MAZMUR 119 - Allah Wene Fano Wene Hupla Inane

Tuhan awene melalek a'nogo, It afuni Awene melalek higithogo hilingiti logogun mene inagaiyek hikhi logogun wene

¹ It afuni nen Tuhan Awene melalek yi'nogo hilingi'no ti'nogo hilingi'no iluk palek werek mene a'nogoba nek hologo hilingiti logolik, inebeba weak mene ekhe hilingiti'lek werek mene andoma re inagaiyek hikhi logouwak.

² It afuni Tuhan nen yi'nogo hilingi'no ti'nogo hilingi'no iluk ikherek mene a'nogo higithogo hilingitik, nen inendawinggenma nen inom inebe abirengge nen inom At Tuhan ebe herasugun iluk ninghogo herakhigik, hilingiri'lagwi mene andoma re inagaiyek hikhi logouwak.

³ It afuni At Tuhan endawimo anggikherek mene higithogo welagik, nen weak mene ekhe hilingiti'lek welagik, hilingiri'lagwi mene andoma re inagaiyek hikhi logouwak.

⁴ Tuhan nineisena, Hat hawene melalek a'nogo niren tiphogo hilingiti logouwageluk wo'nisegen.

⁵ An nendawinggen hambukhogo logolik, Hat hawene melalek a'nogoba nek higithogo hilingirik laga logogin logouwak.

⁶ Nen, an nen Hat hawene melalek andomaba fifurogo hilingiti logogin halok he, an hobuk nenggali asigin lek.

⁷ Neisena Haren wene katokhogo nek tekhogo ikhi lagen mene andoma fifurogo kumut haluk he, an nendawimo mondok fanorogo logolik Hat fogethafi lagi.

⁸ An he Hat hawene melalek andiba hologo higithogo hilingiti logogin enggere, Haren an endep ekhe oboget nea fuk.

Tuhan Awene melalek oba tiphogo hilingiti logogun wene

⁹ Ap souge mene re Hat Hawene melalegen ugu mene a'nogo hologo higithogo hilingitu halok he, at ebeba weak mene ekhe agi'lek logou hago.

¹⁰ An nebe nendawinggen abirengge nen Hat hebe nelu asuageluk hilingiti lagi, Hat hawene fano wene melalogo werek mene a'nogoba nen taganhogo wulibi lagi hanogoluk heraknobagagun o.

¹¹ An nen Hat helokhoma weak hilingiti hanogoluk, Hat Hawene melalek yaganeti lagen mene a'nogo nendawimo fakhigirik welagi.

¹² Tuhan neisena an nen Hat fogethafi lagi, Hat hawene melalek menfegen mene andomaba yaganeti logoino.

¹³ Hat hawene melalek wo'netigin mene andomaba, an nambeba nen tindelhi lagi.

¹⁴ Afuni nen inangge yi mene ti mene fetaluk welagaikharek higit he, Hat hawene melalek higithogo hilingitu mene andi faget nagaiyek welagi.

¹⁵ Haren wene sikhiphogo fesigin mene omanogo an nen kumutik, nen yi'nogo hilingiti logoino ti'nogo hilingiti logoino iluk isigin mene omanogo fut figik, ikhi lagi.

¹⁶ Haren hawene melalek menfegen mene andomaba re an nagaiyek mene hilingnobagali'lago, nen Haren yaganeti lagen mene andoma an nen nonggot asigin lek.

Tuhan Awene melalek oba inagaiyek mene hilingfisikherek wene

¹⁷ An nebe neluk ekhe inom welagik, nen Hat hawene fano wene yaganeti lagen mene a'nogo hologo hilingitik, ikhi logogin nen he, Haren an hamingmingengge yi noba hendawit nabin o.

¹⁸ Hat Hawene melalek mondok wesa polan mene yaganisikhi lagen mene andi an furogo kumuthikhi logoigen he neilenggen fenggen fein o.

¹⁹ An he we elama faget o kweangma yoma welagi hilingi'mo re, Hat hawene melalek andi an nelokhoma nen hinak fugun o.

²⁰ Hat hawene melalek andi linggene hundik-handik kumuthugu mene faget he, an noba liongorogo nendawimo mondok fulung hugunem welagi.

²¹ Haren he it afuni Hat Hawene melalek taganhogo hilingiri'lagwi mene re inenggali watik, nen afuni winik-wonok agarek mene inoba re homan ikfisigik, ikhi lagen.

²² An he Hat hawene fano wene yi'nogo hilingiti logoino, ti'nogo hilingiti logoino iluk melalogo fesigin mene a'nogo hilingiti lagimo re, it afuni andoma nen an sebelogo nobagagik, inane mulmul enek noba weagerogo figik, ili'lagwi mene andomaba nen lologo nobagain o.

