MAZMUR 112 - Allah Wene Fano Wene Hupla Inane

Afuni fano hilingitarek mene nen inagaiyek hagarek wene Tuhan enek fogerasuok!

¹ It afuni wene melalek futfuluk hilingitik, Tuhan awene melalek inamolorogo hilingitik, hilingitarek mene andoma re inagaiyek hikhi logouwak.

² It andi inagainafuri re o kweang yoma mondogat sebelogo logogun, it afuni fanorogo hilingitarek mene inagainafuri re fanoabet fisikhi logogin.

³ It ineisok erokwe mene re inenggi werek mene agik, inangge yi mene ti mene hokho pokhorogo welagik, hilingik logogun, nen it andi re ninhup nanhup andoma fanorogo nek logogun.

⁴ Afuni nen higithogo nek hilingitik, katokhogo nek hilingitik, inendawi hundik welagik, inelagaik mene fanot fisigik hilingisugun oba re, mum mene anggele'ma nen selegerinafi logogin.

⁵ It afuni inendawi fanorek logolik inagaila'lak ekhe hobuk obali'mo fagain nen iluk kino ugunem wogisigik, yi wene ti wene faget tiphogo nek hilingiti logolik henarogo hilingiti'lek higithogo hilingitarek mene andoma re inagaiyek hikhi logouwak.

⁶ Ap fano hilingitarek mene re iren yi'nogo ti'nogo hilingitunem ambisangma ekhe tagan ikhi logogin lek, hundik-handik andoma ap a'nogo oba eberek mondok welagaikharek.

⁷ Aren Tuhan oba lombokhogo logolik endawinggen hambukhogo werek andiba re, wene obabut weak mene esanggo holigin oba nen he aren ailo asigin mondok lek.

⁸ It aselei mene omanogo mabenet fisagain iluk endawimo anggikhi logolik he, aren endawimo ailo anggigik, endawi hokho mene fitik, hilingiti logogin mondok lek.

⁹ Aren he angge yi mene ti mene it afuni inenggi lek mene leberisigik, nen at ebe along werek mene hilingik logolik lego were'ma re, afuni nen along anggaluk legeisogo fugunem, aren fano mene nek it inoba hilingfisugu, welagarek.

¹⁰ Ap weak hilingitarek mene nen ineilenggen haluk he ina'mage lagaluk, ina'makwe heren inaik kilit mati logogun. A'nogo hilingiti la'luk it inebe legasi logoin, iren inendawimo eberek logogun mene omanogo re mondok-mondogat legasi lagain.