MAZMUR 11 - Allah Wene Fano Wene Hupla Inane

Afuni telninabuageluk awea'ma kuluk werek oba re Tuhan amu werek iluk isikhe wene

¹ Afuni nen wuni wulak fuluk inebe seberogo ugunem melalinafu mene faget, at Daud awuni yi. An he Tuhan awea'ma kuluk welagimo re, afuni nen yaganeti logolik, ”Sue tom oba tarogo lagarek hak hat he hebe honggwaregen hagap telan o,” iluk yaganetarek mene andi re a'nogo yaganesumo re elo'lego.

² It afuni weak hilingitarek mene nen inasikhe engga ninghogo salfuluk he, o mum se'ma omanogo nen afuni higithogo hilingitarek mene inoba pising isouwogeluk, tok sikhe enggelaba kwelagaisogo fangsek logolik werek.

³ Wene melalek afuni nen yi'nogo hilingi'no ti'nogo hilingi'no iluk werek mene andi furogo halfigi'legengge logoumo nen he, afuni fanorogo hilingitarek mene re ningginugun iluk nonghong u hago.

⁴ Tuhan he awi fanoma horek oba omanogo werek, o Sorga andoma re At ebe hurek werek oba. A'nogo logolik he afuni mondogaren hilingitarek mene omanogo faget eilenggen penetu werek, andi nen he it inobabut yinik-hunik hilingitarek mene andoma mondogat he At elu mondok welagarek.

⁵ At Tuhan nen he afuni weak hilingitarek mene inom, fano hilingitarek mene inom inobabut palherek, nen afuni inobaharoba hilingitarek mene andi re Aren he mondogat abit isikherek.

⁶ Afuni weak hilingitarek mene halok he Aren enggin-fenggin ekhe mene-ekhe mene inom, endu oba inom, helebenggen endu meneba inom, nen sogoi aganhan nen nolinaferek meneba inom unggum inoba fikherek.

⁷ At Tuhan andi re katokhogo nek hilingitunem he, afuni fanorogo nek hilingitarek mene re Aren endawi hundik hilinginaferek, nen afuni higithogo hilingitarek mene re Tuhan ebe ineilenggen haluk inelu agarek.