MAZMUR 138 - Allah Wene Fano Wene Hupla Inane

Hai wati logolik samban agarek wene

¹ Daud en isikhe mene. Tuhan neisena, an he nendawinggenma mondogaren he Hat enek hai wathafi logogin. It kembu dewa inelokhoma andoma nen, An he Hat hobaget wuni fogethafu awuni ikhi logogin.

² Haren tiphogo nek hilingiti logolik hendawi hundik hilingninarek welagen mene andi faget he, an nen Hat henu fogethafi logolik, Hat hawi Mondok fano Horek oba andoma fikhit liago logolik neindep awi yagaisogo fogethafu welagi. Haren he afuni nen Hat hebe faget ili'lagwi mene andoma re sebelek hak hilingfisaluk, Haren wene warogo isigin mene andi faget enek he lego hangge anggikhi lagen.

³ An nen Hat hoba nane kwetunem he, Haren hane onggo yaganeti lagen, Haren an nendawinggen omamet fugunem he, an nailo lek mene aga lagi.

⁴ Tuhan neisena, Haren wene wa'nisasigin mene a'nogo re, it inesanggo mondogat holha andi nen he it ap raja-raja o kweangma yoma werek mene mondogaren he Hat foget habugun o.

⁵ Iren he Haren elalin mene hilingitigin mene omanogo faget inom, Hat hebe esinet hobagaluk agaukhogo fogothafarek mene a'nogo faget inom wuniba fogethafi logogin.

⁶ Hat hebe lego mondok logolik hokho hagun welagen, oba nen he it mondogat sebelek mene re Haren futfisikhi lagen enek, ap wonoget fakhagarek mene re Hat helokhoma nen hina'lasu lek hak.

⁷ An noba enggin mene asi wagunem, Haren enek an neluk logouwageluk henggi pukhogo fetnarek welagen. It naselei mene inanini noba fugunem he, Hat homameba nek an nagap telogo nobagakhi lagen.

⁸ Haren an wene watnetigin mene a'nogo higithogo tibet fikhi logogin, it Hat hagainafuri mene inobaget hilingiri'lagwi mene andoma palfou fuk.