²³ It ap inomame werek mene nen an noasuogeluk, nanggomo palugun oba nen he, an hamingmingengge yi re Hat hawene melalek fegen mene a'nogo kwelakhikhi logolik nendawimo uanhogo ebethikhi logogin.

²⁴ Haren wene yi'nogo hilingiti logoino ti'nogo hilingiti logoino iluk menfesigin mene andi re, an komotnafu mene fesiginmo re, nendawimo nagaiyek mene nek hilingnobagali'lago.

Inendawimo nen Tuhan Awene melalek andi hologo hilingiti logoile agwi iluk anggagarek wene

²⁵ An nebe wul oba wengik welagi mene yi re, Haren wene watnisasigin mene a'nogo higithogo fano hilingisogo menobagain o.

²⁶ An nobabut hilingitirek mene fagetunem he Haren onggo yaganeti lagen, Haren wene menfesigin mene omanogo yaganeti logoino.

²⁷ Hat hawene melalek werek mene andoma an nen fanorogo futfikhi logogin nen he lebetniikhi logoino, Haren mondok elalin mene hilingiti lagen mene andoma, an nen kwelakhikhi logolik ebethikhi logogin o.

²⁸ Enggin-fenggin noba asi wagunem noba sinurogo nendawimo mondok weak welagi andi nen he, Haren hawene watnisasigin mene a'nogo higithogo nomamet nobagain o.

²⁹ Haren fano mene nek hilingnobagakhi lagen mene andiba re, an kwe kwanirek meneba la nogoluk Haren ogalnobagakhi logoin, Hat hawene melalek andi nek yaganeti logoin.

³⁰ An he hane hologo hilingiti logogin iluk wenagaisogo fakhigirik he, Hat hawene melalek omanogoba nek ebet-ebet hilingiti lagi.

³¹ Tuhan neisena, an he Haren wene yi'nogo hilingiti logoino ti'nogo hilingiti logoino iluk melalogo fesigin mene omanogo higithogo nek hilingitu welagi andi nen he, an nenggali asinogoluk oboget nea fugo.

³² Haren an wene ekhe inom futfouwageluk hilingnobagakhi lagenma re, nendawimo nagaiyek oba Hat hawene melalek a'nogo furogo hilingiti logogin.

Wenggelhu mene wo'nesuageluk samban agarek wene

³³ Tuhan neisena, Haren wene tekhogo unggul warogo fesiginmo werek mene andi an nen o wurep kobokhogo andoma higithogo nek hilingiti logoiyogen he, Haren yaganeti logoin o.

³⁴ Hat hawene melalek andi an nen hologo hilingiti logolik, nendawimo amu mene ekhe eberek legengge hilingiti logoigen he, Haren nendawinggen wenggelek mene hilingnobagain o.

³⁵ Haren yi'nogo hilingiti logoino ti'nogo hilingiti logoino iluk yaganisikhi lagen mene andi re, an he mondok namolongge hilingi'mo re, an nen ninghogo fisogo logou hago.

³⁶ An nenggi werek agu mene andi re we sebelek hak hilingik kwelek, Haren yi'nogo hilingiti logoino ti'nogo hilingiti logoino iluk komotninobagasigin mene andi nek hologo hilingiti logogin nen he, nendawimo omamet nobagain o.

³⁷ An nen wene tulemat mene omanogo faget murok lagalagi hanogo re Haren kagalnarek logolik, an nebe Hat hendawimo anggikhi lagen higithogo logouwageluk hilingnobagain o.

³⁸ Haren wene warogo ap Hat hane hologo hilingitarek mene inoba wogisasigin mene a'nogore, an hamingmingengge yi noba nomamet nobagakhi logoin o.

³⁹ Hat hawene melalek andi re mondok fano mene hilingi'mo re, it afuni an sebelogo nobagali'lagwi mene inoba nailo welagi mene andi re yatma lakfisan o.

⁴⁰ Haren wene tekhogo fesigin mene a'nogo nek hologo hilingiti logogin iluk nendawimo omamet figimo re, Haren neluk ket mene wo'nomo.

Tuhan Awene melalek oba eberek logolik welagaikharek wene

⁴¹ Tuhan neisena, Haren an hendawi hundik hilingnafi lagen mene andi inuk nean o, Haren wene watnisasigin higithogo nagap telnabin.

⁴² An he Hat hane palek a'nogoba tiphogo hilingiti lagimo re, andiba it afuni nen an inabiret nobagainogo re, onggo yagaisikhi logogin.

⁴³ An he Haren wene tekhogo isigin mene a'nogoba nek nendawinggenma eberek welagimo re, an nen nane eberogo mene nek ikhi logogin nen lebetnean o.

⁴⁴ An he nenggi mondok-mondok andomaba, Hat Hawene melalek a'nogo nenggi pukhogo fisogo logogin.

