MAZMUR 103 - Allah Wene Fano Wene Hupla Inane

Ninendawinggenma nen Tuhan enek fogerasugun wene

¹ At Daud en wuni watikhe mene An nendawinggen oba nen inom, nebeba mondogaren inom, neisena Tuhan tegelek mondok welagendek mene a'nogo fogethafi logolik hapne wanhi lagi.

² An nendawinggenma nen Tuhan fogethafi lagi, nen Aren fano hilingninobagaikherek mene andoma re hinonggorasu fuk.

³ An nen yi weak ti weak hilingitirek mene re, Arenat sebelogo leget fisikherek. Nen yi ou ti ou noba mene re, Arenat korogo wokhikherek.

⁴ An nebe endawi hundigen, endawitnaferek, nebe wa'lasuhak were'ma, telnaferek.

⁵ Sumburu wogisugunem inalabut ninghogo nenggarek hak, Aren fano hilingnafunem neluk fano welagi. Sue pim ket alue agarek hak, Aren an nebe nagap ket mene hilingisogo nobagagunem welagi.

⁶ At Tuhan nen, afuni ekhe weak hilingfisagarek mene, inebe mondogat inawene pilingisogo wene higithogo inoba figik kotik ikherek.

⁷ Aren yi'nogo hilingisigin iluk eberek welagaikhe mene a'nogo at Musa oba yagatikhe, nen At obabut hilingiti lagaikhe mene a'nogo re, it afuni inunggulenu Israel mene inoba inugisasikhe.

⁸ At Tuhan he endawi hundik hilinginafik, inelagaik were'ma endawirinafik ikherek mene werek. At obabut mondok hombunsek logolik, endawi hundik mondok hokhorogo hilinginafu werek.

⁹ Aren he, mondok-mondok faget wena'nisugu welagarek lek. A'mage ninoba fugu welagarek legat.

¹⁰ Aren he nit ninaweak werek mene higithogo wene ninoba fikherek lek, Athe niren kwanirogo hilingitorek mene ambisangma higithogo ninoba fikherek legat.

¹¹ Oba nen he kweangma nen, pogot halianggen oba liakhugunem mondok uan andi higit, it afuni Allah oba inailorogo welagaikharek mene andi re, mondok hokhorogo endawirinaferek.

¹² Mo lagai wagarek huli nen ubuk ikherek huli eil uan andi hangge, nit weak hilingitorek mene waganogo yatmaat lakfisikherek.

^13-14 Aren he, ”It inebe ti mene elalinafigi, kweang abu'ne mene hilingik,” iluk elu andi nen he, ineisugwi nen inagainafuri enendawinggen hundik welagaikharek andi hak, At Tuhan nen he At oba inailorogo welagaikharek mene re, endawirogo welagarek.

¹⁵ E owil o leikwe hokhorogo iteresigen, misigam lologo pikherek andi hak, afuni ineluk umur welagaikharek andi re engga misigam lologo pikherek andi higit welagaikharek.

¹⁶ A'nogo were'ma re, sogoi funha wagunem weak-weagat lek agarek. A'nogo lek agunem he, koma laga heat inobakheindok palagarek. Nit afuni re nineluk andi higit welago.

^17-18 A'nogo meneat he, At Tuhan nen it afuni At oba inailorogo logolik, ”Yi'nogo hilinghinabigin,” iluk wene warisasikhe mene a'nogo, fisogo mondok logolik higithogo hilingitarek mene andi inebe hobuk ta'larik lagu kwelek, obabut fano a'nogoba, endawirinafu mondok welagarek.

¹⁹ Nineisena Tuhan ebe pogoroba logolik, yi'nogo hilingi'ni ti'nogo hilingi'ni iluk melalinafu were'ma, yi afuni ti afuni ekhe mene-ekhe mene mondogat he, at a'ma nek welagarek.

²⁰ Hit Allah agoromi malaikat hinomame hokho mene, At ane hologo hilingiti lagep mene omanogo hinebe mondogaren, At Tuhan andi nek fogerati logoino.

²¹ Hit Tuhan amingmingengge mene pogoroba logolik, At endawimo amolo anggikherek mene, higithogo hilingiti lagep mene andoma, hinebe mondogaren, hineisena Tuhan enek fogerati logoni o.

²² Yago, hit Aren mondogat elalogo hinobagasikhemo logolik, o wilayah Aren melalinaferek meneba welagep mene omanogo mondogaren he, At Tuhan enek fogerati logoino! An nendawinggenma nen Tuhan fogerati lagi o,” iluk wuni watikhe.