MAZMUR 121 - Allah Wene Fano Wene Hupla Inane

At Tuhan nen awe a'ma fetninarek werek iluk isukwa wene

¹ Allah awi wuri'mo lagakhi logolik wuni watukwa awuni. An koma nen lebe'nea wesugun? iluk neilenggen tom oba liago-liago welagirek.

² ”An lebetnea wesigin mene ebe re, neisena Tuhan, pogot kweang elalhikhe mene.

³ Aren he hat hebe waranogoluk herakhobagagi'lek, setharek mondok werek. Hat hebe waroageluk Aren oboget hiikherek lek.

⁴ It afuni Israel mene awe a'ma fisaluk serinarek welagarek mene andi ibi-eberogo nen he, nogo eil agunem nogoikherek mondok lek.

⁵ At Tuhan nen enek hat hebe kagalharek logogin, At ebe hat hoba lomborogo logogiluk hera'lu horokhogo werek

⁶ A'nogo were'ma re, o linggene mo aigen inom, hubanggo o tugi nen inom, hoba ouet hobagagin lek.

⁷ Hat hebe weaget habinogoluk, At Tuhan awe a'ma hobagaluk were'ma, heluk fano logoinogoluk setharek mondok logogin.

⁸ Hat wesigiluk wagunem inom lageluk lagunem inom Aren kagalharek logolik yogondak inom hobuk inom, setharek mondok logogin o,” iluk wuni watukwa.