MAZMUR 132 - Allah Wene Fano Wene Hupla Inane

Tuhan Awi faget wuniba fogeratukwa wene

¹ Allah awi wuri'mo lagakhi logolik wuni watukwa awuni. Tuhan neisena, At Daud ebe inom, nen at oba yi enggin ti enggin hikhi lagaikhe mene andoma inom, haren oba ebe'no o.

² Yakub eisena Tuhan homame mondok hokho mene a'nogo nen, Hat Honggwarek henu hombuk palogo, yagahetikhe mene andi, honggorasimbik herak fugun o.

^3-5 Aren wene watheti logolik he, ”An nen Yakub eisena Allah hebe, homame mondok hokho mene, hawi hebe logogin oba oan wuthobagagi'lek logolik, an nebe naiba kwigi'lek, nebe nogo igirek oba nogo igi'lek, set walogo welagi'lek logolik, a'nogo mondok logogin o,” iluk, yagahetikhe andi.

⁶ Nit ninebe Betlehem logolik, Peti Wene Warogo wo'ninafigin iluk hilingik mene andi abok ugunem ninesanggo holhugu. Hobuk o Yaar leimo andoma were'ma niren wanhugu andi.

⁷ Nineisena Tuhan welagen oba andoma, nit wesuogoluk ikhi lago. Wesimbik, Hat welagen oba andoma, helokhoma nineindep awi yagaisogo, hai wathafik, fogethafik ugun o.

⁸ Nineisena Tuhan, Hebe siakhogo menla'luk, Hat hebe homame welagen mene a'nogo agaukhogo Peti Hawene Warogo wo'ninafigin mene andi inom, O hat Hawiba yi kwi wesimbik logoin o.

⁹ Hat hagainafuri mene re, inagaiyegen inane a'mit sup ikhi logolik, wuni wati logouwak. It ap imam en he Hat hobaget inasu fano mene labesu hak Hat hendawi hamolo anggegendek mene nek, hilingirik laga logouwak.

¹⁰ Hamingmingengge Daud alisikhogo re, Haren ap ekhe enupogot logouwagaluk, wenagaisogo menfesigin mene andi, obogerisigi'lek serogo mondok logoino.

^11-12 Haren he, Daud yagati logolik, ”Hat hamlogo ap ekhe nen, hobali'mo ferinarek logouwagaluk, enupogot menfoumo logogin o. Hat hagainafuri yi'nogo hilinginabigin, iluk wene wathisasigi mene andi, An noba lomborogo logolik, yi'nogo hilingiti logoino, iluk, komorinafigi mene andi inom, nane hologo hilingiti logogun halok, iren tagomangge mene ap ekhe hat hobali'mo, inenupogot mondok menlarik laga logogun o. Nen wene watheti mene andi, nane oak wanigin lego,” iluk hombuk palogo wene waretigin andi.

¹³ Tom Sion oba andoma Tuhan hebe logogin oba iluk, wenagaisogo fakhasigin andi nen he, wene yi'nogo waretigin andi.

¹⁴ Haren he mel isigin: ”An nebe o yoma logolik, afuni nawe a'ma fisaluk, ferinarek mondok logogin oba re,

¹⁵ it yi mene ti mene helugu mene oba heilarogo wogisikhi logogin o. It afuni inelagaik mene, inamburu An nen wogisugunem, sik-pikhogo ninggi logogun.

¹⁶ Su fano labetfisugunem, enegat isagarek andi hak, An nen it ap imam An nobaget hilingitarek omanogo nomameba telinafunem, An nagainafuri nen he, ineilenggen isaluk inagaiyegen inane a'mit suphogo, wuni wati logogun.

¹⁷ At Daud en tagomangge mene, o yoma enupogot logouwagaluk, An nen menfagain o. Ap ayonggo fagain mene andi, aren ferinarek logouwageluk An nen omamet fikhi logogin.

¹⁸ Nen o kerajaan aren melalinafi logogin oba andoma re mondok fanorogo nek logogun. A'nogo meneat he, at inom weak mene re, inenggali warogo fikhi logogin,” iluk Harenat isigin andi iluk wuni watukwa.