⁴⁵ Andiba re Haren wene yaganetu mene a'nogo hologo hilingitunem, an nebeba selekhogo nek logogin.

⁴⁶ Haren wene yi'nogo hilingiti logoino ti'nogo hilingiti logoino iluk yaganisasigin mene andi re, an nen it raja-raja omanogo inoba fageti logogin, an he nenggali asigin lek.

⁴⁷ Hat Hawene melalek andi re an nendawi hundik hilingik welagimo re, an he Hat hawene melalek andi hilingitu mene faget nagaiyek welagi.

⁴⁸ An he Hat hawene melalek andi omame anggaluk nendawirogo welagi, Haren wene melalek menfegen mene andi re an nen furogo wenggelhi lagi.

Tuhan Awene melalek oba inendawinggen tibet fagarek wene

⁴⁹ An hamingmingengge noba wene eberek logolik werek mene watnetigin mene a'nogo hendawimo ebetnean o.

⁵⁰ Haren wene watnetigin mene andiba re an neluet nafunem an noba ou pou ugu kwelek oba nen he, wene andi nen an nagaiyek mene hilingnobagali'lago.

⁵¹ Ap winik-wonok agarek mene nen he an sebelogo nobagali'lagwi, oba nen he, an nen Hat hawene melalek a'nogoba nen taganhogo ekhe laga lagi lek.

⁵² O endamen engge Hat hawene melalek werek mene andi faget nendawi ebethikhi lagimo re, Tuhan neisena, we Hat hoba nenat an nendawimo nagaiyek mene hilingnobagali'lago.

⁵³ It afuni kwanirogo nek hilingitarek mene nen Hat hawene melalek a'nogo herakfuluk enek hilingitu nen he, an na'mage mondok hokho mene lagali'lago.

⁵⁴ An nebe kweangma eil horogat neluk logolik ya re, aren wene melalek menfesigin mene andoma re an nen wuni Hat fogethafu mene hilingfigi.

⁵⁵ Tuhan neisena, o hubanggo re an nen Hat hoba nek ebethiikhi lagi, nen Hat hawene melalek a'nogo re an nen mondok ninghogo fisogo welagi.

⁵⁶ Haren yi'nogo hilingiti logoino ti'nogo hilingiti logoino iluk yaganisegen mene andi futfuluk hilingiti lagiba re, an mondogat nagaiyek mene helikhi lagi.

Tuhan Awene melalek oba hilingiti logogun wene

⁵⁷ Tuhan neisena we Hat obaget enek an nendawi mene hilingik welagi, Haren yaganeti lagen mene andoma an nen hilingiti logogin iluk wene watheti.

⁵⁸ Haren an hendawi neoageluk an nendawinggen nebe inom mondogaren kino ikhi lagi, Haren wene warek fesigin mene higithogo an hendawitnabin.

⁵⁹ An he nonggwarek nobabut faget mondogat ebethikhi logolik he, Hat hawene melalek werek mene a'nogo nek hilingiti logogin iluk nane tekhogo igi.

⁶⁰ Haren yi'nogo hilingiti logoino ti'nogo hilingiti logoino iluk isigin mene andi hilingitu mene faget, an nen nenangotu welagi'lek weak-weakhogo nek hilingiti lagi.

⁶¹ Afuni inobabut weak mene nen he an nobaget hele web eri'lagwi, oba nen an he Hat hawene melalek a'nogo nonggot aga lagi lek.

⁶² Hup enggen tulem hilingik kwelek an neluk a'luk Haren fano weneba katokhogo ayo wuti lagen andiba re, fogethafi lagi.

⁶³ An he it afuni wene melalek futfuluk Hat oba inailorogo hilingiri'lagwi mene inom, nen it afuni Haren wene yi'nogo hilingiti logoino ti'nogo hilingiti logoino iluk werek mene omanogo inebe mondogat ninom misik sebeti lago.

⁶⁴ Tuhan neisena, o kweangma yoma Haren hendawi hundik hilinginafi lagen mene a'nogo nen mondok peterogo hilingik, wene Haren menfesigin mene andoma an yanggulnafi logoin.

Tuhan Awene melalek a'nogo obabut hilingik wene

⁶⁵ Tuhan neisena, Haren wene watnetigin mene a'nogo mondogat tibet fegen, nen Haren an hamingmingengge yinoba fano mene nek hilingnobagakhi lagen.

⁶⁶ An he Haren wene yi'nogo hilingiti logoino ti'nogo hilingiti logoino iluk isigin mene a'nogoba nendawinggen tibet fikhi lagimo re, Haren an nendawinggen kagalek mene wo'netik, nen nelu asuageluk hilingnobagagik, in o.

