MAZMUR 105 - Allah Wene Fano Wene Hupla Inane

Allah nen againafuri elelerogo hilingiti lagaikhe mene faget fogeratukwa wene

¹ At Tuhan oba nek hai wati logoni, At ebe along werek mene faget sagarik laga logoni, Allah nen, hilingiterek mene andi re, elalin mene hilingiterek andi nen he, yi afuni ti afuni yagaisilik laga logoino.

² At Tuhan oba nek fogerati logolik, awuni wati logoino. Aren ekhe mene ekhe mene mondok elalin hilingiterek mene andoma mondogat yagaisilik laga logoino.

³ Nit ninebe re At mene welago andi nen he ninagaiyegeti logouwok, Afuni mondogat At fogeratarek mene nen inagaiyegeti logouwak.

⁴ Hit At omame wokhisoageluk kino yagati logoino. Hundik-handik At enek fogerati logoino.

^5-6 Hit afuni Abraham Allah amingmingengge nen tagongge mene yi sani! Hit afuni Yakub Allah nen wenatikhe mene a'nogo nen tagongge mene yi sani! hit hinebe re, iren tagomangge mene inoba Allah nen he, elalin hilingiti lagaikhe mene andi, wene andi mondogat eberek logoino o. Ane palek werek mene andi, hinonggoragi'lek eberek mondok logoino o.

⁷ Tuhan andi re, Allah nit nineisena werek, Aren awene tekhogo isikhe mene andi re, afuni o kweangma yoma mondogat faget isikhe.

⁸ Aren he awene watnisasikhe mene a'nogo faget, endawimo eberek mondok welagarek. Aren wene watnisikhe mene andi re, nit afuni hobuk ta'larik laga logogun mene faget mondok-mondok logogin mene.

⁹ Wene andi re, omanggum Aren he Abraham waretikhe. Ombo'ne re, Isak waretikhe.

¹⁰ Andi ombo'ne re At Allah nen he, Yakub wareti logolik wene andi omamet fesikhemo re, afuni Israel mene inobaget mondok-mondok logogin mene waretikhe.

¹¹ Wene andi wareti logolik mel isikhe, ”An nen he, o Kanaan andoma hat wokhesumo eise logogin o,” iluk wene waretikhe.

¹² O attak he Allah againafuri mene inebe ap pok mene hakhogo logolik, inebe we wenagongge hakhogo o Kanaan kweang oba andoma welagaukwa.

¹³ Afuni inunggulenu ekhe mene inoba nen he ekhe mene inoba lagik, ya hokhum ta hokhum nikhi logolik, yamukhogo welagi'lek nikhi lagaukwa.

¹⁴ A'nogo nugunem it afuni ekhe nen yi enggin ti enggin inoba fouwageluk, Tuhan nen herakfisigi'lek elele woginafi lagaikhe. Aren he ap inogogwi raja-raja omanogo inelurogo yagaisikhi logolik:

¹⁵ ”Hiren he, An nagainafuri wenaginafigi mene andi inebe inoatik, nen it ap an nane yagaisagarek mene andi inebe weagerinafik, hilinginafubo,” iluk yagaisikhi lagaikhe.

¹⁶ At Tuhan nen he, it afuni o yoma mene inoba sumburu ouwak lakfei wagaikhesik, inamburu hobuk nogoin mene faget fakhasukwa mene mondogat weaget fisasikhe andi.

¹⁷ A'nogo meneat he, it hobuget fisaluk attak-attak laga logouwageluk ap ekhe lakfesikhe. A'nogo andi ebere at Yusuf ebe afuni inamingmingengge logouwageluk, at ebe onggo arat afuni inoba wanhukwa andi.

¹⁸ At eisok hele homagaisogo fesukwasik, posiemanggen oba alonggop hele kelogo fesukwa.

¹⁹ Kelogo fesukwa andi re, o attagat at Yusuf en ikhi logolik, ”An yi'nogo hilingnabugun,” iluk wene isikhe mene a'nogo higithogo, Allah ane isikhe a'nogo higit agaikhe andi.

²⁰ Inoe raja nen, agoromi Mesir mene inoba, at enggi hele warek welagaikhe mene a'nogo fikhalisoageluk yagaisasikhemo, enggi hele fikhalisasukwa.

²¹ A'nogo hilingitukwasik, at Yusuf ebe at kain aiba logolik, angge yi mene ti mene at enggiba logouwagaluk fesikhemo kain aiba andoma yabu hilingiti lagaikhe.

²² A'nogo hilingiti logolik, at raja agoromi inom, it ap inaluendek mene inom ”Yi'nogo hilingi'no,” iluk wene yagaisikhi logouwagaluk at Yusuf ebe menfesikhe.

²³ A'nogo were'ma, at Yakub o Mesir en lagaikhe. Lagaikhesik at ebe o andoma ap pogat welagaikhe.

