MAZMUR 106 - Allah Wene Fano Wene Hupla Inane

At Tuhan nen againafuri inoba fanot fisikhi lagaikhe wene

¹ At Tuhan andi re ebe fano mene logolik, Aren endawi hundik ninaferek mene a'nogo re etok mondok logoginmo re, At oba hai watu mondok logoni o.

² At Tuhan andungdang werek mene andi faget he ap sa nen waluk sagarik la hak nogo? nen ap sa hagen At obaget mondok higithogo foget fou hak nogo?

³ It afuni At awene melalek hologo nek hilingitarek mene andoma inom, nen it inobabut oba eberogo mene nek hilingiri'lagwi mene andoma inom en he, inagaiyek hikhi logouwak.

⁴ Tuhan neisena, Haren it hagainafuri inobaget mondok fano aple nek hilingfisikhi lagen a'nogoba an ogo ebetneano o, nen Haren it hagainafuri andoma inagap telhi logolik halok he an ogo telnabino aro.

⁵ It afuni Haren wenagaisogo fisasigin mene andoma inangge mondok sik-pikhogo were'ma neilenggen isigik, nen it afuni Hat honggwarek hagainafuri hilinglagaikha mene inom seberogo inagaiyekhugu welagik, foget fakhigik, ikhi logogun logouwak.

⁶ It ninambu ninombalagen hilingiti lagaukwa higithogo nit mondogat weak hilingito, niren he mondok kwanirogo nek hilingitik, Hat hawene melalek sagalogo hilingitik, ogo.

⁷ It ninombawi o Mesir logolik andoma re futfikhi lagaukwa mondok lek, Haren elalin mene elalhigin mene andoma iren inendawimo wenggel hikhi lagaukwa mondok legat. I Laut Gelagah horokhogo andoma nen Haren hendawi hundik hokho mene hilingninafigin mene a'nogo inonggot agama re, iren Hat Mondok Lego Welagen mene a'nogo helokhoma wene oak sagalhi lagaukwa andi.

⁸ Oba nen he At Tuhan onggwarek endawi wenggelhaluk, At omame hokho mene a'nogo weinam asuageluk he, Aren inagap telinafikhe.

⁹ At ane miming oba re i Laut Gelagah a'nogo iring lagaikhemo, At againafuri omanogo i laut agumkwe a'nogo nen o leikwe lagaikharek higit woginarek wulibi wagaikhe.

¹⁰ A'nogo hilingitikhe andiba re it inaselei mene inenggimo nen inagap telogo fisigik, nen it inom weim palek mene inenggi omame a'ma nen lologo wulak fisa wagik, isikhe.

¹¹ Oba nen he it inaweim mene omanogo re, misik ekhe polokhogo wilifi'lek, abirengge i a'ma pelaginafikhe.

¹² A'nogo hilingitikhe andiba re it againafuri omanogo At Tuhan nen wene warisasikhe mene a'nogoba eberogo anggasukwasik, At obaget wuni fogeratarek awuni wulakfuluk wati lagaukwa andi.

¹³ Oba nen he it a'nogo weak-weak aremnogoat At Tuhan nen hilingitikhe mene a'nogo inonggot agaukwasik, Aren wene komo wene yaganisoageluk heinok wokhigi'legengge hilingiti lagaukwa.

¹⁴ O leimo omanogo nen he it ina'mage lagasikhemo re, Allah obabut palhukwa.

¹⁵ Iren kino ugu mene omanogo Aren wogisikhi lagaikhe, oba nen he it inoba ogo ou henanggo inailo mene lakfei waga lagaikheat.

¹⁶ O leimo omanogo nen he iren at Musa ebe inom, amingmingengge Harun mondok fano horek agun a'nogo inom inoba li'norogo wenagisasukwa.

¹⁷ A'nogo hilingitukwama kweang heirogo pagerik lagaikhesikhe Datan pilhigik, nen Abiram againafuri inom salinafik isikhe.

¹⁸ Ariginhukwa andiba re endu pi waga logolik he, it inom wagaukwa mene andogorek welagaukwa omanogo sebelinabi pi wagaikhesik he, it wene melalek sagalfikhi lagaukwa mene omanogo endu nen inebe mondogat felelenghogo nasikhe.

¹⁹ Tom Sinai ba nen he, iren wam sapi eak emas oba alik waganogo wutukwasik, inenggi nen alik waganogo hilingitukwa mene a'nogo apne wanhi lagaukwa.

²⁰ Iren he Allah Legeisogo Mondok fagarek mene a'nogo agamhogore, no sapi engga ninggerek mene a'nogo inom higirap etukwa.

²¹ Allah it inebe telinafik, nen o Mesir en wene mondok esin hokho mene hilingitik, isikhe mene omanogo inonggot agaukwa.

²² O kweang andomaba nen he mondok fulu polan mene hilingitikhemo nen, i Laut Gelagah yenggele'ma omanogo nen ogore wesa polanhogo ekhe hilingitikhe mene inonggot agaukwaat.

²³ Andiba re At Allah nen it inebe mondogat leget fisagain iluk hilingitunemen he, Musa At Allah nen wenatikhe mene a'nogo nen kwe palfesikhe. Musa ebe tulem menlagaikhesik it inili wanhikhe andiba re, Allah a'mage lagasikhe mene a'nogo lombuk isikhe.