⁶⁷ Oan unggum wo'neti'le'ma re an nen wene melalek taganhogo nek hilingiti lagagi, yogondak he, Haren wene yi'nogo hilingiti logoino ti'nogo hilingiti logoino iluk isigin mene a'nogo hologo hilingitu welagi.

⁶⁸ Hat hebe fano hagun logolik, fano mene nek hilingiti lagenma re, Haren wene melalek tekhogo fesigin mene andoma an yanggulnafi logogin.

⁶⁹ Ap wonoget fakhagarek mene nen he an nenu weagerogo fili'lagwi, meneat he an he Haren wene tekhogo fesigin mene a'nogo nendawimo mondogaren holfuluk higithogo nek hilingitu welagi.

⁷⁰ It ap ariginik mene andoma nen he futfili'lagwi lek, oba nen he Hat hawene melalek andiba nek he an nendawimo nagaiyek mene hilingnobagali'lago.

⁷¹ Haren wene melalek yi'nogo hilingiti logoino ti'nogo hilingiti logoino iluk fesigin mene andi an furogo nelu asuageluk andi re, fano asuak haren unggum noba fikhi lagen.

⁷² O kweangma yoma emas inom, perak inom werek oba nen, an nen he Hat Hawene melalek yi nek he mondok esin mene anggikhi lagi o.

Tuhan Awene melalek andi re katokhogo nek hilinglagarek wene

⁷³ We Haren enek an nebe pugunhogo elalnafigin, Haren wene yi'nogo hilingiti logoino ti'nogo hilingiti logoino iluk werek mene andi yanggulikhi logoiyogen he, an wenggelhu mene wo'nom o.

⁷⁴ An he Haren wene watnetigin mene andiba nek eberek welagimo re, it afuni wene melalek futfuluk hilingiri'lagwi mene nen, an ineilenggen nealuk he inagaiyek asugun o.

⁷⁵ Tuhan neisena, wene Haren tegeti lagen mene andoma re we katokhogo nek tegeti lagen hilingi'mo re an mondogat nelu o, Haren we tiphogo nek hilingiti lagen a'nogoba re an wene noba fegen o.

⁷⁶ Haren an hamingmingengge noba wene watnetigin mene a'nogo higithogo, Haren hendawi hundik nafi lagen mene andiba re, an nagaiyek mene hilingisogo nobagakhi logogin logouwak.

⁷⁷ Hat hawene melalek andi nen he an nendawimo agaiyeget fugunem, Haren hendawi neagain oba an neluk ekhe inom logogin o.

⁷⁸ It ap winik-wonok agarek mene nen an nabok weagerogo fugunem he it inenggali asuak, oba nen an enek he Haren wene yi'nogo hilingiti logoino ti'nogo hilingiti logoino iluk isigin mene andi nek nendawimo ebetu mondok logogin.

⁷⁹ It afuni Hat hoba lombokhogo welagaikharek mene inom, nen it afuni Haren wene melalek a'nogo inelu werek mene inom, andoma mondogat Hat hambit waga logogun logouwak.

⁸⁰ An nenggali asi nogoluk, Haren wene menfegen mene andiba nen an nen taganhogo hilingiti logogin lego.

Fikhalogo fisoageluk samban agarek wene

⁸¹ Haren an nagap telnabi we'lep iluk an nendawimo warikhi logolik welagi, an he Haren wene watnetigin mene a'nogoba eberek logolik welagi.

⁸² Haren wene watigin mene andi tibet fouwageluk nenanggot hugunem an neil mondok senggeli'lago, an nen ikhi logolik he, ”Ki sambul Haren an nendawimo nagaiyeget nobagagin he?” ikhi lagi.

⁸³ Nagap he iwak songgopnorek mene hangge ari'lago, oba nen he Haren wene menfegen mene andi re an nonggorasigin mondok lek.

⁸⁴ Ki huli nen an hamingmingengge yi nenangotharek logogin nogo? Nena sambul Haren afuni an sikmuk niili'lagwi mene andoma wene inoba fagain nogo?

⁸⁵ It afuni Hat hawene melalek oba hologo hilingiri'lagwi lek mene omanogo nen, an neisok taganhogo puageluk kweang habuli'lagwi.

⁸⁶ Hat Hawene melalek andi re herakfou mene ekhe werek lek, mondogat he oba tibet fuluk logou hak mene nek werek, wene ero lek kwelek oba nen we tulemat mu'niili'lagwi andi re lebetnabin o.

⁸⁷ Iren an nebe mondok pinggi noa'lep, oba nen he Hat hawene melalek andi re an nen ekhe herakfikhi lagi lek.

⁸⁸ An nen Hat hawene melalek andi hologo nek hilingiti logogin nen he, Haren hendawi hundik mondok welagen mene a'nogoba nagap telnabin o.

