MAZMUR 118 - Allah Wene Fano Wene Hupla Inane

Inomame agaukwasik samban oba Allah fogeratukwa wene

¹ Nineisena Tuhan obabut fano nen, endawit ninaferek mene andi mondok-mondok logogin mene hilingi'mo re, hai watik fogeratik ikhi logouwogo.

² It afuni Israel mene nen he, ”Nineisena Allah nen endawitninaferek mene andi re, etok mondok logogin mene o,” iluk, ikhi logouwak.

³ It Allah eisewerek mene nen he, ”Nineisena Allah nen endawitninaferek mene andi re, etok mondok logogin mene o,” iluk, ikhi logouwak.

⁴ It afuni Allah ba inailorogo hilingitarek mene inebe mondogaren he, ”Nineisena Allah nen endawitninaferek mene andi re, etok mondok logogin mene o,” iluk, ikhi logouwagaro.

⁵ An noba yi enggin ti enggin hikhi logolik, neisena Tuhan nen, telnabuagaluk ayonggo fugunem, nane esanggo holheresik, an nebe telnaferek.

⁶ At Tuhan he an werekwe werek andi nen he, an he noak leigesu lek hak, afuni nen an noba yi'nogo ti'nogo ekhe hilingnobagaumo re elo'lek.

⁷ At Tuhan he an lebetneageluk an nebikhit welagarek andi nen he, it naselei mene mabenet fisugunem andoma re, neilenggen isagain.

⁸ Afuni inoba inendawinggen himbiret fuluk welagaikharek andi elo'lek meneat he, Allah awe a'ma sebe uluk logogun andi nek he mondok fano.

⁹ Afuni inenu werek mene inoba ninendawinggen tibet fuluk welagaikharek andi re, elo'lek meneat he, Allah awe a'ma sebe uluk welagaikharek andi nek he mondok fano.

¹⁰ Afuni ninom weak mene nen noasuogoluk, nabel fena-fena walinget nabi wagaikharek oba nen, neisena Tuhan omameba an nen mabenet fisigirek.

¹¹ It ap andoma nen he an hukhogo kwelaknabuogeluk nabel fena-fena maserogo nobagali'lagiba nen he neisena Tuhan omameba an nen mabenet fisigirek.

¹² An nabel fena-fena kin isa hangge heim nea kwi wagunem he, neisena Tuhan omameba mabenet fisigirek. Engga endu nen lei ninggerek andi hak, it inebe misigamat felelenghogo leget fisigirek.

¹³ An noasuogoluk inomamerogo wagunem, nalekwe togarogo heise wulifunem an nebe noa'lep mene, neisena Tuhan nen fano telnaferek.

¹⁴ At Tuhan andi re an nomamet nobagagunem, fogeratirek mene werek. Arenat an nebe telogo nobagasikhe.

¹⁵ Nineisena Tuhan, At omame mondok hokho mene a'nogo At againafuri inoba hilingfikhemo inomame agaikhasik, inawi su mene wuri'mo o silikwe omanogo inagaiyegen wuni wari'lagwi andi hinesanggo holini!

¹⁶ At Tuhan he hilingisu elo'lek mene hilingiterego, nen nineisena Tuhan nen omame wo'nisikhemo, nit ninomame ago,” iluk wuni watarek.

¹⁷ An nebere wa'lasigin lek, oba nen he ekhe inom neluk logolik, At Tuhan nen hilingiterek mene andoma fakhogo yagaisikhi logogin.

¹⁸ At Tuhan nen he, yi enggin ti enggin mondok elo'lek mene an noba fikhe meneat he, Aren an nebe wa'lasuageluk hera'nobagagi'lek,

¹⁹ An nebe kwi wesimbik, neisena Tuhan fogerati logogin nen he, o Tuhan awi kwe sou ambe palek ari hu'neani o.

²⁰ Kwe sou ambe palek yi Allah mene o. It afuni higithogo hilingitarek mene nek he, kwe yiba elok kwi wesugun.

²¹ Neisena Tuhan, an nane hesanggo holhendik, nebe telnafen andi nen he, hai wathafik fogethafik ikhi lagi o.

²² It ap o helep meneba wuti logolik, helep yi weago, iluk herakfisaga mene a'nogo, obuleat ya'laga o.

²³ Andi re elalin mene At Tuhan nen nit ninelokhoma hilingitemo o, iluk fogerati lago.

²⁴ Nineisena Tuhan nen, yogondak he nit ninawi fano mene wo'nisikhemo iluk ninendawimo ninagaiyegeti logolik, fogerati logouwok.

²⁵ Nineisena Tuhan nen ninebe telninabinogen iluk, niren hayonggo fikhi lago o. Ninomame aga logouwagaluk, Hat homame wo'nisikhi logoino.

²⁶ Nineisena Tuhan enuba waga mene yi, fanoabet feino o, Niren o Tuhan Awi wuri'mo andoma nen hat hebe fanothafi logogun.

²⁷ Nineisena Tuhan andi re Allah aro, At he endawinggen mondok lebeksek logolik, fanotninaferek mene Allah anggo warogo fisaluk noletarek oba andoma, engga sombologo ninenggim waluk ninebe erarogo maset houwogo.

²⁸ Hat he an neisena Allah welagen, andi nen he, an nen hai wathafi lagi. Neisena Allah legeisogo hobagakhi lagi.

²⁹ Nineisena Tuhan obabut fano nen, endawitninaferek mene andi mondok-mondok logogin mene hilingi'mo re, hai watik fogeratik ikhi logouwogo,” iluk wuniba fogeratikhe.