MAZMUR 136 - Allah Wene Fano Wene Hupla Inane

Hai watarek awuni

¹ At Tuhan he fano agun andi nen he Arenek hai wati logouwok. Endawi hundik hilingninaferek mene andi re mondok-mondok logogin mene.

² Allah Lego Mondok welagarek mene andiba hai wati logouwok. Endawi hundik hilingninaferek mene andi re mondok-mondok logogin mene.

³ At Tuhan he mondok hokho agun welagarek andi nen hai wati logouwok. Endawi hundik hilingninaferek mene andi re mondok-mondok logogin mene.

⁴ We Arenat hilingisu elo'lek mene mondok hokho mene hilingiterek, Endawi hundik hilingninaferek mene andi re mondok-mondok logogin mene.

⁵ Aren endawi wenggelek oba nek pogot elalhikhe, Endawi hundik hilingninaferek mene andi re mondok-mondok logogin mene.

⁶ Aren kweang ari i amboloba talogo fesikhe, Endawi hundik hilingninaferek mene andi re mondok-mondok logogin mene.

⁷ O pogoroba ombak-bak eterek mene andoma re Arenat elalogo fesikhe. Endawi hundik hilingninaferek mene andi re mondok-mondok logogin mene.

⁸ Mo re linggene faget yati logouwageluk hilingisogo fesikhe, Endawi hundik hilingninaferek mene andi re mondok-mondok logogin mene,

⁹ tugi inom hesagalenggen inom he hubanggo faget selegerati logouwageluk hilingisogo fesikhe, Endawi hundik hilingninaferek mene andi re mondok-mondok logogin mene.

¹⁰ Aren he o Mesir mene inagainafuri manggusa tago inebe pinggi inoatikhe. Endawi hundik hilingninaferek mene andi re mondok-mondok logogin mene.

¹¹ It Israel mene re Aren o Mesir en woginarek wulibi wagaikhe, Endawi hundik hilingninaferek mene andi re mondok-mondok logogin mene.

¹² Enggi omame mondok hokho meneba, Endawi hundik hilingninaferek mene andi re mondok-mondok logogin mene.

¹³ I Laut Gelagah re Arenat tulemkwe habunarogo healfesikhe, Endawi hundik hilingninaferek mene andi re mondok-mondok logogin mene.

¹⁴ At againafuri Israel mene woginarek he i palogo fena fikhit fisa lagaikhe, Endawi hundik hilingninaferek mene andi re mondok-mondok logogin mene.

¹⁵ Oba nen he raja Mesir mene agoromi tentara inom he i agumo pelaginafikhe. Endawi hundik hilingninafarek mene andi re mondok-mondok logogin mene.

¹⁶ At againafuri omanogore Arenat woginapluk o leikwe lagaikhe, Endawi hundik hilingninaferek mene andi re mondok-mondok logogin mene.

¹⁷ It ap raja-raja inalong werek mene omanogore Aren inomame legaphogo fisasikhe, Endawi hundik hilinginaferek mene andi re mondok-mondok logogin mene.

¹⁸ It ap raja-raja inenu lagarek mene omanogore Arenat inebe pinggi inoatikhe, Endawi hundik hilingninaferek mene andi re mondok-mondok logogin mene.

¹⁹ Hun Sihon raja Amori mene inom, Endawi hundik hilingninaferek mene andi re mondok-mondok logogin mene.

²⁰ Og raja Basan mene inom, Endawi hundik hilingninaferek mene andi re mondok-mondok logogin mene.

²¹ It inawi inanggweang oba a'nogo re At againafuri mene inoba wogisasikhe, Endawi hundik hilingninaferek mene andi re mondok-mondok logogin mene.

²² At amingmingengge Israel a'nogo re onggwarek mene agaikhe, Endawi hundik hilingninaferek mene andi re mondok-mondok logogin mene.

²³ Nit ninebikhit mabenet ninobagagu sambul andi re At he nit faget onggot agarek mondok lek. Endawi hundik hilingninaferek mene andi re mondok-mondok logogin mene.

²⁴ Nit he selei mene inenggiba nen fikhalogo ninobagasikhe, Endawi hundik hilingninaferek mene andi re mondok-mondok logogin mene.

²⁵ Yi mene ti mene ineluk werek mene andoma mondogat he Arenat nunggu mene wogisikherek, Endawi hundik hilingninaferek mene andi re mondok-mondok logogin mene.

²⁶ At Allah pogoroba along werek mene andi nek hai wati logoni, Endawi hundik hilingninaferek mene andi re mondok-mondok logogin mene,” iluk hai warogo wuni watikhe.