MAZMUR 124 - Allah Wene Fano Wene Hupla Inane

”Allah nen againafuri awe a'ma fisaluk ferinarek welagarek wene

¹ Wuni Daud en watikhe mene Allah awi wuri'mo lagakhi logolik watukwa awuni. Tuhan ebe nit werekwe a'lep lek logoumo nen he, ninggin la'lep anggegep? Hit Israel mene nen, nane wurep waganogo mel ikhi logoino:

² ”Nit ninaselei mene nen ninoasuogeluk hilingitunem, nineisena Tuhan ebe nit werekwe aga logoilep le'ma nen he,

³ it ina'mage so'le hangge hetperilepsik, ninoasuogoluk waga logolik, ninebe mondok felelenghogo ninoa'lep.

⁴ Ninaselei mene i fu wagarek hak, waga logolik, wo'ninarek lelep mene.

⁵ I fu houwakhogo wagarek hak, ninoba sagali i waga logolik, ninebe wo'ninarek lelep mene,” iluk nane wurep waganogo a'nogo ikhi logoino.

⁶ Nit ninebe ninaselei mene nen, ninoa'lepsik leget ninobagailep mene, nineisena Tuhan nen herakninobagagi'lek andi nen he, hai watu mondok logouwogo.

⁷ Nit ninebe sue hele fili'mo nen ke'nok uluk were'ma fikhalharek andi hak, nit ninebe a'nogoat fikhalogo ninobagasiginmo welago. Hele andi tekhogo telninafiginmo welago.

⁸ Nit ninebe telninabi wagarek mene andi re At Tuhan, pogot kweang elalhikhe mene andi nenat, telninabi wagarego, iluk wuni watukwa.