Tuhan Awene melalek oba eberogo anggagarek wene

⁸⁹ Tuhan Hat hane andi re mondok-mondok logogin mene, o pogoroba andoma abolok lek etok mondok logogin.

⁹⁰ Haren tiphogo nek hilingiti lagen mene a'nogo agam eti'lek yogondak huli nen hobuk huli andoma logogin, Harenat kweang talfesigin mene andi re abolok lek werek andi.

⁹¹ It andi inebe mondogaren Hat hobaget enek hilingitunem he, Yogondak werek mene andoma mondogat he Hat awene melalek oba nek werek.

⁹² Hat Hawene melalek andi an nen nagaiyekhogo humuthikhi logoile le'ma nen he, an nebe enggin-fenggin mondok hikhi logoilesik nebe mondogat wa'la'le o.

⁹³ An nen Hat Hawene melalek andiba Haren an neluet fikhi lagenma re, hundik-handik andoma Hat Hawene melalek andi an nen herakfuluk ekhe hilingiti logogin lego.

⁹⁴ An nebe re Hat honggwarek hangge mene logolik, an nen Hat hawene tekhogo menfegen mene a'nogo mondogat hologo nek hilingiti'mo re, an nagap telnabin o.

⁹⁵ Afuni ina'mage weak mene nen he an noasugun iluk nenangot nafi logolik werek, Oba nen, an he Hat hawene melalek andoma nek futfikhi logogin.

⁹⁶ Haren huli-huli warogo fesiginkwe omanogo an neilenggen hikhi lagimo re fano higirenek hilingik, oba nen he we Hat hawene melalek andi nek he mondogat langfangsek.

Tuhan Awene melalek werek higithogo inendawinggen hundik hilingitarek wene

⁹⁷ Hat hawene melalek faget he an mondogat nendawi hundik anggikhi lagi, linggene inukhogo kumuthikhi logolik ebetu welagi.

⁹⁸ An he Haren wene yi'nogo hilingiti logoino ti'nogo hilingiti logoino iluk yaganisasigin awene a'nogoba hundik welagimo re, it naselei mene omanogo inonggot hak werek kwelek an enek he nendawinggen kagalek mene welagi o.

⁹⁹ An he Haren wene yi'nogo hilingiti logoino ti'nogo hilingiti logoino iluk werek mene andi kumuthikhi logolik ebeti lagimo re, it neisugwi guru lak inebe mondogaren inelu mene andoma re we sebelek hak werek kwelek, an enek he mondok hokhorogo futfikhi lagi.

¹⁰⁰ An he wene haren tekhogo isigin mene andoma fisogo logolik welagimo re, it ap inaluendegen inelu mene re we sebelek hak hilingik kwelek, an enek he mondok omamerogo futfikhi lagi.

¹⁰¹ An he wene Haren yaganetu mene andiba nek hologo hilingiti logogin iluk he, inobabut mondok kwanirogo hilingitarek mene andi re mondogat agaiserati lagi.

¹⁰² An he Haren enek yanggulneti lagenma re, Hat hawene melalek andoma an nen ekhe herakfikhi lagi lek.

¹⁰³ Hat hane andi re enduk mondok mitsekma re, kin amusu enduk we endep harek hak oba nen andi nek he enduk mondok fano mit-mirengge o.

¹⁰⁴ Hat hawene melalek andi nen he an mondogat nendawimo hebelek mene hilingnobagagunem he, inobabut mondok hena-hena hilingitarek mene andi re an nen mondogat nabit anggikhi lagi.

Tuhan Awene andi nen seleget inaferek wene

¹⁰⁵ Hat hawene andi re an neisok kwe lagukwe faget esage higit werek, nen an kwe loageluk seleget nafu mene werek.

¹⁰⁶ An nen Hat hawene melalek inom, wene katokhogo hilingitu awene faget inom andoma mondogat pukhogo fisogo logogin, iluk nane hombuk palogo wene watigi mene andi re nane isigi higithogoat tibet fagain o.

¹⁰⁷ Tuhan neisena, an nebe sebel nobagagunem elo'lekhogo hilingik welagimo re, Hat Hawene melalek oba neluget nobagakhi logoin o.

¹⁰⁸ Tuhan neisena, an nen Hat hai wathafi logolik samban ikhi lagi mene andi nane hologo wanhik, Hat hawene melalek andi an yaganetik, ikhi logoino o.

¹⁰⁹ An he, nebe neiloak legasu hakhogo nek hilingiti lagi, oba nen an he Hat Hawene melalek andi re nonggorasu lek hago.

¹¹⁰ It ap inobabut weak mene nen an nobaget hele wephogo nobagali'lagwi, oba nen an he Haren wene tekhogo menfesigin mene omanogoba nen taganhogo wilifi lagi lego.