²⁴ Andi nen, iren Allah nen wene warinafikhe mene a'nogoba eberogo anggasukwa le'ma a'luk he, o kweang mondok fanoma a'nogo re ninabit iluk herakfesukwa.

²⁵ It inawi sabu sale'ma omanogo nen inane sagalhi logolik he, Tuhan ane ugu mene a'nogo holhi'legengge welagaukwa.

²⁶ Andiba re Aren inawene kagalogo, ”O leimo nen mondogat inoasigin,” iluk ane hombuk palhik,

²⁷ nen it inambisangma nen tagomangge mene re it afuni inunggulenu amu mene inaggelekwe hugisigik, nen it inebe o kweang inonggotkwe mondogat telfol isigik igin o,” iluk isikhe.

²⁸ Andi re iren o Peor andoma nen kembu Baal a'nogo apne wanhik, nen kembu dewa inobaget fugu mene omanogo iren ninggik isukwa.

²⁹ Iren a'nogo hilingitukwa mene a'nogoba Tuhan a'mage kwelafukwama re, andiba Aren ou amben mondok weak mene inoba lakfei wagaikhe.

³⁰ Oba nen he at Pinehas wulifi logolik he, it mondogat weak hilingitukwa mene omanogo unggum wogisasikhemo re, ou amben mondok weak mene a'nogo palagaikhe.

³¹ At Pinehas nen hilingitikhe mene andi re an nen ogo we misik ekhe hilingiti iluk anggikhi lagaikhe andi nen he, iren mondogat eberisikhi logolik enek welagaukwa.

³² I Meriba mogo habulikwe omanogo nen iren Tuhan a'mage lagou hak mene nek hilingitunem he, iren hilingiti lagaukwa mene andiba at Musa a'nogo afekwe nonghong u hak enek hilingfikhi lagaukwa.

³³ Iren at endawimo mondok heiselek mene nek hilingitukwama re, aren ane furogo wenggelhigi'legengge ikhi lagaikhe.

³⁴ At Tuhan nen yagaisasikhe hakhogo iren afuni inunggulenu amu mene omanogo inebe leget fisigi'lek enggere,

³⁵ it inebe afuni inunggulenu amu mene omanogo inom nanggelek hanggelek asi lagaukwasik, iren he afuni Allah inonggot mene nen hilingitarek mene omanogo inagut walhigik hilingiti lagaukwa.

³⁶ A'nogo hilingiti logolik he iren kembu fogerati lagaukwa, nen iren a'nogo hilingiti lagaukwa andiba re it inebe alomarogo fakhasukwa.

³⁷ Iren he inagainafuri omanogo wathigik he, it afuni Kanaan mene inanggembu omanogo faget fei laga-lagaukwa.

³⁸ Iren he yenggerugwi weak hilingitu aple inonggot mene omanogo abomalik inom helime yenggerugwi inom inoa'luk inamep he, iren kembu omanogo obaget pelabik laga lagaukwa. Andiba re iren o kweang andiba mondogat emetfikhi lagaukwa.

³⁹ Iren a'nogo hilingiti lagaukwa andiba re it inebe mondogat emetlaga logolik, It inebe Allah ba tiphogo welagi'lek hilingiti lagaukwa.

⁴⁰ Andi nen At Tuhan nen it inoba a'mage fesikhesik he, At onggwarek angge meneba nen a'makwe hebak aferogo kwelagisikhi lagaikhe.

⁴¹ Andiba re Aren it a'nogo inebe afuni inunggulenu amu mene inenggimo fesikhesik, it inaselei mene andoma nen sebelinarek logouwageluk herakfisasikhe.

⁴² A'nogo hilingfisasikhesikhe it a'nogo inoba enggin-fenggin hilingfisigik, it inomame a'ma logouwageluk hilingfisigik, ikhi lagaikhe.

⁴³ At Tuhan nen hundik-handik fikhalogo fisikhi lagaikheba nen, iren he at ane oak sagalhu mene nek inamurururogo hilingiti lagaukwa, andiba re it inonggwarek inaweak anggele'ma re inebe alomat laga lagaukwa.

⁴⁴ Oba nen he iren inane kwetu mene a'nogo At Tuhan nen esanggo holhi lagaikhe, it inebeba enggin-fenggin hikhi lagaukwa mene a'nogo Aren futfisikhi lagaikheat.

⁴⁵ It andi inobaget he Aren wene warisasikhe mene a'nogoba eberisikhi lagaikhe, nen Aren endawi hundik mondok hokho mene hilinginaferek mene a'nogoba endawirinafi lagaikhe.

⁴⁶ It afuni amu mene it inebe hele warogo fisa lagu mene omanogo nen inendawi hundik hilinginafi logouwageluk Aren afuni andoma inoba hilingfisikhi lagaikhe.

⁴⁷ Tuhan Allah neisena, Haren nit ninagap telninabin, niren Hat hai wathafik, nen Hat henu mondok fano horek mene andi fogethafik, hilingiti logogun nen he, nit afuni amu mene inaggelekwe andoma were'ma Haren andogorogo ninobagakhi logoin o.

⁴⁸ Yogondak huli nen hobuk mondok-mondok andoma huli re it afuni Israel mene ineisena Allah andi nek fogerati logouwak, nen it afuni mondogaren he, ”Amin!” ikhi logouwak.