MAZMUR 12 - Allah Wene Fano Wene Hupla Inane

Lebetneoageluk samban isikhe wene

¹ Afuni nen wuni wulak fuluk inebe seberogo agarek mene yanggulinafu mene faget, wuni asiok siregen felalek mene, at Daud awuni a'nogo.

² Ap hat hoba tiphogo hilingitarek mene mondogat lek agaikhama re, ap fano hilingitarek mene ekhe werek lek enggere, Tuhan nineisena Haren lebetninabin o.

³ It inebe mondogen he inagaila'lak inom lal-lal agik, inane pugun obare inagaila'lak ineranen wene lalinafik, hilingiri'lagwi o.

⁴ Tuhan nineisena, iren ap inendawi wanuogeluk inawene tindel fano agarek mene andi inom, nen inambele hokho a'luk agarek inap andi inom Haren inambele to'mot fisan o, neisena.

⁵ Iren ikhi logolik he, ”Nit ninamelinggen ninonggaregen halamo re higiro, yi wene ti wene we ninggi'nogo wene andoma mondogat he higit ikhi lagoma re amu mene nen ekhe kwe palninabu lek hago!” iluk agarek.

⁶ Oba nen At Tuhan nen ikhi logolik, ”Afuni inenggi lek mene enggin-fenggin hilingfisigik, afuni weak-peakhogo welagaikharek mene inom wene palhik, hilingfisugunem, iren ninoba fanorogo nek logoilo ago, iluk anggagarek mene andi, yogondak An nen hilinginabigiluk arat waga lagi o,” ikhe.

⁷ At Tuhan nen wene wat nisikherek mene andi re mondok omame logolik, no perak endu oba inenggi 7 nen wera'luk weak mene herakfisikhi logolik ebe mene nek wanharek a'nogo hak hilingi'mo re, niren andiba ninendawinggen tipsek logolik logogun fano.

^8-9 Ap weak hilingitarek mene re irenek yikwe-tikwe hokhorogo sagarek logolik, afuni inebe lombogen weak hilingitarek mene a'nogo faget fogeratu logolik enu liafu werek. Oba nen he nineisena Tuhan, nit he we Harenat fetninarek mondok welagenma re, afuni weak hilingitarek mene andi nen nit weaget ninobagai nogoluk Haren kagalninarek logoin o, neisena.