¹¹¹ Haren yi'nogo hilingiti logoino-ti'nogo hilingiti logoino iluk isigin mene andi re an nangge mondok-mondok logogin mene hilingi'mo re, andi nen an nendawimo agaiyek mene hilingfikherek.

¹¹² An he wene Haren menfesigin mene andiba nek hologo hilingiti logogin iluk nendawinggen omamet figirik welagi mene andi re, an nebe legasigin huli andomaba asi lagain o.

Tuhan Awene melalek andi nen inailo lek mene hilingfikherek wene

¹¹³ An he Hat hawene melalek andiba nendawirogo welagimo re, afuni inendawimo seramet fuluk Hat hoba tiphogo hilingiri'lagwi lek mene andoma re an nen mondogat nabiret fisikhi lagi.

¹¹⁴ We Harenat an nebikhit agik, hawe a'ma fetnarek welagik, hilingiti lagen, an he Haren wene watnisasigin mene omanogoba nek eberek welagi.

¹¹⁵ Yago, hit ap hinobabut mondok weak mene andoma re, an were'ma yoma herakfuluk yatma hela lani! An he neisena Allah ane andi nek hologo hilingiti logogin.

¹¹⁶ An nebe neluk logouwageluk, Haren hawene wathigin higithogo an nomamet nobagakhi logoino, an eberek welagi mene a'nogo nendawimo waroageluk hilingnobagagun o.

¹¹⁷ An nagap telek logolik hundik-handik Haren yi'nogo hilingiti logoino ti'nogo hilingiti logoino iluk wene melalek werek mene a'nogo futfikhi logouwageluk, henggi agorogo fetnarek logoino.

¹¹⁸ Afuni Haren wene menfegen mene a'nogoba nen taganhogo hilingiri'lagwi mene re woginafi lagen mondok lek. Iren inaneba ineranen wene ili'lagwi mene andi re we tulemat mene ili'lagwi.

¹¹⁹ It afuni inobabut weak mene andoma faget he Haren anggikhi logolik ologoilong engge hak anggikhi lagen. Andiba an he Hat hawene melalek a'nogoba nendawirogo welagi.

¹²⁰ Hat hoba nendawimo ailo agunem he noak leigeti lagi, wene Haren tekhogo ikhi lagen mene andoma faget an he nailo nek ari'lago.

Tuhan Awene melalek oba hologo hilingiti logogun wene

¹²¹ An he wene katokhogo nek hilingitik, eberogo mene nek hilingitik, hilingiti lagi hilingi'mo re, an nebe waganogo it naselei mene inenggiba nobagau fugo.

¹²² It ap winik wonokhogo nek hilingiri'lagwi mene andoma nen sebelogo nobagakhi logoinogo re lebethafi logogin iluk, Haren wene wa'nom o.

¹²³ Haren an nagap telogo lebetnabi wesuageluk nenangot hiugu werek kwelek enek he neil mondogat oueri'lago, an he Haren lologo wulak hobagagin iluk abok yaganetigin mene a'nogo nenangotu welagi o.

¹²⁴ Haren hendawi hundik hilingfisikhi lagen mene andi higithogo re an ogo a'nogoat hilingnobagain o, Haren wene menfegen mene andi yaganeti logoin o.

¹²⁵ An he Hat hamingmingengge welagimo re, Hat hawene melalek a'nogo futfikhi logouwageluk, Harenat hilingnobagakhi logoin.

¹²⁶ Tuhan neisena, it afuni Hat hawene melalek taganhogo hilingiri'lagwi mene omanogo, Haren wene inoba fagain oba arat asi waga.

¹²⁷ Haren wene yi'nogo hilingiti logoino ti'nogo hilingiti logoino iluk werek mene andoma re, emas we sebelek hak hilingik kwelek mondok lego werek, nen emas mondok wurik mene ogore sebelek enek, andi nen he an nen nendawirogo welagi.

¹²⁸ Andiba an he Haren yi'nogo hilingiti logoino iluk yaganisegen mene andoma higithogo hilingiti logolik inobabut kwanirogo hilingiri'lagwi mene andoma re an nen nabiret fisikhi lagi.

Tuhan Awene melalek higithogo hilingiti logogun iluk agarek wene

¹²⁹ Hat awene melalek andi re mondok wesa polan mene hilingi'mo re, an nendawinggenma nen foukhogo fetaluk lagi o.

¹³⁰ Nen tindelhunem he, Haren yaganisegendek mene andi nen ninendawimo selegeraterek, afuni futfou elo'lek mene ogore elok futfagarek enek.

¹³¹ Hat hawene andi faget nendawi ou niugunem he, nambele anghogo nendawimo set lagapu hilingiti lagi.

¹³² Haren afuni Hat hoba inendawi hundik hilinghafarek mene hendawi hundik hilinginafi lagen andi hak he, An nebikhit helokhe hebela'luk hendawi hundik hilingnabin o.

