MAZMUR 125 - Allah Wene Fano Wene Hupla Inane

At Tuhan awe a'ma ferinarek were'ma inailo lekhogo welagaikharek wene

¹ Samban ugunem lagakhi logolik ikhi lagaukwa awuni. Afuni Tuhan oba inendawinggen eberogo anggagarek mene andi re, Punu Sion hambuk lele warek were'ma abolo'lek mondok-mondok welagarek andi higit werek.

² Tom-tom andoma nen o Yerusalem haningisogo kwelabek werek a'nogo hak, At Tuhan nen it againafuri omanogo o yogondak huli nen hobuk huli andoma mondok mondogat sebelogo ferinarek logogin.

³ Afuni higithogo hilingiri'lagwi mene inanggweang oba andoma re, it kwanirogo hilingiri'lagwi mene inobabut waganogo hilingisinogoluk he andoma it mene ekhe inenuwerek logogun mondok lek.

⁴ Tuhan nineisena, it afuni fano hilingiri'lagwi mene inom, nen inendawinggen sakhorek mene inom andoma inoba Haren fanorogo nek hilingfisikhi logogin o.

⁵ Oba nen he it afuni lalogo hilingitarek mene inom, it afuni kwanirogo hilingitarek mene inom At Tuhan nen unggum inoba fagain logouwak. It afuni Hat hagainafuri mene omanogo inebeba fanorogo nek logouwak!