²⁴ A'nogo were'ma, Allah nen he, At Yusuf againafuri inebe hokhorogo hilingisogo fisigik, it inaselei mene inomame weregat meneat he, it inoba nek he inomame hokho mene hilingfisigik isikhe.

²⁵ At Allah nen he, afuni Mesir mene nen Allah againafuri mene inabiret fisaluk, lalinafi logouwageluk inendawimo hilingfisasikhe.

²⁶ A'nogo hilingfisasikhesik, Allah nen he amingmingengge Musa wenatikhesik, Harun emberek inayonggo fuluk, lakfisasikhe.

²⁷ A'nogo lakfisasikhemo, iren he o Mesir logolik elalin hokho mene hilingiti lagaukwa andi re, At Allah nenat hilinginafi lagaikhe andi.

²⁸ Nen iren he, At Tuhan nen wene yi'nogo hilingiti logoino ti'nogo hilingiti logoino iluk melalfisasikhe mene a'nogo ane hologo hilingiti lagaukwa. Andi nen At Tuhan nen o kweang a'nogoba mum kiruang tenghogo hilingfesikhe.

²⁹ It inagai eil mep hilingisogo fesikhe. A'nogo hilingisogo fugunem, it inangge ikan omanogo mondogat wa'lagaikhe.

³⁰ It inaiba ekhema-ekhema mondogat, yagaise nek sik-pik isikhe. At raja aiba ogo sakhogo kwisikheat.

³¹ At Allah nen he sobon wesuak, isikhemo esa logalfuluk arat saga i wagik, nen o ekhema-ekhema kolum mondok hokhorogo saga igik, isikhe.

³² Andi nen, ombo'ne re o meiso obali'mo, meiso sogenggen mene lakfei wagik, nen o ekhema-ekhema andoma eilabut kulunghogo lakfigik wakfigik uageluk lakfei wagaikhemo, mondogat yegel-fegel hasikhe.

³³ A'nogo hilingiti logolik, e anggur inom, e ara inom mondok ero nene sanokhogo figik, nen e it mene o andoma welagaikhe mene mondogat weagerogo figik isikheat.

³⁴ Hobuk Allah nen pulue ayonggo fesikhemo, esa mondok hokhorogo inenggi wenasu mondok elo'lek mene inoba lakfei wagaikhe.

³⁵ Lakfei wagaikhemo yi mene ti mene yabukwe yago welagaikhe mene ekhe herakfigi'lek felelenghogo nasikhe. E o andoma yago welagaikhe mene ogo felelenghogo nasikheat.

³⁶ A'nogo hilingitikhesik hobuk Allah nen, afuni Mesir mene inebe lombok inagainafuri ap manggusa tago mene halok, inebe felelenghogo inoatikheat.

³⁷ A'nogo hilingitikhesik fem hobuk he, it afuni Israel mene inebe woginarek wulibi waga logolik, it inangge emas inom, perak inom, helaluk wulibi wagaukwa. Andi nen, it inebe mondogat he inoba fano inomame weregat, tegelek mondok woginarek wulibi wagaikhe.

³⁸ Afuni Mesir mene, it Israel mene inoba inailo mondok welagaikhe andi nen he, it wulibi wesuogoluk wagunem inagaiyek mondok agaikhesik, fano helaloak iluk isukwa.

³⁹ A'nogo wagunem, At Allah nen ohenaba salogo ferinarek waga lagaikhe. Nen o hubanggo halok he, esage ibilogo kwe logoinkwe selegerinafi lagaikhe.

⁴⁰ Allah kino yagatukwama, sue yomalmal hangge lakfisa wagaikhe. Sumburu roti pogoroba nen pelagisa wagunem it inalabut ninghogo ninggi lagaukwa.

⁴¹ Helep isa mene fothasikhemo re, i elesi houwalanghogo wilibisogo o leikwe andoma i hokho mene lagarek andi hangge wogisasikhe.

⁴² Andi re At Tuhan amingmingengge Abraham wene waretikhe mene eberek welagaikhesik, a'nogo hilinginafi lagaikhe andi.

⁴³ Againafuri wenaginafikhe mene, inendawimo inagaiyek oba, a'mit suphogo, woginarek wulibi wagaikhe.

^44-45 Allah nen he, againafuri At awene melalek higithogo hilingiti logouwageluk inom, nen wene yi'nogo hilingiti logoino, ti'nogo hilingiti logoino, iluk isikhe mene omanogo hologo hilingiti logouwageluk inom, it ekhe mene inaiba omanogo inom, nen it ineabukwe inomat At againafuri mene eise asimbik logouwageluk wogisasikhe. Tuhan fogerati logoino, u hak, Haleluya, igi andi, iluk wuni watikhe.