¹³³ Haren wene watnisasigin mene a'nogo higithogo an neisok peikhogo warigi hanogoluk omamet nobagakhi logoin, Weak mene nen an sebelnarek logoinoluk oboget nea fuk.

¹³⁴ An nen Hat hawene melalek a'nogo hologo hilingiti logouwageluk, it afuni an noba enggin-fenggin nobagali'lagwi mene andomaba nen fikhalogo nobagakhi logoin o.

¹³⁵ Hat helokhoma nen an fanoabet nobagain, Haren wene melalek fesigin mene andi an hundik-handik yaganeti logoino.

¹³⁶ Afuni nen Hat hawene melalek andi hologo higithogo hilingiri'lagwi lek andi nen he, an neil amusu i hut hakhogo pialuk pili'lago o.

Tuhan Awene melalek andi re katokhogo nek hilingik isikhe wene

¹³⁷ Tuhan neisena, Haren he mondok katokhogo nek hilingiti lagen, Hat hawene melalek andoma re tiphogo nek hilinglagarek.

¹³⁸ Haren yi'nogo hilingiti logoino ti'nogo hilingiti logoino, iluk yaganisikhi lagen mene andoma re, mondok katokhogo nek hilingi'mo oba tibet fou mene nek werek.

¹³⁹ It naselei mene omanogo nen wene Haren yaganisikhi lagen mene omanogo inonggot a'luk hilingitunem he, an nobaharo a'luk na'mage hokho mene lagali'lago.

¹⁴⁰ Haren wene watnisasigin mene andi re mondok omame hilingi'mo re andiba eberogoat anggogorek, an he mondok nendawi hundik welagi.

¹⁴¹ An yi re we yenggerugwi higit logolik sebelek welagi, oba nen he wene Haren yaganeti lagen mene andi re ekhe taganet fikhi lagi mondok lek.

¹⁴² Haren wene katokhogo nek ikhi lagen mene andi re mondok-mondok logogin mene, nen Hat hawene melalek andi re mondok eberogo mene nek werek.

¹⁴³ Enggin-fenggin inom, yi'nogo ti'nogo hilingisu elo'lekhogo inom, noba asi weri'lago, oba nen he Wene Haren menfesigin mene andoma nen an nendawimo nagaiyek mene hilingnobagali'lago.

¹⁴⁴ Haren yi'nogo hilingiti logoino ti'nogo hilingiti logoino iluk wene fesigin mene andi re mondok katokhogo nek hilingik werek, an neluk ekhe inom logouwageluk Haren wenggelek mene ekhe inom wo'nom.

Fikhalogo nobagauwageluk samban agarek wene

¹⁴⁵ Tuhan neisena, an he nendawinggenma nen Hat henu hombuk palhi lagimo re, hane onggo yaganomo, an he Hat hawene melalek hologo hilingiti logogin andi namolo welagi.

¹⁴⁶ An nagap telogo nobagainogen iluk Hat henu hombuk palhafi lagi o, an he Hat hawene melalek andiat nenggi pukhogo fisogo logogin.

¹⁴⁷ O hubet-habet neluk a'luk he Haren lebetnabuageluk henu hombuk palhi lagi, an he Haren wene watnisasigin mene a'nogoba eberek mondok welagi.

¹⁴⁸ Haren wene yaganeti lagen mene a'nogo pilingisogo ebesigin iluk he, Hup inukhogo kagalek logolik welagi.

¹⁴⁹ Tuhan neisena, Hat hendawi hundigen an nane hesanggo nolnabin o, Haren katokhogo nek hilingiti lagen mene a'nogoba an neluk yi halnafi logoin o.

¹⁵⁰ Afuni an mu'napluk weri'lagwi mene re mondok horogat asi wagaikha o, Iren he inendawimo wene weak mene nek fisogo logolik, Hat hawene melalek a'nogo re herakfisili'lagwi.

¹⁵¹ Oba nen he Tuhan neisena, Hat hebe re horokhogo welagen, Haren yi'nogo hilingiti logoino ti'nogo hilingiti logoino iluk ikhi lagen mene andoma re mondok eberogo mene nek yaganisikhi lagen.

¹⁵² O attagen engge wene Haren yaganisikhi lagen mene a'nogoba nen nelu aga lagi, Haren wene andire mondok-mondok logogin mene faget fesigin.

Lebetninabuageluk samban agarek wene

¹⁵³ Hat hawene melalek a'nogo an nen ekhe herakfigi'lek hilingiti lagi andi nen he, an weak welagi mene andi heilenggen kumutnealuk nagap telnafi logoin o.

