MAZMUR 141 - Allah Wene Fano Wene Hupla Inane

Hubanggo samban agarek wene

¹ Daud awuni. Tuhan neisena, an nen Hat henu hombuk palhi lagi andi nen he, weak weakhogo lebetnabime! An nen Hat hoba wolhafu halok he nane hesanggo holnabino.

² An nen samban ikhi lagi mene andi re amben fanongge dupa Hat hobaget wokhetu mene hakhogo wanino, nen nenggi earogo liabek welagi mene andi re hubanggo Hat hobaget warogo nolhu mene hakhogo hilingi'no.

³ Tuhan neisena, nambeba kagalnarek logolik, nambe pum oba heilenggen abirogo kumutnarek logoino.

⁴ An nendawimo nen weak hilingisu mene hangge hilingnabi'lago mene andi re, an nelokhoma nen waganogo yatma lakfisikhi logoino. An it ap inobabut kwanirogo hilingiri'lagwi mene ninom sebe'luk, it inaseni isagoma ninom noageluk oboget nea fuk.

⁵ Ap fano mene ekhe nen an nenggali warogo nobagaluk, endawi fano nen komotnafu halok, andi faget an nendawimo nen he amusu fano mene hangge anggikhi lagi. Iren ina'mageba hilingiri'lagwi mene andi faget he hundik-handik samban ikhi lagi hilingi'mo re, andi faget an nen herak fou lek hak.

⁶ It inogogwi inalong werek mene nen helep eil silipnorekwe andoma pile pelaginabi lelepma nen he, an nen nane ikhi lagi mene andoma eberogo angga hak.

⁷ Helep misik ekhe wolelenggenhogo kweangma pelafarek hak, it inoak ogo afuni warek salinafarek oba era'lukwe andoma tamulogo pelabi lagain.

⁸ Oba nen he neisena Tuhan Allah, an he nendawinggen Hat hoba eberek mondok welagi, Nen Hat hawea'ma nagap telek welagimo re an wa'lasuageluk oboget nea fuk.

⁹ Afuni nen hele an nobaget wephogo fagarek mene andomaba nen inom, nen sapna it ap inelouk inaben legetarek mene andomaba nen inom, nagap telogo fetnarek logoino.

¹⁰ It andoma re inonggwaregen hele yepsek mene andomaba ke'nok ikhi logouwak, oba nen an enek he nagap telek logogin fano.