inoba horokhogo werek.

¹⁹ Aren he it afuni At oba inailorogo welagaikharek mene inoba re, inendawimo agaiyek mene hilingfisigik, iren inane hombuk palhu mene esanggo holhik, inebe telogo fisigik, ikherek.

²⁰ It afuni At oba inendawi hundik werek mene re, Aren kagalinarek werek. Oba nen he, afuni inobabut weak mene re inebe leget fisikherek.

²¹ An he neisena Tuhan fogeratu mondok logogin. Yi mene ti mene eluk werek mene andoma mondogaren he Tuhan enu horek mene andi nek fogeratu mondok logouwak, iluk wuni watikhe.