MAZMUR 143 - Allah Wene Fano Wene Hupla Inane

Lebetninabuageluk samban agarek wene

¹ Daud awuni. Tuhan neisena, an nen samban ikhi lagi mene andi hesanggo holnabin o, an nen kino yagaheti lagi mene andi faget futnobagain o. Haren mondok tiphogo nek hilingiti lagen mene a'nogoba onggo yaganom, Haren katokhogo nek hilingiti lagen mene a'nogoba samban ikhi lagi mene tip ikhi logouwak.

² Nit afuni re Hat helokhoma weak hilingiti'lek mene ekhe logou lek hak hilingi'mo re, An hamingmingengge yi re wene noba mene ero pilingnabu fugo,

³ It naselei mene nen an si'narek mu'narek nikhi logolik nomame leget nobagali'lagwi andi, nen iren an nebe hele warogo fisagarek oba mondok mumse'ma omanogo nobagagunem he, an nebe ap attak wa'lagaukwa mene omanogo hangge hilingla'luk welagi.

⁴ An nagaiyek werek mene a'nogo mondogat pugunem he, nendawinggen nonghong ugunem welagi.

⁵ An nen nenggi attak welagagi mene omanogo faget ebethigik, Haren hilingitigin mene omanogo faget ebethigik, Hat henggiba nen elalhigin mene omanogo faget menenei ebetik, hilingiti lagi.

⁶ An nenggi earogo liabek logolik he Hat hoba samban ikhi lagi, Kweang iringi'mo i nelerogo welagaikharek andi hak Hat hobaget an nendawimo re andi higit welagi.

⁷ Tuhan neisena, an noba mondogat song ikhemo re, Haren onggo weak-weak yaganomo. An nebe ap wa'la'luk lagaikharek oba omanogo pi lagi hanogoluk, Hat hebe an noba nen hina'lasu fugo.

⁸ An he Hat hoba nek nendawi eberek welagimo re, o hubet ekhe sambul-ekhe sambul andoma Haren hendawi hundik hilingnafi logolik welagen mene andi faget ebetniikhi logoino. An nen samban Hat hoba yagaheti lagi andi nen he, an kwe loageluk Haren yaganeti logoino.

⁹ Tuhan neisena, an he Hat hawea'ma nagap telek logouwageluk hoba lombo iwaga lagi o, it naselei mene andoma inoba nen fikhalogo nobagain, neisena.

¹⁰ Hat hebe re an neisena Allah hilingik welagenma re, Hat hendawimo hagaiyek anggikhi lagen mene andoma nek hilingiti logouwageluk yanggulnafi logoin. Hat Hareagun fano mene andi nen an kwe lioksekwe loageluk wo'narek laga logoin.

¹¹ Tuhan neisena, Haren wene watnisasigin mene higithogo telnabin o, Haren fano hilinginafendek mene a'nogoba an enggin-fenggin noba agama welagi mene yi lologo nobagain o.

¹² Hat hendawi hundigen hilingnafi lagen mene andiba it naselei mene andoma mondok warogo lakfisan o, an he Hat hamingmingengge hilingik welagimo re it an sebelogo nobagali'lagwi mene andoma mondok legetfisano.