MAZMUR 115 - Allah Wene Fano Wene Hupla Inane

At Allah re yi wene ti wene elok hilingisu hagenek, iluk wuni watukwa wene

¹ Nineisena Tuhan nit ninebe hendawi nen, hoba lombokhogo fetninarek welagen andi nen, nit afuni fogetninabu lek hak, We, hat hamuat fogethafi logogun.

² It afuni inunggulenu lombogen he, ”It ineisena Allah ebe koma werek,” iluk nenahalok agarek nogo?

³ Nineisena Allah ebe pogoroba werego. Logolik he, At endawimo amolo anggikherek mene higithogo nek hilingiterek.

⁴ It inandugwi kembu ebe re emas perak mene, afuni inenggi nen hilingitarek mene o.

⁵ It inambe werek meneat he inane u re elo'lek. It ineilenggen werek meneat he ineilenggen hare elo'legat.

⁶ It inesanggo werek meneat he inane holu re elo'lego. It inambisang werek meneat he amben palu re elo'legat.

⁷ It inenggi werek meneat he ya fak ta fak hilingisu re elo'lek. It ineisok werek meneat he kwe lare mondok elo'lek. It inalonggop elema nen he inane u re elo'legat.

⁸ It afuni tugwi kembu inenggi nen pugunhogo hilingitik nen at oba inendawinggen tibet figik, agarek mene andi re, a'nogoat hilinglakhoak.

⁹ Hit afuni Israel mene yi, nineisena Tuhan nen fethinarek logolik, lebethisikherek andi nen he, At oba himbirik logoino o.

¹⁰ Hit ap Allah eisewerek mene yi, hineisena Tuhan nen fethinarek logolik, lebethisikherek andi nen he, At oba himbirik logoino o.

¹¹ Hit afuni At oba tiphogo hilingiti lagep mene hinebe mondogaren he, hineisena Tuhan nen fethinarek logolik, lebethisikherek andi nen he, At oba himbirik logoino.

¹² At Tuhan nen nit ninoba eberek logolik, ninebe fanot ninafi logogin. Nen Arenat it afuni Israel mene inom, nen it ap imam Harun nen tagomangge mene inom fanorinafi logoginat.

¹³ Hit afuni nineisena Allah hinailorogo welagep mene yi, hinenu werek mene inom, hinenu lek sebelek welagep mene inom, At Allah nen higithogo nek fanothinafi logogin o.

¹⁴ Hit hinebe inom tagomangge mene inom, Nineisena Allah nen he, hinagainafuri mondok hokhorogo wokhisikhi logouwago.

¹⁵ Nineisena Tuhan pogot kweang elalhikhe mene nen, fanothinafu mondok logouwago.

¹⁶ Pogot andi ebe eisewerek he nineisena Tuhan onggwarek welagarek. Meneat he kweang enek he, nit afuni eiserogo logouwageluk wo'nisasikhe.

¹⁷ Afuni inebe wa'lagunem kweangma salinafunem inareng lek welagaikharek mene andoma nen, nineisena Tuhan fogerasugun mondok elo'lek,

¹⁸ A'nogo meneat he nit nineluk welago mene yi nen, hundik-handik nineisena Tuhan fogerati logouwogo, iluk Haleluya, igi andi.