MAZMUR 142 - Allah Wene Fano Wene Hupla Inane

Lebetninabuageluk samban agarek wene

¹ Wuni at Daud en ebe helep oumo logolik yanggulinafikhe mene.

² An nen nane mondok omamerogo Tuhan oba kweti lagi o, nane hafeba Aren lebetnabuageluk yagati lagi.

³ At elokhoma nen he neneik yabati lagi, an nen enggin-fenggin hikhi lagi mene omanogo mondogat At oba yagati lagi.

⁴ An noba lebelek agu sambul he an nen hilingisigin mene Hat mondogat helu welagen. Ebekwe an lagain iluk hilingiti lagikwe omanogo it naselei mene nen linglong an nobaget hele yebet fili'lagwi.

⁵ An nera'lukwe neilenggen furogo kumuthugunem he, an lebetnea mene ekhe werek le'ma hikhi lagi. An nebe telogo nobagagu mene ekhe werek legat, athe an nebe hilingik welagi mene faget kwelakniugu mene ekhe werek legat.

⁶ Tuhan neisena, an nen we Hat hoba nek henu hombuk palhu mondok welagi, Hat hawea'ma nagap telek welagi, an nebe neluk logolik oba ya re Hat hebe ninom logogun andi nek namolo welagi.

⁷ An noba enggin-fenggin hikhi logolik henu hombuk palhu welagi mene andi futnobagain o. It naselei mene andoma re inomame mondok hokhore'ma re, it inoba nen telogo nobagakhi logoin o.

⁸ Haren fanot nobagakhi lagen andi nen he, An hele warek welagi mene a'nogo Haren lologo wulak nobagagin halok, andiba it Hat hagainafuri andogore'ma omanogo inanggele'ma nen Hat henu nek fogethafu mondok logogin o.