MAZMUR 108 - Allah Wene Fano Wene Hupla Inane

Hai warogo samban agarek wene

¹ Wuni At Daud awuni.

² Neisena Allah, an he hat hoba nendawinggen mondok wurikhogo tipsek logolik welagi, an he Hat hoba wuni igik, fogethafik, hilingiti logoigen he, hat nendawinggen yi re helugame o.

³ An he o wei uageluk eleligeluk welaginggere, hit pinggong gambus inom kecapi inom he hineluk a'ni o.

⁴ Tuhan neisena, an he it afuni inunggulenu ekhe mene ekhe mene inanggele'ma andoma nen, hai wathafi logogin. It afuni inanggele'ma andoma nen, an nen wuni Hat fogethafu awuni ikhi logoile namolo welagi.

⁵ Haren hendawi hundik hilingninafi lagen mene andi re mondok hokho hilingi'mo re, o pogot huliba hilingik, nen Haren tiphogo nek hilingninafi lagen mene andi re anggulok werek huli andomaba hilingik.

⁶ Neisena Allah, Hat hebe handungdang welagen mene andi o pogoroba andoma inugisan o, nen Hat haselek hombakbak welagen mene andi re o kweangma mondogat inugisan o.

⁷ Hat homameba nit ninagap telninabin o, nit Hat againafuri Haren hendawi hundik hilingninafi lagen mene andoma re ninagap telek logouwageluk, niren Hat hoba samban ikhi lago mene andi hesanggo holninabin o.

⁸ At Allah ebe werek oba mondok fano hore'ma omanogo nen ane ikhi logolik he, ”An he nagaiyegen foget fakhikhi logolik kweang o Sikhem kweang oba omanogo sumbusigin o. Nen, o Sukot fanggong ele andi re ilirengge walesigin o.

⁹ It Gilead inom Manasye inom andem he An nonggwarek nangge, Efraim andi re An nunggul topi helep baja meneba hilingik mene, nen Yehuda re An nebe raja mendek logolik melalinafi lagiba a'nogo narige tomuk higit werek.

¹⁰ Oba nen he Moab he An neisok sobalhi lagiba, An nen he o Filistea faget unggul luguti logolik nawonok aga lagi. Edom oba re at ebe An nonggwarek mene iluk enegenggere sepatu oba huk hikhi lagi o, ikhe.

¹¹ Ap sa nen an wo'napluk o Edom andoma lagain nogo? Ap sa nen an hondok narek o helep leget omamerogo wagane'ma andi nobagai lagain nogo?

¹² Nineisena Allah, Hat he nit ninom lagain lega? Hat he nit ninagoromi tentara lagunem hinom lagain legara?

¹³ Nit afuni nen lebetninabi'lagwi mene andi re we alomarogo hangge hilingi'mo re, it ninaselei mene were'ma andoma nen Haren lebetninabin o.

¹⁴ Nit nineisena Allah ninomenat elalin hilingitarek mene omanogoba ninomame aga logogun, Arenat nit ninaselei mene omanogo inomame leget fisikhi logogin.