MAZMUR 127 - Allah Wene Fano Wene Hupla Inane

”Allah obabut fano nen fanotninaferek,” iluk fogeratikhe wene

¹ Wuni Salomo nen watikhe awuni. O Tuhan nen wute lek mene halok he, it ap o wutarek mene andoma re yabu we alomarogo hilingitarek. Nen At Tuhan nen o kota kagalek werek lek halok he, it ap o andoma faget kagalek werek mene andoma re we alomarogo kagalek welagaikharek.

² Allah againafuri endawi hundik welagaikharek mene it inebe nogo ugu kwelek, Aren nogoin mene waganogo fouget fikherek andi nen he, it afuni ekhe nunggu mene faget herarik, hup siakhogo wulibluk he, yabu hokhorogo hilingirik nikharek. Hilingirik laga la'luk he o hubanggo kwi wagaikharek, a'nogo hilingitarek andire we alomarogo hilingitarek.

³ Nit ninagainafuri andi re At Allah nenat wo'nisikherek. At obabut fano andiba ibi-eberogo nen, onggolegat wo'nisikherek.

⁴ Ap inogogwi kaindek sikhe inenggi pagat mondok weak mene nen, togengge inenggimo herap palogo fisogo welagaikharek andi hak, ap inebe alageba inagainafuri abengge taginafarek mene andi re, andi emberek higit.

⁵ Ap ekhe againafuri ap tago inebe elok werek halok he, inendawimo inagaiyek ikhi logouwak. Ap ariginik mene andi re, afuni inom weak mene re, inanema wanharek oba andoma nen wene oba fugunem, at ebe mabenet fogoin mondok elo'lego, iluk wuni watikhe.