¹⁵⁴ An nawene faget nebikhit a'luk he nebe fikhalogo nobagakhi logoin o, Haren wene watnisasigin mene higithogo an nagap telogo nobagain.

¹⁵⁵ It afuni inobabut weak mene andoma re Hat hawene melalek a'nogo hologo hilingiri'lagwi le'ma re, Haren telinabu re elo'lek

¹⁵⁶ Tuhan neisena, Haren hendawi hundik hilingninafi lagen mene andi re mondok hokho mene hilingninafi lagen, Haren mondok katokhogo nek hilingiti lagen mene a'nogoba an nagap telnabin.

¹⁵⁷ Afuni inebe hokhorogo nen an eil napluk he mu'narek nikho, ariginhu kwelek he Haren yi'nogo hilingiti logoino ti'nogo hilingiti logoino iluk melalek werek mene andi re an nen herakfikhi lagi lek.

¹⁵⁸ It ap inawene weak inap andi isaluk he Hat hawene yaganisikhi lagen mene andi mu'luk lili'lagwi le'ma re, an nen mondok nabit isikhi lagi.

¹⁵⁹ Tuhan neisena, an nen Hat hawene melalek a'nogoba nendawi hundik welagi mene andi heilenggen nean o, Hat hendawi hundik a'nogoba nagap telnabin.

¹⁶⁰ Hat hane andi mondogat he eberogo mene nek, Hat hawene melalek mondok higit mene andoma re mondok-mondok logogin mene.

Tuhan awene melalek oba nek hilingiti logogun wene

¹⁶¹ Wene ero lek kwelek he ap inomame werek inaben mu'niili'lagwiba nen, an he we Hat hawene melalek andiba nek nailorogo welagi.

¹⁶² Aben inangge yi mene ti mene helagarek higit, Haren wene watnisasigin mene andi nen an mondogat nagaiyek mene hilingnobagali'lago.

¹⁶³ Ineranhogo wene lalinafarek mene andoma mondogat he an nen nabit isigirek, oba nen he Hat hawene melalek enek he nendawirogo hilingiti lagi.

¹⁶⁴ Hat hawene melalek andi re higit mondok hilingi'mo re, an nen hundik-handik Hat hoba hai wathafu welagi.

¹⁶⁵ Afuni Hat hawene melalek oba inendawi hundik hilingiri'lagwi mene re inailo legengge inebeba serogo logogun, it inoba kwe palek mene ekhe hilingfisogoin mondok lek.

¹⁶⁶ Tuhan neisena, an he Haren inagap telinafi lagen mene a'nogo faget nenangot hikhi lagi o, nen Haren yi'nogo hilingiti logoino ti'nogo hilingiti logoino iluk isigin mene andoma re higithogo nek hilingiti lagi.

¹⁶⁷ Haren yi'nogo hilingiti logoino ti'nogo hilingiti logoino iluk isigin mene omanogo an nen hologo nek hilingiti logolik, nendawinggenma nen mondogat nendawi hundik hilingiti lagi.

¹⁶⁸ Haren he an hilingiti lagi mene omanogo mondogat niikhi lagenma re, an nen he Hat hawene melalek inom, yi'nogo hilingiti logoino ti'nogo hilingiti logoino iluk werek mene omanogo inom higithogo nek hilingiti lagi.

Lebetninabuageluk samban agarek wene

¹⁶⁹ Tuhan neisena, Hat hawene melalek watnisasigin mene higithogo, an futfugu mene wo'nom o, an nane hombuk palhi lagi mene andi Hat were'ma asi weri'lago logouwak.

¹⁷⁰ An nen yagaheti lagi mene andi Hat were'ma asi wesigin halok he fano, Haren hawene watnisasigin higithogo an nagap telnabin o.

¹⁷¹ Haren wene menfesigin mene omanogo yanggulneti lagen andiba re, an nen Hat hundik-hundik fogethafi lagi.

¹⁷² Hat hawene melalek andi re eberogo mene hilingi'mo re, Haren wene watnisasigin mene andi faget an nen wuniba fogerati logogin.

¹⁷³ An he Hat hawene melalek andi nek murok laga logogin iluk wenakhasigimo re, Hat hendawi fano nen an lebetniikhi logogin logouwak.

¹⁷⁴ Haren inagap telinafi lagen mene a'nogoba nagap telnabilen iluk nendawimo anggikhi logolik welagi, Hat hawene melalek andi nen an nendawimo agaiyek mene hilingnobagali'lago.

¹⁷⁵ Hat fogethafi logogin nen an neluk logogin fano, Wene Haren menfegen mene andomaba an lebetniikhi logogin logouwak.

¹⁷⁶ An he domba longgo ikherek hak longgo igirik logolik, Hat hawene melalek a'nogo taganet figi'lek welagi andi nen he, Hat hebe we'luk an hamingmingengge yi herak nabime o.