MAZMUR 104 - Allah Wene Fano Wene Hupla Inane

Pogot kweang yi mene ti mene yi'nogo elalhigin, iluk Allah fogeratikhe wene

¹ Allah neisena, an nendawinggenma nen fogethafi lagi. Neisena Allah Hat hebe esin mondok mene! Hat hasu laberek logou hak he, Hat hombakbak hilingik welagen mene inom, hebenengge li'loukhogo welagen mene inom, andomaba hilingik welagen, nen Hat hebere haselegen huli'liphogo welagen.

² Haren o pogot he tenda wurilogo talfugunem hakhogo talfesigin,

³ nen Hat hawi re o pogoroba andoma, i amboloba ambe palhigik wurogo fesigin. Kereta ba lagaikharek andi hak, Hat hanggwe nikhi logogin kwere, ohena elalogo fesigin. Sue ogolabiba tarogo lagarek hak, hogolabi sogoi oba tarogo nikhi lagen.

⁴ O sogoi re Hat mene, Haren inayonggo fuluk lakfisegendek, eilabut he Hat hamingmingengge logolik, Hat hobaget hilingitarek.

⁵ Kweang tik warogo ninghogo fesiginmo werek mene andi re, mondok-mondok andoma abolok igi'lek, etok mondok logogin.

⁶ A'nogo hilingfesigindik he Haren i agumen salogo fesigin, i ebe hetogerik lagokhi logolik tom unggul mondogat salik lagasikhe andi.

⁷ Haren i andi wenagetiginmo, i ebe hurogo piwagaikhe. Hane unggunggu ane hanggeba pararakhogo yagatiginmo aninirogo hela pi wagaikhe.

⁸ I andi tom ebene nen pialiluk wagalagaikhesik tonggokwe lakfei wagaikhe. Haren obuluk fesigin kweat wagaikhe.

⁹ I andi hetokhogo, huli warek mene afane wulibinogoluk, ambotkwe lagai waga logolik, kweang sebeli wesinogoluk, huli warogo fesigin.

^10-11 I elesi wulibisogo re, tonggokwe yenggelogo filik lagagin. Sue paik o leikwe mene mondogat inagai ninggi logouwagaluk inom, wam keledai enggama mene agai nele were'ma ninggik, nuggunem oba homot figik, ikhi logouwageluk inom, tom fena-fena honggolekwe andoma nen, i elesi wilibisogo lakfesigin.

¹² A'nogo hilingfesiginmo i esanggokwe horok horokwe andoma, sue inawi wusi we'luk, engga anggelekwe omanogo nen inane agarek.

¹³ Hat hebe pogoroba nen meiso tom ebene pelabi wagendek. A'nogo pelabi wagunem, kweangma yi mene ti mene mondok sik-pikhogo fanot fikhi lagen.

¹⁴ Yi engga ti engga wam ninggi logouwageluk, Haren fulelogo fegendek. Nit afuni ninebe faget he, yi mene ti mene nonggorek mene, Haren fulelogo fugunem, niren kweangma welagarek mene ninenggi nen pugunet fuluk, waganogo nonggorek.

¹⁵ Ninendawimo ninagaiyek hogoluk anggur amusu hilingisogo ninggik, Ninelokhonggen heanerogoluk zaitun amusu hilingisogo ninggik, Ninebe ninomamerogoluk yi mene ti mene yagaisogo ninggik, ikhi logouwageluk Harenat hilingninobagakhi lagen.

¹⁶ At Tuhan agayo o Libanon At onggwaregen yatikhe mene andoma ebene meiso hokhorogo lilogo pelabi wagarek.

¹⁷ E andoma bene re, sue awi wusi wagarek. E erembul oba andoma re, sue ranggung awi wusi wagarek.

¹⁸ Tom unggul uandek meneba re, kambing maro enggama mene welagarek. Paik sumbi hangge andi mene re, helep isa elema hina'lasi kuluk weragarek.

¹⁹ Ninenggi wenati logouwageluk, tugi elalogo fesigin. Mo ubuk ikherek andi re, onggwarek elu welagarek.

²⁰ Haren o mumet fugunem, o arat hup agarek. A'nogo hubagunem, yi paik ti paik enggama mene mondogat wulibi wagarek.

²¹ Singa ebe oan mene, at nagain mene faget ane kwe agan herarik nikherek, at noageluk Allah nen foukhogo fugu mene omanogo faget wo'nesuagaluk herarik nikherek.

²² O arat wei ugunem he, inambotkwe inebe hinago welagaikharek oba omanogo kwi laluk, weing la'luk welagarek.

²³ A'nogo werek kwelek, it afuni ogo inenggingge wanuogoluk wulibi lagaikharesik, inenggingge wilik nikhi la'luk he, o hu'mo agunem inailokwe inambotkwe kwi wagaikharek.

²⁴ Neisena Tuhan, Haren yi mene ti mene elalhigin mene andoma re Hat hendawinggen wenggelek oba nek elalhigin o, Haren yi mene ti mene elalhigin mene omanogo O kweangma mondogat peterek werek.

²⁵ I laut hokho mene yenggelogo fesigindik, elonggoma yi mene ti mene hokho mene endep mene logouwageluk, wenasu mondok elo'lekhogo fesiginmo werek andi.

²⁶ I yenggelek mene agum ebene andoma re e soba nikharek, Haren elalhigin mene ekhe kisu hangge hokho mene enu Lewiatan andi re, yele yafu andoma welagarek.

²⁷ It andoma mondogat he, mo inamburu nogoin oba higit asi agunem, ”Haren wo'nisagain,” iluk, hoba eberek welagaikharek.

²⁸ Haren wogisugunem, iren andogorogo fakhagarek. Inamburu wogisugunem, inalabut ninghogo nenggarek.

²⁹ It Haren elalinafigin mene andi, Hat helokhe kwani ugunem he, inailo mondok agarek. Nen Haren set it mene andi wanhunem he, inebe mondok wa'lagaikharek. Inebe kweang aling mene nogo nen he, inambotkwe kweang alingat agaikharek.

³⁰ A'nogo meneat he, it inoba Haren set wogisugunem he it a'nogo ineluk hilingisogo fisugunem, Haren kweangma ambotkwe ineluk ket mene hilingisogo fisikhi lagen.

³¹ Neisena Tuhan, Hat he esinet hobagagu mene hilingi'mo re, esin mondogat logoino. Haren he yi mene ti mene elalhigin mene andi faget he, hendawimo hai hikhi logoino,

³² Hat heilenggen kweangma yetha wagunem he kweangma mondok leigeterek. Henggi tom unggul fakhugunem he, so'le wulibi wagarek.

³³ An nebe neluk logolik neisena Tuhan hobaget wuni watu mondok logogin. An nebe welagi yaba re neisena Allah hobaget wuni wati logolik fogethafu mondok logogin.

³⁴ Aren an nendawimo nagaiyeget fugunem an wuni wati lagi andiba, At oba liok ikhi logouwak.

³⁵ Afuni weak hilingitarek mene o kweangma yi awi ti awi welagaikharek mene andoma re, inebe mondogat lek akhoak. Afuni inobaharo weak mene andoma re, inebe mondogat lek akhoak. Neisena Tuhan an nendawimo nen he, fogethafi logogin o, iluk Haleluya, igi andi, iluk wuni watikhe.