MAZMUR 14 - Allah Wene Fano Wene Hupla Inane

Afuni nen weak hokhorogo hilingitarek wene

¹ Afuni inobabut kembu mene inendawimo nen he, ”At Allah ebe re werek lek,” iluk anggikhi logolik he, inobabut weak mene nek hilingitik, ina'meilo mene nek hilingitik, hilingitu logolik he. Fano mene ekhe hilingiterek mondok lek.

² Tuhan ebe pogoroba nen afuni inobabut hebelek logolik At ebe fogeratarek mene ekhe werega lega iluk pelaginarek logolik eil woginaferek.

³ Meneat he, afuni mondogat inobabut fano hilingitarek mene herakfuluk kwanirogo wilipluk he, weak mondok hilingitarek. Fano hilingiterek mene ekhe werek mondok lek.

⁴ Tuhan nen yagaisikhi logolik mel isikhe, ”Hit afuni weak hilingiti lagep mene yi, hinobabut hebelhi lagep lek yi nenahalok? Hiren he an nayonggo figi'lek logolik, sumburu haumhogo nenggarek andi hak an nagainafuri weagerinafu welagebo,” iluk wenagisasikhe.

⁵ At nineisena Allah nen he, at againafuri ane hologo hilingitarek mene it fanorogo ferinarek welagarek andi nen he, afuni weak hilingitarek mene andi re, hobuk inailo mondok asugun.

⁶ Afuni weak hilingitarek mene nen he, it afuni inelagaik mene nen hilingitarek mene omanogo kwe palogo fisagarek. A'nogo hilinginafarek meneat he, At Tuhan nenat, inebe at awe a'ma fisikherek.

⁷ Nineisena Allah o Sion we'luk, At againafuri Israel mene telinabi waga logouwago. At Tuhan nenat, afuni Yakub en tagongge mene it attak fano welagaukwa hak hobuk inebe fanorinafunem, inendawimo nen mondok inagaiyek asugun o.