MAZMUR 102 - Allah Wene Fano Wene Hupla Inane

Inoba enggin-fenggin hikhi logolik samban agarek wene

¹ It afuni inoba enggin-fenggin ugu mene nen inoba lebelekhogo logolik inane elagaikhogo Tuhan oba samban agarek mene.

² Tuhan neisena, an nen samban ikhi lagi mene andi hesanggo holnabin o, nane hoba ikhi lagi mene andi Hat hesanggoma asi waga logouwak.

³ An noba engginhogo were'ma nealuk he, Hat helokhe amu fikhit enden lasu fuk. An nen henu hombuk palhu halok he hesanggo holnafi logoino, Haren onggo weak weakhogo nek yaganeti logoino.

⁴ An neluk yire so'le palogo lek agarek hakhogo legari'lago, Nen an noak he endu wabunak ninggerek hakhogo fulung eri'lago.

⁵ An nebe re engga iringgik mene higit liongorogo taik igirik logolik he, nambengge yi mene ti mene na re elo'lek hilingnabi'lago.

⁶ Nebe noak heinet wati logolik nane kwetu werek kwelek enek he, nebe we nagap noak oba huli'lipsek mene nek werek andi.

⁷ An nebere sue undan o leimo werek mene higit, nen sue sumu-sumu o folukwe meisalogo herakfugunem werek mene hak welagi o.

⁸ An nebe re sue o tum oba amu nek eilmo weakhogo welagarek higit logolik, nogo u re nabit nabi'logo.

⁹ It naselei mene nen he linggene hundik-handik an puliarogo pela'nafu mondok werek, it ap an wena'neri'lagwi mene andoma nen he an nenu igisogo homan i'nobagagunem welagi.

¹⁰ An he wul omanogo namburu higit agunem nunggu welagirek, neilamusu re nagai higit agunem nunggu welagirek.

¹¹ An he Hat ha'mage lagali'lago mene andiba, hambokhogo hu'niugunem welagirek andi.

¹² An nebe neluk a'nogo re o hubet inafumak palogo lagarek higit lek aga lagi, nen engga halongo ikherek hak an nebe puk agarik welagi.

¹³ Oba nen he neisena Tuhan, Hat he Raja mondok-mondok logogin o. Mo lagagik pigik andoma re ebet hiikhi logolik mondok logogun.

¹⁴ Haren Sion hendawi hundik hilingisigin oba a'nogo arat asi wagunem he, Hat hebe menla'luk hendawi hundik hilingisigin werego.

¹⁵ O andi mondogat afuni nen molulukhogo lakfaga oba nen he, nit Hat hamingmingengge mene nen he o andi faget ninendawi hundik hilingik welago. Nen, o andi mondogat wul age palogo taik ekheba nen he, iren inendawirati logolik werek.

^16-17 At Tuhan nen o Sion nekhengge wusimbik, At ebe andungdang logolik weinam asi wagu sambul he, At Tuhan Omame Hokho werek mene andi faget he it yi afuni ti afuni inunggulenu lombok welagaikharek mene omanogo nen he inailoti logogun. Nen At andungdang werek mene a'nogo faget he it raja-raja omanogo mondogaren inailoti logogun.

¹⁸ It afuni At againafuri mene inebe mondogat inomame lek a'luk werek mene nen, At Tuhan oba samban agarek mene re, Aren mondogat esanggo holherek. Iren kino yagatarek mene re Aren nabit iluk herak fisikherek lek.

¹⁹ It ap inunggulenu oan ta'lagi'lek werek mene nen, Arenek fogerati logouwagen he, it inebe hobuk logogun mene andoma inobaget, At Tuhan nen hilingite mene inom, hilingiri'lago mene inom, andoma mondogat lisu palogo feino o.

²⁰ At Tuhan ebe obalik mondok hore'ma legoma po'lima logolik, eil pelakninarek werek, o pogoroba po'lima nen he kweangma yoma pelakha wagaresik,

²¹ it afuni hele warogo fisugunem logolik weak-beakhogo hilinginafunem andoma inane esanggo holek logolik werek, nen it ap unggum inoba fuluk inebe pinggi inoasugun iluk hilingitunem omanogo lologo wulak fisagain iluk hilingiterek.

^22-23 Andiba re, it ap inunggulenu ekhe mene-ekhe mene inom, o kerajaan andoma werek mene inom, At Tuhan obaget hilingisuogeluk kabogeti logolik, At enu re Sion oba andoma fageti logogun, nen At ebere o Yerusalem oba andoma nen foktiati logolik fogerati logogun.

²⁴ An nebe souge logolik At Tuhan nen an nomame werek mene a'nogo mondogat leget fisikhe, nen an nebe neluk werek mene umur a'nogo horoget fikhe.

²⁵ A'nogo hilingfikhemo an nen ikhi logolik he, ”Neisena Allah, an nebe neluk horok tulem were'ma arem, nagaime lisogo wo'nabu fugo,” igi. Tuhan Hat he heluk mondok-mondok logogin,

²⁶ o attak he Haren kweang tik warogo fesigin, nen pogot he Hat henggi nenat talogo fesigin.

²⁷ Andoma mondogat legasigin oba nen he, Harenek he femhogo logogin, andoma mondogat he su weak a'luk tiliphogo lagarek andi higit legasigin. Haren he su mining agunem elokhe munen agarek andi hak, andoma mondogat he munenigin.

²⁸ Oba nen he Hat enek he hebe hetok mondok logogin, Hat hebe heluk ambisangma lek asi lagain oba ekhe werek lek.

²⁹ Nit ninagainafuri nen ninombawi taginabugun mene fani fanorogo nek logogun, nen Haren ferinarek mondok were'ma re inailo lekhogo logogun.