MAZMUR 126 - Allah Wene Fano Wene Hupla Inane

Allah nen telinabuagaluk ayonggo fesukwa wene

¹ Allah awi wuri'mo lagakhi logolik wuni watukwa mene. At Tuhan nen o Yerusalem a'nogo ambotkwe fanot fesikhemo, niren kwelakhasugu re inabi wokhugu mene hak hilingi'mo hasugu.

² Nit ninagaiyegen endo yagaisogo, wuni watu were'ma, afuni inunggulenu ekhe mene nen, ninabok ikhi logolik he, ”Ineisena Tuhan nen, it faget elalin mene ekhe hilingitemo,” iluk ikhi lagaukwa andi.

³ Eberogo nenat nineisena Tuhan nen, nit faget elalin mene hokhorogo hilingitikhe. A'nogo hilingninafemo andi nen, nit ninendawimo ninagaiyek anggikhi lago.

⁴ Tuhan nineisena, nit hagainafuri ninebe i firokse'ma meiso wagunem, i hobuk wagarek andi hangge, nit ninambotkwe fanot ninobagakhi logoino.

⁵ Afuni nen, le yagaisogo awi yati logogun mene re, hobuk iren enggen palugun sambul andi re inagaiyegen wuni warogo palikhi logouwak.

⁶ It afuni ineabumo andoma, awi yasi laga logolik le arik lagaikharek mene re, enggen paluk waga logolik he, inagaiyegen inendawimo hai hilik-hilik wagaikharego, iluk wuni watukwa.