MAZMUR 116 - Allah Wene Fano Wene Hupla Inane

Nit weak hugu were'ma Allah nen telninaferek mene faget isukwa wene

¹ An nen neisena Tuhan oba telnabuageluk ayonggo fugunem, an nane esanggo holherek andi nen he, At oba nendawi hundik welagirego.

² Telnabuagaluk hundik-handik ayonggo fugu were'ma Aren nane esanggo holherek,

³ Paik hele fugunem ke'nok ikherek hak, an nebe wa'lasigin horogat agunem, na'manggen mondok hokho mene laluk, nailo nen nendawinggen firogo welagi.

⁴ A'nogo logolik, ”Neisena Tuhan an nebe telnabime o,” iluk enu hombuk palhi logolik, ayonggo fugu welagi.

⁵ Nit nineisena Allah andi re, nit ninoba endawi hundik mondok logolik, ninebe endawit ninafik, higithogo hilingninafik, ikherek.

⁶ At Tuhan nen he it afuni inenu lek mene fanorogo ferinarek welagarek. An nomame mondok lek logolik, nebe tela elo'lek were'ma, Aren an nebe telnafikhe.

⁷ Neisena Tuhan nen an noba fanorogo hilingnaferek andi nen, an nendawinggen hambukhogo welagirek.

⁸ Neisena Tuhan nen he, An weak mene anggele'ma were'ma, le aga logouwagaluk hera'nobagagi'lek, warikhi logoguwagaluk oboget niigi'lek, telnaferesik fetnarek mondok werek.

⁹ A'nogo fetnarek werek kwelek an nebe At awe a'ma logolik, afuni ineluk mene ninom kweangma ekhe inom hombun asimbik logogin.

^10-11 An he enggin-fenggin hikhi logolik he, nane u re, nobakheindok pala'luk, ”Afuni kweangma mene, ineranen wene agarek enek andi nen he, inendawinggen inoba himbiret fou re elo'lek,” iluk ikhi logolik, nendawinggen Allah oba himbirik mondok welagi.

¹² Neisena Tuhan nen, an noba fanorogo hilingnaferek andi faget an nen onggo nena mene wogosigin nogo?

¹³ An telnafikhe mene andi faget, an nen neisena Tuhan hai wati logolik, anggur amusu wogosi wesigin.

¹⁴ An nen neisena Tuhan faget, ”Yi'nogo hilingisigin,” iluk, wene waretigi mene andi At againafuri mondogat ineilhanem en At faget a'nogo hilingisigin.

¹⁵ Nineisena Tuhan he At againafuri endawi hundik mene wa'lagunem he, At elokhoma re esin mondok welagarek.

¹⁶ An yi neisena Tuhan hamingmingengge mene o. Nagaisa nen Hat faget hilingiti lagaikhe hak, an ogo Hat fagerat hilingitirego. Nebe hele warek were'ma, Haren hele fikhalnafigin.

¹⁷ An samban hayonggo fikhi logolik, hai wathafi lagi, iluk, Hat faget ekhe hobagai wesigin o.

^18-19 Neisena Tuhan hobaget, ”Yi'nogo hilingisigin,” iluk, wene wathetigi mene a'nogo hagainafuri mondogat ineilhanem o kota Yerusalem tulem andoma hawi o silimo omanogo nen he, hagainafuri andogorek were'ma, Hat faget a'nogo hilingisigin o. Hit Tuhan againafuri nen he At fogerati logoino o, iluk Haleluya igi andi, iluk wuni watikhe.