MAZMUR 137 - Allah Wene Fano Wene Hupla Inane

O Babel i aikwe logolik, le aga lagaukwa wene

¹ O Babel oba andoma i lagarek mene esanggokwe nit ninebe andoma hu'lasi laluk, ninawi Sion oba ebethaluk he li le aga lagagu.

² O andoma e enu Gandarusa were'ma re, nit ninambinggong e andomaba kologo fuluk welagagu.

³ A'nogo were'ma it afuni nit hele warogo wo'ninarek lagaukwa mene nen, wuni it faget wasuagaluk yaganisikhi lagaukwa. It yi enggin ti enggin ninoba fikhi lagaukwa mene omanogo nen he, inendawimo inagaiyek hikhi logolik, wuni watarek mene niren uagaluk, mel yaganisikhi lagaukwa: ”Sion awuni andoma re, nit faget ekhe watnisani o,” iluk yaganisikhi lagaukwa.

⁴ Nit ninebe ap pok higit afuni inaiba logolik nineisena Tuhan faget wuni wasugun nogo a?

⁵ An nen hat Yerusalem hoba nonggoret hobagagin halok he, an nen wuni ekhe inom wasu lek hago.

⁶ An nen hat hoba nonggoret hobagagi halok inom, Nen an nagaiyek hoba fugu mene hilinghobagagin lek halok inom he, an nen wuni ekhe inom wasu lek hago.

⁷ Neisena Tuhan, o Yerusalem a'nogo afuni Babel mene nen sebelhunem he, it Edom mene nen mel isukwa andi, ”Meisalogo lakfisano, meisalogo lakfisano, o tik warek huli meisalogo lakfisano,” iluk isukwa mene andi re hendawimo eberek logoino o.

⁸ Hit afuni o Babel mene re, yi enggin ti enggin hilingninafi lagagip onggo, nit ninunggulmo ninobagagun mene nen, inendawimo inagaiyek asuago.

⁹ Hit hinagainafuri re, it afuni ekhe mene nen woginabimbik, punu helep unggulkwe pelak fisogoin mene andoma nen, inendawimo inagaiyek asuago. iluk wuni watukwa.