MAZMUR 139 - Allah Wene Fano Wene Hupla Inane

At Allah nen yi wene ti wene elu mondok logolik, tegelinaferek wene

¹ Afuni nen wuni wulak fuluk inebe seberogo ugunem yanggulinafarek mene faget, at Daud awuni. Tuhan neisena, Hat he an nebeba futnobagaluk, an nebe helu mondok welagen.

² An nobabut hilingitirek mene mondogat he Hat helu welagen, Hat hebe yatma nen he, an nen ebetirek mene futnobagakhi lagen.

³ Yabu hilingitunem inom set walugunem inom, heilenggen kwela'narek welagen. An yi'nogo ti'nogo hilingitunem, Hat he helu mondok welagen.

⁴ Nane oan igi'lek werek kwelek ogore, igin mene heluat welagen.

⁵ An nabel fena-fena mondogat he Haren enek haningisogo kwelaknarek welagen, Nen Hat homameba nagap lelogo fetnarek welagen.

⁶ Haren yi wene ti wene mondok elonggoma mene helu welagendek mene andoma re, an nen futfoumo re mondok elo'lek, an nendawimo nen wenggelhamo nen ogore wenggelogo lalek hak.

⁷ An nen ikhi logolik, ”Hat homame hokho andiba, fetnarek logogin lek,” iluk a'nogo igi halok, an heise koma lagain nogo? Hat hebe herakhobagaluk an heise re koma lahak nogo?

⁸ An heise pogoroba lagagin halok he, Hat hebe andoma were'maat. An nebe afuni wa'la'luk lagaikharek oba andoma nogo ilagain halok ogo, andoma Hat hebe were'maat.

⁹ Nen an nebe tarogo mo wulibi wagarek fikhit lagain halok ogo, athe, i laut yenggelek esanggoma, o mo kwikherek higit yatma andoma lambik, nawi wurogo logogin halok ogo,

¹⁰ an nebe andoma were'ma, Haren an lebetneagainat, Henggi ebekwe nen wo'narek laga logogin.

¹¹ Nen an nen o mum mene nen salnabi wesuageluk yagasigin halok inom, nen an nera'lukwe selek logogin mene a'nogo o mum mene nen sali wesigin halok inom,

¹² Hat helokhoma o mum andi mene sali wesumo re elo'lek. O mum asigin mene a'nogo o linggene higit selegasigin. Nen o mum andi inom selek andi inom Hat helokhoma re higit enek werek.

¹³ An nebeba nelonggoma werek mene mondogat he Harenat elalnafigin. An nagaisa alabutmo oan werek kwelek nafe halogo nobagasigin.

¹⁴ Hilingisu elo'lek mene, elalin mene hilingnafigin. Haren hilingiti lagen mene andoma re, mondok inailo asu hak mene iluk an arat futfigirik, hokhorogo fogethafi lagi o.

¹⁵ Nagaisa alabutmo nen he, nebe elalnafi logolik he, noak ebe hunhigik, tegelogo elalnafigin. Nafe halogo nobagasiginmo, hinagoma logolik nalue agagi. A'nogo meneat he, Hat heilhanem enek he weinam welagagi.

¹⁶ An nagaisa alabutmo nen, nebe oan werek kwelek, Hat heilenggen neasigin, An hilingnafigin mene andoma mondogat he, Hat hambuku ba lisu palogo fesigin. An nebe elalnafi'lek logolik, An neluk ti huli nen logogin iluk andi re Haren yi mene ti mene misik iluk ogo oan elalhi'lek logolik mondogat wenagaisogo fesiginmo welagi.

¹⁷ Eige, neisena Allah, Hat hendawimo ebeti lagen mene andi re, an nen ebesu elo'lek mene ebeti lagen o. Haren anggikhi lagen mene andoma re, nenggi wenasu mondok elo'legaro.

¹⁸ Nen wenasumo nen he, ial he we endep hangge oba nen he Haren ebeti lagen mene andi re mondok hokhorogo hilingik. Nen an neluga'luk mene ogore Hat hoba ebetu mondogat welagi andi.

¹⁹ Afuni weak hilingitarek mene andoma, neisena Allah Haren inebe legetfisagain halok he an namolo o. Afuni inamep wulagaisogo inoatarek mene andoma re yatma mondok lakfisano.

²⁰ Iren habok ikhi logolik, ”At weak ikherek,” iluk, ineranen wene mondok agarek. Hawi kota enu igisogo, ineranen wene hombuk palharek.

²¹ Neisena Tuhan, afuni Hat hoba inabit mene re, an nen nabit isigirek. Afuni Hat hane oak sagali'lagwi mene re, an nendawimo weak aga lagi.

²² It ariginik mene andi re napsiri mondok isigirek, an nen he naselei mene hangge anggikhi lagi.

²³ Allah neisena, an nendawimo kwelaknealuk he, fanorogo peneti logoino. An nobabut palhi logoino Nendawimo ebetirek mene, Hat helurogo logoino.

²⁴ An noba weak mene ekhe werek halok, Haren heilenggen nealuk he, ineluk mondok welagaikharek oba louwogoluk lagaikharekwe wo'narek laga logoino, iluk wuni watikhe.