MAZMUR 111 - Allah Wene Fano Wene Hupla Inane

Tuhan fogeratarek awuni

¹ At againafuri inebe andogore'ma inanggele'ma omanogo nen, an nendawinggen oba nenat neisena Tuhan hai wati lagi.

² At Tuhan nen hilingiterek mene andoma eberogo nen he enggin mondok hokho mene hilingitere'ma re afuni inendawimo inagaiyek werek mene nek he fifurogo pilingiti logoumo re higiro.

³ At Tuhan nen yabu hilingiterek mene andoma re esin mondok hilingi'mo andungdang mondok welagarek, Aren katokhogo nek hilingiterek mene andoma re etok mondok logogin mene.

⁴ At Tuhan andi re afuni endawi hundik hilinginafik, inelagaik isigik, hilingiterek, niren hundik-handik eberek mondok logouwageluk, Aren he afuni nen fogerasu mene omanogo nek hilingiterek.

⁵ Aren afuni wene warisikherek mene andi re eberek mondok welagarek, Nen At oba lomborogo logolik futfuluk hilingitarek mene andoma re yi mene ti mene higithogo nek wogisikherek.

⁶ It afuni inunggulenu amu mene inanggweang mene omanogo re, At againafuri mene wogisasikhe andiba re At omame werek mene a'nogo weinamet fesikhe.

⁷ At Tuhan nen hilingiterek mene andoma mondogat he katokhogo nek hilingitik, tiphogo nek hilingitik, ikhirek, At awene melalek andoma re mondok omame hilingi'mo tiphogo nek hilinglagarek.

⁸ At awene melalek werek mene andi re inenggi mondok-mondok andoma omamerek logogin, Aren he eberogo meneba hilingitik, higithogo meneba hilingitik, ikherek.

⁹ Aren he it againafuri lologo fisasikhesik he, inom mondok-mondok logogun mene awene warisasikhe. At ebere Tuhan, Omame Mondok Hokho mene, Fano horek welagarek mene a'nogo!

¹⁰ Ap sa nen obabut hebelek mene logogin amolo halok he, aren Tuhan oba along anggaluk legeisogo fikhi logogin fano. Nen, afuni At ane hologo nek hilingitarek mene inoba re fanorogo wenggelharek mene wogisikherek. Inenggi mondok-mondok andoma re Tuhan nek fogerati logogun.