MAZMUR 130 - Allah Wene Fano Wene Hupla Inane

Weak hikhi logolik, Allah ayonggo fagarek wene

¹ Allah awi wuri'mo lagakhi logolik wuni watukwa awuni. An nebe kiling elema hangge weak mondok hikhi logolik, neisena Tuhan henu hombuk palhi lagi o.

² Tuhan neisena, an nane hesanggo hol nabimbik he an nen kino yagaheti mene andi futnobagain o.

³ Nineisena Tuhan, niren weak hilingiti lago mene andoma, hendawimo eberek mondok welagen halok he, sa hagen endawinggen sebel fakhaluk, kamo u hak nogo?

⁴ A'nogo meneat he afuni Hat hebe inailorogo, hawe a'ma logouwagaluk inaweak sebelogo leget fisugu mene andi nek he, Haren hamolo welagen andi.

⁵ Neisena Tuhan nen, ”Yi'nogo hilinghabigin,” iluk wene wa'netigin mene andi, eberogoat hilingnabigin iluk, nenangorogo eberek welagirek.

⁶ It ap hubanggo kagalek logolik, ”O weak-weak wei uwak agwi,” iluk, nenanggotu welagaikharek andi re, we endep hangge meneat he, an neisena Tuhan hobuk fano hilingnabigin iluk, nendawinggen oba nenat nenangot hafu welagirek andi.

⁷ Hit afuni Israel mene hineisena Tuhan nen endawi hundik mondok logolik, telninafu mondok welagarek andi nen he, ”Nit hobuk telninabigin,” iluk, serogo mondok logouwok.

⁸ ”Nit weak hilingitorek mene andi mondogat hele warogo fetninarek were'ma, hobuk At Allah nen telninabigin o,” iluk wuni watukwa.